Èi loko dènge aj'u dhu rèti mamuri
22
Èle ka ana pajuu nèti sorga pad'elo dènge ja'a loko èci, dhu èi ne nèti mamuri. Èi ne mèu aadha-aadha nuka sèmi tèru. Na hae mai nèti kadera paredha Ama Lamatua dènge Ana Kalèbho.a 2 Hèia hae la'e asa talora aae j'ara oka-hoo ètu d'ara kota ne. Nèti sebhe-sebhe loko ne, abhu aj'u dhu hua na nèti mamuri. Aj'u ne d'ara ca tèu, hua canguru dua hari; ca hèru, ca tèka. Rèu na bisa j'aj'i èi na'i ho puri-pa'èle suku-suku ètu rai-haha nèti papèd'a ra.b 3 Te ngaa rèngu dhu Ama Lamatua tule eele aa dhoo si, abhu boe ètu d'ara kota ne. Dhu ètu ne'e, nuka Ama Lamatua dènge Ana Kalèbho dhu madhèdi ètu dedha kadera paredha, aa dènge ana pua-paleha Ra dhu pahaha iisi mi Rèngu.c4 Rèngu aa'i-aa'i bisa ladhe rèdhi rèhu Ama Lamatua. Ètu katangarèi dhèu se'e, dhu suri ngara Lamatua. 5 Mèda abhu boe ètu kota ne'e. De dhèu unu Lamatua parluu boe madha lod'o, do labhu, lula Ama Lamatua ka dhu pasaraa kota ne. Bèli-camèd'a rèngu sama-sama rèd'u paredha toke d'ai mia-mia la'e.d
Lamatua Yesus katange lii padhadha Na
6 Ka ana pajuu ne peka dènge ja'a, na, “Aa'i-aa'i dhu ja'a peka kore dènge èu se'e, lèke tare'a-re'a. Dhèu aa'i-aa'i bisa parcaya lii ja'a se. Uru èèna, Ama Lamatua pake Roh Na ho peka-padhai Lii Holo-Nori Na mi dhèu rèti lii padhai Na. Te ngaa limuri ne, Na pake ana pajuu Na nèti sorga ho lole mi dhèu unu Na, lula-nèti j'ara aa'i-aa'i se dhu nèbhu heka hud'i j'aj'i ku.”
7 Hèia Yesus padhai lii, peka na, “Sanèd'e paie-iie! Nèbhu heka, te Ja'a neo mai. Ètu d'ara sasuri ne, dhu suri aa'i mèu-mèu le, ngaa dhu bèli-camèd'a j'aj'i. Dhèu aa'i-aa'i dhu madhutu isi sasuri ne, pe rèngu abhu a'oto.”
8 Dhu suri sasuri ne, nuka ja'a, Yohanis. Aa'i-aa'i se ja'a nanene dènge ro'a dhilu ja'a, aa kèdhi dènge musi madha ja'a. Ropa tadèngi kore, hèia ja'a patitu kètu urutuu ho pahaha iisi ètu madha ana pajuu nèti sorga ne, dhu pad'elo le aa'i-aa'i se mi ja'a. 9 Te ngaa na kai ja'a, peka na, “Ee! Èu baku tao sèmi èèna! Èu dhodhoka pahaha iisi mi Ama Lamatua di! Baku mi ja'a ne. Te ja'a ne ènu Lamatua kahèi, èci èèna ka dènge èu dènge a'ari èu dhu j'aj'i dhèu rèti lii padhai Na, aa dènge dhèu leo aa'i-aa'i ra dhu tao madhutu ngaa dhu suri ètu d'ara sasuri ne'e.
10 Èu baku pahuni isi sasuri ne dènge dhèu leo. Te nèbhu heka, aa'i-aa'i dhu suri ètu d'ara sasuri ne, hud'i j'aj'i ku.
11 Dhèu aa'i-aa'i dhu ad'u-ue bhabhelu, na,
hud'i rèngu sène ra tao kaj'alu taruu.
Te ngaa aa'i-aa'i dhu mamuri mola-mèci,
hud'i laa ra mamuri mola taruu.
Dhèu aa'i-aa'i dhu tao karehe,
hud'i rèngu sène ra tao bhelu taruu.
