Ja'a suri sasuri ne hia dhèu aa'i-aa'i dhu Ama Lamatua hag'e nare, dhu Na sue, aa dhu Yesus Kristus loe boe j'aga si toke d'ai Nèngu mai hari.^a 2 Ja'a manèngi ho Ama Lamatua pad'elo rasa kasia aa pad'elo d'ara hua iia Na ae-ae mi miu, sèna ka miu bisa mamuri padame èci dènge èci.

3 A'ari dhu pasue! Uru èèna ja'a neo suri sasuri hia miu, lula-nèti j'ara aa'i-aa'i dhu Ama Lamatua tao, sèna ka hia mamuri mi èdhi. Te ngaa limuri ne, abhu lii langu, de ja'a hud'i suri hari j'ara dhu leo. Ama Lamatua pangèd'u le mi èdhi j'ara mamuri dhu mola. Nèngu hia j'ara mamuri ne ca tèka di, aa Na ub'a boe. Nèngu hia j'ara mamuri ne mi dhèu-dhèu parcaya. De ja'a manèngi sèna ka miu pa'èra-èra d'ara, ho dhèu baku pakapod'e j'ara mamuri nèti Lamatua.

4 Te ngaa abhu le pèri-pèri dhèu dhu mai pahuni-pahuni ètu talora aae miu. Dhèu sèra madhutu boe j'ara mamuri Ama Lamatua dhu mola, te ngaa ra madhutu dad'èi d'ara unu ra. Rèngu peka na, d'ara hua iia Lamatua ka dhu bhoke j'ara ho rèngu bisa tao leli. Èèna na omo koso! Rèngu se dhèu dhu peka leo, tao leo! Dad'èi rèngu ka, ho èdhi nanene ia ka Dhèu Aae èdhi dènge Kètu èdhi, Yesus Kristus. Te ngaa sanèd'e, te dhu suri tèke ètu Sasuri Mola-Mèci, na, Lamatua unu Na ka dhu tao tèke le hahuku dhu j'èra karèi nèti uru ka.

5 Abhu j'ara ae dhu miu me'a le, te ngaa ja'a pasanèd'e hari, ho miu baku pamud'e.

8 Masi ka sèmi èèna, te ngaa dhèu dhu maso asa talora aae miu sèra, mamuri ad'u-ue sasala taruu. Aa te ngaa, lii nii ra, ka rèngu pake j'aj'i mi alasan ho pakaj'alu iisi ra, ho lab'a leli dhèu dhu rèd'u koasa, aa pahahe koasa-koasa dhu hua iia ètu sorga. 9 Te ngaa Mikael tao boe sèmi rèngu. Nèngu èèna, madho nèti ana pajuu Lamatua ètu sorga. Lod'o Musa heka madhe èèna, Mikael dhu pab'ala dènge dhèu aae nidhu lula-nèti ngi'u aae Musa. Te ngaa Mikael pasala boe ne, do pahahe boe ne kahèi. Dhoka na peka na, “Pe Lamatua ka ator èu, heka èu sèmi more pala mu kèna!”^d

10 Te ngaa dhèu dhu maso asa talora aae miu, sama boe sèmi èèna. Dhèu se pahahe aa pusi-pahae boe j'ara aa'i-aa'i dhu rèngu re'a boe. Rèngu dhoka madhutu dad'èi d'ara di, nuka sèmi badha sa. Nèti èèna ka, rèngu pa'ele iie ngi'u unu ra.

