Ra èki mege naga dènge rate toke ca riho tèu
20
Hèia ja'a kèdhi ana pajuu èci nèti sorga puru mai nèti dedha-liru. Na kèpe dènge rate aae èci, aa nèd'u dènge gagoe nèti ro'a j'aj'èra dhu dènge boe too-lane. 2 Ka na la'e kèpe mege naga, nuka dhèu aae nidhu, dhu ra peka na, “Lamatua nidhu”. Nèngu ne'e ka dhu leko-monya dhèu rai-haha karèi nèti uru ka mai. Hèia ana pajuu ne èki mege naga ne dènge rate, ho taha ne ètu d'ara ro'a j'aj'èra dhu dènge boe lane èèna, toke ca riho tèu.a 3 Hèia ana pajuu ne tule eele mege naga na asa d'ara ro'a j'aj'èra èèna. Ka na segel pamadhe hèb'a ro'a èèna, sèna ka taha mege naga ne ètu d'ara ro'a, toke èle ca riho tèu. Dènge j'ara ne'e ka, mege naga ne bisa heka leko-monya suku-suku ètu rai-haha ne, ètu d'ara ca riho tèu. Èle èèna ka, heka patabuli ne kèna, te ngaa nare boe nèbhu.4 Èle ka, ja'a kèdhi kadera paredha ae-ae, dènge dhèu madhèdi ètu dedha. Ama Lamatua dhu ded'e si j'aj'i hakim. Rèngu se dhu uru èèna lasi lole Lii Lolo Be'a nèti Yesus, dènge Lii Holo-Nori Ama Lamatua, toke dhèu pamadhe si. Rèngu se ka dhu sogo-tagu boe badha bhelu dènge mèdha sogo-tagu na. Rèngu se dhu ro'o boe sèmi cap nèti badha bhelu ne ètu katangarèi ra, do ètu kacui-aai ra. Dhèu pamadhe si, te ngaa Ama Lamatua pamamuri hari si, sèna ka ra rèd'u paredha bera-bera dènge Kristus toke ca riho tèu.b 5-6 Dènge sèmi ne'e, rèngu se'e ka dhu uru j'ara Ama Lamatua pamamuri hari si nèti mamadhe. De rèngu oto titu kèna, te rèngu j'aj'i le dhèu unu Lamatua. Ra core boe si asa era j'aj'èra èèna, ka ra abhu boe mamadhe ka dua. Te rèngu se nuka sèmi ama agama dhu bèli-camèd'a lalau-lalo'o Ama Lamatua dènge Kristus. Aa rèngu rèd'u paredha kahèi bera-bera dènge Kristus toke d'ai ca riho tèu.
Te ngaa dhèu madhe dhu leo sèra, hud'i mate ku d'ai ca riho tèu, heka Ama Lamatua pamamuri hari si kèna.
Ra core dhèu aae nidhu asa d'ara dhasi ai
7 Ropa èle ca riho tèu ku, pe Lamatua pua patalale mege naga nèti d'ara ro'a j'aj'èra. 8 Hèia la'e leko-monya dhèu nèti suku-suku dhu ra peka na, Gog dènge Magog, dhu mai nèti mia-mia ètu rai-haha ne. Pe na pakaboko dhèu ra ho lasi pamusu. Dhèu se ae titu kèna, sama sèmi salae ètu nebhe dhasi.c 9 Hèia sordad'u Gog dènge Magog kako lasi kaj'èu d'ai rae-rae ètu d'ara rai-haha. Ka ra reo rare kota Lamatua dènge dhèu dhu Na sue sèra. Te ngaa Ama Lamatua papuru ai nèti dedha-liru ka na'a pakèpu aa'i sordad'u se'e. 10 Ka dhèu unu Lamatua sèra kèpe rare dhèu aae nidhu dhu kapod'e nare le dhèu ae. Hèia ra core ne asa d'ara dhasi ai èi nasu, dhu heo na loe boe. Èèna na, ra bèdho tèke ne sama-sama dènge badha bhelu, aa dènge dhèu nèti lii padhai kapod'e-kabèli èèna. Ètu era ne'e, rèngu abhu j'aj'èra loe boe mèu-mèda toke d'ai mia-mia.
Ama Lamatua pama'ète lii langu dhèu aa'i-aa'i
11 Èle èèna ka, ja'a ladhe kèdhi kadera paredha pudhi aae cue. Aa Ama Lamatua ka dhu madhèdi ètu kadera èèna. Cag'ag'a laa, rai-haha dènge liru, rai pakaj'èu ka ele aa'i si toke tèdhi heka senu-salao sa hèi. 12 Ka ladhe kèdhi dhèu dhu madhe sèra. Rèngu aa'i-aa'i ana iiki-dhèu kapai, titu tangara asa kadera paredha. Hèia ana pajuu nèti sorga mai, ka bhoke sasuri-sasuri dhu suri tatao aa'i-aa'i dhu dhèu rai-haha ad'u-ue. Ka ra bhoke hari sasuri leo èci, dhu suri ngara-ngara dhèu dhu bèli-camèd'a mamuri taa-taa dènge Ama Lamatua. Hèia Na pama'ète lii langu nèti dhèu madhe, madhutu ngaa dhu rèngu èci-èci ad'u-ue, nuka sèmi dhu suri tèke ètu d'ara sasuri sèra.d 13 Ka dhèu madhe sèra mai titu patangara dènge kadera paredha èèna. Rèngu se aa'i-aa'i dhu madhe le ètu rai-dedha dènge ètu d'ara dhasi. Hèia Ama Lamatua pama'ète lii langu rèngu èci-èci, madhutu tatao ra. 14 Èle èèna ka, Ama Lamatua pèci eele Mamadhe asa d'ara dhasi ai. Aa Na core eele kahèi Era Pea Samanga Dhèu Madhe asa d'ara dhasi ai. Te dhasi ai ne, era mamadhe ka dua. 15 Dhèu dhu ngara ra suri boe ètu d'ara sasuri ne'e, lèke core kahèi asa d'ara dhasi ai. Te sasuri èèna, nuka dhu suri ngara-ngara dhèu dhu mamuri dènge Ama Lamatua taa-taa toke d'ai mia-mia la'e.