Yohanis ladhe nèdhi liru dènge rai-haha rupa hiu
21
Hèia ja'a ladhe kèdhi liru dènge rai-haha rupa hiu, te liru dènge rai-haha dhu dhui ele aa'i le. Dhasi aad'o heka kahèi.a 2 Ka ja'a kèdhi kota mola-mèci unu Ama Lamatua, nuka Yerusalem Hiu, puru mai nèti sorga. Kota ne, dhu pa'èra mema, sama sèmi bhèni dhu neo leo-èmu hiu, dhu lalau nare le iisi, ho la'e soru mone dhu neo j'aj'i dhèu èmu na.b 3 Ka ja'a tadèngi lii dhu kapai èci mai nèti kadera paredha ne, peka na,“Ladhe paie-iie!
Karèi nèti deo ne'e ne, Èmu Ama Lamatua ètu talora aae dhèu rai-haha.
Karèi nèti deo ne'e ne, Lamatua mamuri pa'èci dènge dhèu unu Na.
Te Nèngu j'aj'i le Ama Lamatua ra.
Aa rèngu j'aj'i le ana-ana Na.
Bèli-camèd'a Nèngu bera-bera dènge ra.
Aa Na palere-lere dènge rèngu taa-taa.c
4 Bèli-camèd'a Na seka pamango èi madha aa'i-aa'i ra,
sèna ka rèngu roma iisi heka.
Lula ètu era èèna, abhu heka papèd'a-tarègu.
Aa ètu era èèna, abhu heka mamadhe.
Ngaa-ngaa dhu uru èèna rèti sasusa, aad'o heka èci sa.
Ngaa-ngaa dhu uru èèna rèti j'aj'èra, ele aa'i si le.”d
5 Hèia Nèngu dhu madhèdi ètu kadera paredha èèna, peka na, “Ladhe paie-iie, te Ja'a tao pahiu aa'i le.” Ka Na padhai lii hari dènge ja'a, peka na, “Suri ka! Dhèu aa'i-aa'i bisa parcaya Lii Holo-Nori Ja'a ne, te aa'i-aa'i se mema lèke tare'a-re'a!”
6 Ka Na peka hari dènge ja'a, na,
“Aa'i-aa'i dhu Ja'a pajaji sèra, j'aj'i aa'i le.
Te Ja'a ne,
Alpa toke Omega,
Aa Ja'a ne,
A toke Z,
Aa'i-aa'i ra j'aj'i nèti Ja'a,
karèi nèti uru ka, toke d'ai èle.
Dhèu aa'i-aa'i dhu koko-kamango,
pe Ja'a hia ra rinu iia-iia d'ara,
nèti madha èi dhu nèti mamuri hia dhèu, sèna ka dhèu sèra bisa mamuri dènge tare'a.e
7 Dhèu aa'i-aa'i dhu taha madhutu j'ara Lamatua dhu mola,
bèli-camèd'a rèngu unu mèngi-nale aa'i-aa'i ra.
Pe Ja'a j'aj'i Ama Lamatua ra,
aa rèngu j'aj'i ana-ana Ja'a.f
8 Te ngaa abhu kahèi dhèu dhu èèna na lèke core si,
asa d'ara dhasi ai èi nasu dhu heo na ma'ète boe ciki sa.
Nuka sèmi: dhèu dhu madha'u leli,
dhèu dhu soro kabodho mi Lamatua Yesus,
dhèu d'ara kaj'alu,
dhèu dhu tao j'ara makae dènge dhèu dhu j'aj'i boe dhèu èmu-kamali ra,
dhèu pamadhe dhèu,
dhèu sogo-tagu nidhu,
dhèu suagi,
aa dhèu kapod'e-kabèli.
Bèli-camèd'a rèngu aa'i-aa'i lèke pèci asa d'ara dhasi ai,
dhu ra peka na, ‘era mamadhe ka dua.”’
Yohanis ladhe nèdhi kota Yerusalem rupa hiu
9 Ka ja'a ladhe kèdhi ca dhèu nèti ana pajuu dhèu pidhu nèti sorga, dhu uru èèna rèd'u bokor dhu isi dènge nanasa Lamatua. Na mai paraga dènge ja'a, ka na lii, peka na, “Mai ku sa ne'e! Te ja'a neo pad'elo dènge èu bhèni dhu neo kab'i dènge Ana Kalèbho.”