Te ngaa aa'i-aa'i dhu tao be'a,
hud'i laa ra tao taruu dhu be'a.”e
12 Èle èèna ka, Yesus lii hari, aku Nèngu na, “Sanèd'e paie! Te nèbhu heka, Ja'a dhiu. Pe Ja'a b'ala hia dhèu aa'i-aa'i, madhutu ngaa dhu ra ad'u-ue.f
13 Ja'a ne,
Alpa toke Omega.
Ja'a ne,
A toke Z.
Aa'i-aa'i j'aj'aj'i ra nèti Ja'a,
karèi nèti uru, toke d'ai èle.g
14 Dhèu dhu rase pamèu le mèdha-papake ra, rèngu ka dhu oto.
Te rèngu ka abhu hak ho maso re babèdho kapai dhu la'e asa d'ara kota ne.
Dhèu dhu mamuri mola, rèngu ka dhu oto.
Te bèli-camèd'a rèngu abhu ijin ho ra'a hua dhu hia dhèu mamuri taa-taa.h
15 Te ngaa dhèu leo bisa boe maso asa era èèna.
Dhèu dhu unu boe Lamatua, bisa boe pea ètu era èèna.
Nuka rèngu dhu parcaya boe Lamatua,i
dhèu dhu tao j'ara makae dènge dhèu dhu j'aj'i boe dhèu èmu-kamali ra, tuka sogo-tagu,
tuka pamadhe dhèu, tuka suagi,
dènge rèngu dhu leko-monya.
Rèngu aa'i-aa'i ra bisa boe ara asa d'ara.
Rèngu aa'i-aa'i ra pea dhoka mi li'u di.
16 Ja'a ne, Yesus. Ja'a ka dhu paleha ana pajuu Ja'a nèti sorga, ho bhoke j'ara se'e aa'i-aa'i ra, sèna ka pe miu lami lole peka lii pajaji Ja'a se'e mi pidhu juma'at sèra.
Ja'a ne, ana-èpu dhèu aae Daud.
Ja'a ne, Dhèu Aae dhu kèd'u paredha.
Saraa nèti Ja'a heo lo'a-lo'a,
nuka sèmi Hua-hètu Oe Mèu.
Saraa nèti Ja'a madèka titu kèna,
nuka sèmi hua-hètu èèna.”j
17 Roh Ama Lamatua mai paroa, peka na, “Mai asa ne'e!”
Bhèni dhu neo kab'i paroa kahèi, peka na, “Mai ka!”
Aa'i-aa'i dhu tadèngi peka kahèi, “Mai ka!”
Dhèu cee dhu koko-kamango, mai ho minu!
Dhèu cee dhu neo ninu èi dhu nèti mamuri,
mai mere ka!
Dhèu bisa rare èi ne
dhu iia-iia d'ara.
Dhèu bisa rinu èi ne
dhu b'ae boe.”k
Lii moa Yohanis dhu limuri tèka
18 Ja'a, Yohanis, pasanèd'e dhèu aa'i-aa'i dhu èèna na tadèngi ngaa dhu Ama Lamatua bhoke mema hia ja'a ètu d'ara sasuri ne: ladhe abhu dhèu dhu patabha hari ngaa-ngaa ètu d'ara sasuri ne, èèna na Ama Lamatua pabie hari hahuku Na mi nèngu dènge pidhu calaka sèra dhu Na dutu mai asa rai-haha. 19 Aa ladhe abhu dhu pakura hari isi sasuri ne, pe Ama Lamatua tao eele hak nèngu, sèna ka bisa boe maso asa d'ara kota dhu mola-mèci, aa bisa boe na'a hua aj'u dhu hia dhèu mamuri taa-taa.l
20 Yesus mesa Na ka dhu bhoke j'ara aa'i-aa'i sèra. Na moa le, peka na, “Tare'a-re'a sèmi èèna! Nèbhu heka, Ja'a neo dhiu.”
De mai ka, Lamatua Yesus!
21 Ja'a manèngi sèna ka Lamatua Yesus pad'elo d'ara hua iia Na mi dhèu unu Na aa'i-aa'i. Lèke tare'a sèmi èèna! Amin!
Nèti ja'a,
Yohanis