Dhèu ae-ae sod'a ètu sorga
19
Ropa ana pajuu ne padhai lii nare, ka ja'a tadèngi lii dhèu ae-ae sod'a ètu sorga. Ra sod'a, peka na,“Haleluya! Haleluya!
Èdhi koa-kio Ama Lamatua èdhi,
lula Nèngu ka dhu dedha risi eele.
Haleluya! Haleluya!
Èdhi koa-kio Ama Lamatua èdhi,
lula Nèngu ka dhu koasa kapai risi.
Lamatua ka dhu patabuli èdhi,
nèti koasa sasala-sasigo èdhi.
Lamatua ka dhu pamèci èdhi,
nèti sasala-sasala èdhi.
2 Èdhi koa-kio Ama Lamatua,
lula Nèngu ka dhu pama'ète lii langu dènge mola.
Èdhi koa-kio Ama Lamatua,
lula Nèngu ka dhu hia hahuku dhu lèke.
Lamatua dhu huku le bhèni kajeo èèna,
lula nèngu ka dhu dadugu dhèu ètu rai-haha,
sèna ka madhutu tao j'ara makae sama-sama dènge ne,
aa madhutu bhabhelu na.
Lamatua b'ala le bhèni aapa èèna,
lula nèngu loe boe pamadhe
ana pua-paleha Lamatua.”a
3 Èle èèna ka, ra sod'a lii sod'a leo hari ètu sorga, peka na,
“Haleluya! Koa-kio Lamatua!
Haleluya! J'oka padedha-dedha kolongara Na!
Lula sèb'u ai dhu tunu pakèpu ngi'u aae bhèni èèna,
ca'e taruu dhu loe boe ciki sa.
Aa sèb'u nèti ai dhu tunu eele kota kapai èèna,
ca'e taruu dhu loe boe ciki sa.”b
4 Hèia dua nguru èpa katua, dènge badha aae èpa ngi'u sèra, patitu kètu urutuu, ho pahaha iisi mi Ama Lamatua dhu madhèdi ètu dedha kadera paredha Na. Ra pakab'ua Ne, peka na,
“Tare'a sèmi èèna! Mai ti koa-kio kolongara Ama Lamatua!
Haleluya! Mai ti j'oka padedha-dedha kolongara Na!”
Pesta kab'i Ana Kalèbho
5 Hèia ja'a tadèngi hari lii èci dhu mai nèti kadera paredha èèna, peka na,
“He, miu aa'i-aa'i mi dhu j'aj'i le ana pua-paleha Ama Lamatua!
He, miu aa'i-aa'i mi dhu j'aj'i le ana-ana Ama Lamatua!
Mai sèna ka ti j'oka padedha-dedha kolongara Ama Lamatua.
Mai aa'i-aa'i, ana iiki-dhèu kapai, koa-kio Ne.”c
6 Hèia ja'a tadèngi oe sèmi dhèu ae-ae dhu padhai lii. Lii ra mèdhu nuka sèmi lii èi dhu hae nèti kolo ledhe, aa dou sèmi lii d'oro, ra peka na,
“Haleluya! Ji'i koa-kio Ama Lamatua.
Haleluya! Ji'i j'oka padedha-dedha kolongara Na.
Lula Nèngu ka dhu koasa kapai risi.
Aa Nèngu ka dhu paredha aa'i-aa'i.d
7 Limuri ne, d'ara èdhi karej'e le.
Limuri ne, d'ara èdhi kea rae-rae.
Èdhi koa-kio Ne.
Lula d'ai le lod'o kab'i Ana Kalèbho kèna.
Èdhi j'oka padedha-dedha kolongara Na,
lula bhèni dhu neo j'aj'i dhèu èmu Ana Kalèbho, dhu pa'èra le.
8 Ama Lamatua hia ne kodho kab'i na nèti bèla alus.
Ama Lamatua pangèd'u na mèdha-papake dhu pudhi kale'e.”
(Mèdha-papake dhu pudhi kale'e èèna, sasoa na, tatao dhu be'a nèti dhèu unu Ama Lamatua.)
9 Ka ana pajuu nèti sorga èèna, peka dènge ja'a, na, “Yohanis! Èu hud'i suri more ku, sèmi ne'e:
‘Dhèu aa'i-aa'i dhu abhu nèru ho mai asa pesta kab'i Ana Kalèbho ne, rèngu oto tare'a-re'a!”’