11 Mata unu ra! Pe sèmi rare pala ra. Te tatao rèngu nuka sèmi Kaen, dhu hake pamadhe ari d'èlu na. Ra tao nuka sèmi Balaam, dhu sab'a ngaa èèna ka, sad'i abhu doi. Rèngu tao kahèi sama sèmi Kora, dhu unu mamadhe-mamopo lula palab'a dènge Lamatua. Lula bhabhelu-katub'a ra, èèna na rèngu pakaj'èu nèti Lamatua kahèi.^e

12 Ladhe rèngu pakaboko dènge miu ho sanèd'e sasue Lamatua, lod'o miu mi'a sama-sama, na, rèngu re'a boe makae, aa manga'a dèu ngara. De miu baku pamud'e. Te rèngu nuka sèmi hadhu aae ètu d'ara dhasi dhu bisa pamae kapa.^f Rèngu cakaraa liru mèdhi ètu dedha rai mango dhu papuru boe èj'i ca pasuti sa. Rèngu dhoka lii padhai di dhu kapai, te ngaa tao rare boe ngaa èci sa dhu be'a. Rèngu èci èèna ka dènge ana aaj'u dhu guna boe ngaa-ngaa. Ladhe d'ai hèru hua, hua boe cue sa hèi; te'a boe, na, dhu bete eele le toke d'ai amo-èsu kateme. 13 Sasab'a ra dhoka pamakae èdhi di. Te rèngu nuka sèmi naha dhasi dhu tèke eele horo dhu pènu dènge kaj'alu dhutu-dhutu ètu sebhe dhasi. Rèngu sama sèmi hua-hètu kahèi dhu la'e-mai ètu dedha-liru dhu abhu huku, ka Lamatua tèke si ètu era èci dhu maroga aatu-aatu, hèia ele aa'i si.

14 Henok, ana-èpu ka pidhu, ige mulai nèti Adam. Nèngu peka mema le, lula-nèti dhèu sèmi se'e se. Te na peka na,

16 Dhèu se'e se re'a dhoka loe boe ka'ugu di. Rèngu muri dhoka pasasei di. Ra pusi-pahae boe dad'èi Lamatua, aa madhutu dhoka dad'èi d'ara rèngu di. Rèngu dhoka padhai lii padedha iisi ra. Ra d'èi pahie rèhu dènge mangojo d'ara dhèu, sèna ka hud'i laa rèngu abhu pala madhutu dad'èi ra.

17-18 A'ari pasue aa'i-aa'i! Baku bhèlu lii padhadha Kètu èdhi, Yesus Kristus, dhu dhèu pajuu-paleha Na peka-padhai mema mi miu, na, ladhe oe èle rai-haha, dhèu dhu tema pa-aape dhèu, èèna na, cèu mai. Rèngu d'èi pahahe dad'èi Lamatua, ho madhutu dad'èi rèngu unu ra dhu koe-kapengo.^h 19 Limuri ne, abhu le dhèu sèra. Rèngu ka dhu kakèj'i dhèu ètu mia-mia, sèna ka pamae-pamanyèla miu. Mamuri ra dhoka madhutu dad'èi dhèu rai-haha di, lula Roh Lamatua dhu Mola-Mèci abhu boe ètu d'ara rèngu.

20 Te ngaa a'ari pasue! Miu hud'i padhèdi ku mamuri miu mi dedha fanderen nèti lalèka miu dhu mola-mèci. Aa ladhe miu sabaj'a, madhutu ngaa dhu Roh Mola-Mèci peka dènge miu. 21 Sanèd'e, Ama Lamatua sue miu titu kèna. De j'aga ngi'u miu, aa sanèd'e sasue Na. Aa miu hud'i tatae taruu, sèna ka Kètu èdhi, Yesus Kristus, pad'elo rasa kasia mi miu, aa hia miu mamuri dènge Ama Lamatua toke d'ai mia-mia la'e.

22 Miu hud'i pad'elo ku rasa kasia mi dhèu dhu d'ara kajari. 23 Miu hud'i bantu dhèu aa'i-aa'i dhu parluu abhu mamuri, sama sèmi miu ère dhèu nèti d'ara ai karoo. Abhu dhèu leo hari dhu miu hud'i pad'elo ku d'ara be'a miu dènge rèngu. Te ngaa, mage-mage! Masi ka miu rasa kasia mi rèngu, te ngaa miu kahèi hud'i madenge ku dènge kaj'alu ra, nuka sèmi dhèu madenge dènge kodho dhu kaj'alu.ⁱ