10 Hèia ja'a abhu Roh Lamatua, ka ana pajuu ca dhèu nèti sorga mai nedhe nèti ja'a asa kolo ledhe dhu dedha aae èci. Nèti era ne'e, na pad'elo ja'a kota Yerusalem, nuka kota Ama Lamatua dhu mola-mèci, dhu puru mai nèti Ama Lamatua ètu sorga.g 11 Kota ne saraga titu kèna! Abhu saraa dhu kalua nèti dadedha Ama Lamatua sèmi hadhu intan dhu kale'e, toke kota aa'i-aa'i heo lo'a-lo'a. 12 Abhu tedhe dhu dedha aae oke nare kota ne, dènge canguru dua babèdho. Abhu kahèi canguru dua ana pajuu nèti sorga dhu madhenge babèdho kapai se. Ètu canguru dua babèdho se, dhu suri ngara-ngara nèti canguru dua udhu-rasa Isra'el.h 13 Tèlu babèdho tangara asa dhimu. Tèlu tangara asa haa. Tèlu tangara asa badae. Aa tèlu hari tangara asa balèu.i 14 Tedhe ne dhu patitu ètu canguru dua hadhu fanderen dhu kapai. Ètu hadhu se èci-èci dhu suri ngara nèti canguru dua dhèu pajuu-paleha Ana Kalèbho dhu lalau-lalo'o Ne ètu rai-haha.
15 Ka ana pajuu dhu padhai lii dènge ja'a, kèpe nare tatea a'uku nèti hualaa èci, ho neo uku kota ne dènge hèb'a babèdho kapai, aa dènge tedhe na.j 16 Na uku uru tedhe kota. Madhera, bhabhèla dènge katitu na, èci èèna ka. Nuka, aa'i-aa'i ra, 2.220 (dua riho dua ngasu dua nguru) kilometer.k 17 Hèia na uku ma'aa tedhe, madhutu a'uku dhèu rai-haha. Ma'aa na, èna nguru lèmi meter.l 18 Tedhe ne, tao nèti hadhu kale'e, ngara na yaspis. Aa aa'i-aa'i ètu d'ara kota ne, tao nèti poe dènge pai, dhu mèu aadha-aadha nuka sèmi tèru.
19 Canguru dua hadhu fanderen sèra, tao nèti rupa-rupa hadhu kale'e dhu kab'ua. Fanderen ka èci, tao nèti hadhu yaspis, dhu mangèru kale'e. Ka dua, nèti hadhu nilam dhu kale'e mangèru bhidhu-bhidhu. Ka tèlu, tao nèti hadhu mirah dhu mea kale'e. Ka èpa, tao nèti hadhu samrud, dhu mangèru kale'e. 20 Ka lèmi, tao nèti hadhu unam dhu pakatanga dènge karara mea sanama pudhi. Ka èna, dhu tao nèti hadhu sardius, dhu mea kale'e. Ka pidhu, tao nèti ratna cempaka dhu karara hualaa. Ka aru, dhu tao nèti hadhu beril, dhu kale'e mangèru aae. Ka ceo, tao nèti hadhu krisolit, dhu karara moce-moce. Ka canguru, tao nèti hadhu krisopras dhu mangèru mud'a. Ka canguru èci, tao nèti hadhu lasuardi, dhu mangèru dhasi. Aa ka canguru dua, tao nèti hadhu kecubung, dhu kale'e mea sanama mangèru. 21 Aa babèdho kapai canguru dua bua sèra, tao nèti canguru bua mutiara. Babèdho èci tao nèti mutiara cue. J'ara oka-hoo ètu d'ara kota ne, tao nèti poe-pai dhu kale'e sèmi tèru.m
22 Te ngaa ja'a kèdhi boe Èmu Manèngi-Mangaj'i ètu d'ara kota ne. Lula Ama Lamatua dhu koasa kapai risi dènge Ana Kalèbho pea taa-taa ètu d'ara kota ne. Nèti èèna ka, dhèu pahaha iisi mema mi Rèngu. 23 Kota èèna, parluu boe madha lod'o dènge hèru ho pasaraa ne, lula saraa Ama Lamatua ka dhu pasaraa ne. Aa Ana Kalèbho ne j'aj'i nuka sèmi labhu dhu heo.n 24 Dhèu nèti suku aa'i-aa'i ètu rai-haha, èèna na kako lasi mai ètu d'ara saraa èèna. Dhèu aae-dhèu aae nèti rai-haha, rèti kakaja-sasu'i ra asa nèi kahèi.o 25 Ètu era nèi, abhu boe mèda. Nèti èèna ka, parluu boe bèdho hèb'a tedhe. 26 Pe asa d'ara kota ne, dhèu rèti aa'i-aa'i dhu be'a kahèi, dènge hormat aa'i-aa'i nèti rai-rai ètu rai-haha.p 27 Te ngaa dhu bisa boe maso asa nèi, nuka aa'i-aa'i dhu karehe, nuka sèmi: dhèu sogo-tagu nidhu, dhèu dhu tao j'ara makae, dènge dhèu kapod'e-kabèli. Dhu bisa maso, nuka rèngu dhu ngara ra abhu ètu d'ara sasuri Ana Kalèbho. Rèngu se'e ka dhu mamuri taa-taa dènge Ama Lamatua.q