Hèia na peka hari dènge ja'a, “Lii Holo-Nori Ama Lamatua ne, lèke tare'a-re'a!”e
10 Ka ja'a patitu kètu urutuu ho neo pahaha iisi mi ana pajuu ne. Te ngaa na kai, peka na, “Èu baku tao sèmi ne'e! Te ja'a ne ènu Ama Lamatua, èci èèna dènge èu ne, aa sama sèmi a'ari èu dhu lasi peka-padhai lii aj'a-nori Yesus. Te dhèu rèti lii padhai Ama Lamatua peka-padhai lula-nèti Yesus kahèi, sèna ka dhèu pahaha iisi mi Nèngu. Te naneo Roh Ama Lamatua sèmi èèna. De baku pahaha iisi mi ja'a ne. Te ngaa pahaha iisi dhoka mi Ama Lamatua di.”
Lamatua Yesus mai manya'e jara pudhi
11 Hèia ja'a doa kètu, ka ladhe kèdhi babèdho sorga dhu bhoke tèke. Cag'ag'a laa, ja'a kèdhi jara pudhi ci'u kalua mai. Dhèu dhu manya'e na, ngara na “Dhèu dhu kèpe pa'èra lii pajaji” aa “Dhèu dhu Mola.” Lod'o Na parisa lii langu, Na pama'ète dènge mola. Ladhe Nèngu la'e pamusu, la'e dènge d'ara mola.f 12 Musi madha Na heo sama sèmi ai. Na pake solo dhèu aae dhu ae, ètu kètu Na. Ngara Na dhu suri ètu ngi'u Na, te ngaa Nèngu mesa Na di, dhu ne'a sasoa ngara èèna.g 13 Mèdha-papake Na, dhu cèb'u le asa d'ara raa. Dhèu paroa Ne, “Lii Holo-Nori Ama Lamatua”. 14 Ja'a kèdhi kahèi sordad'u-sordad'u nèti sorga dhu manya'e jara pudhi, dhu madhutu Ne. Sordad'u se pake mèdha alus dhu pudhi mèu kahèi. 15 Abhu samala èci dhu madèka, kalua nèti d'ara hèb'a Na. Na pake samala ne, ho la'e pamusu, lab'a suku aa'i-aa'i ètu rai-haha. Hèia Na segi si. Ka Na j'aj'i Dhèu Aae rèngu. Na paredha si dènge ai bèsi, toke rèngu re'a nanasa Lamatua dhu koasa kapai risi. J'ara ne'e ne, sama sèmi dhèu j'èli marèu hua anggor, ho pacèli rare èi na.h
16 Aa ètu kodho dènge ètu haree Na, dhu suri sèmi ne'e:
Dhèu Aae nèti dhèu aae aa'i-aa'i ra,
Lamatua nèti lamatua aa'i-aa'i ra.
Lamatua Yesus segi badha bhelu dènge sordad'u na sèra
17 Ka ja'a ladhe kèdhi ana pajuu ca dhèu nèti sorga dhu titu ètu dedha madha lod'o. Hèia na rodhe manu-bhui aa'i-aa'i dhu lela re talora liru, peka na, “Mai aa'i-aa'i mi pakaboko mi era ne'e, ho mi'a pesta kapai dhu Ama Lamatua tao! 18 Sisi dhèu madhe aa'i-aa'i ra, miu bisa mi'a. Nuka sisi nèti: dhèu aae-dhèu aae, komedhaa, dènge sordad'u sèra. Miu mi'a kahèi sisi jara dènge sisi sordad'u dhu manya'e si. Miu mi'a kahèi sisi ènu-ènu, do dhèu mardeka, do ana iiki-dhèu kapai. Peka ka laa, ngara na ngaa dhu dènge sisi, mi'e si.”i
19 Hèia ja'a kèdhi badha bhelu dhu uru èèna bodho nèti d'ara dhasi. La'e pane'a lii dènge dhèu aae aa'i-aa'i ètu rai-haha, dènge sordad'u ra. Ka lasi pamusu, lab'a Dhèu dhu manya'e jara pudhi èèna, dènge sordad'u dhu palere-lere dènge Ne nèti sorga. 20 Te ngaa Dhèu manya'e jara pudhi ne, kèpe nare badha bhelu dènge dhèu nèti lii padhai na dhu kapod'e-kabèli sèra. Dhèu dhu nèti padhai lii na, nuka dhèu dhu tao tadha malaa rupa-rupa ho leko-monya dhèu, dhu ra sèmi rare cap nèti badha bhelu ne, aa sogo-tagu mèdha sogo-tagu na. Te ngaa limuri ne, Dhèu dhu manya'e jara pudhi ne, pèci eele le badha bhelu dènge dhèu dhu nèti lii padhai na, asa d'ara dhasi ai èi nasu dhu heo na madhe boe.j 21 Èle èèna ka, Dhèu dhu manya'e jara pudhi ne, la'e pamadhe aa'i sordad'u dhu leo sèra, pake dènge samala dhu kalua nèti d'ara hèb'a Na. Hèia manu-bhui dhu ra'a sisi hèu, mai ra'e aa'i ngi'u aae dhèu madhe sèra.