Ana pajuu Ama Lamatua lole gaguri kota Babel
18
Hèia ja'a ladhe kèdhi ana pajuu dhu leo ca dhèu, mai nèti sorga. Nèngu ne dhu dènge koasa aa saraa dhu kapai, ho pasaraa palème rai-haha. 2 Dènge lii aae, na peka,“Laho le! Laho le! Kota Babel laho mae-mae le!
Guri le! Guri le! Kota kapai ne, guri dolu-dolu le!
Nèngu j'aj'i le era pea nidhu.
Nèngu j'aj'i le rai èta-èsu roh bhelu-katub'a aa'i-aa'i.
Nèngu j'aj'i le era pakaboko nèti manu-bhui aa'i-aa'i dhu ra'a sisi hèu.
Nèngu j'aj'i le oka nèti badha aa'i-aa'i dhu dhèu madenge.a
3 Nèngu guri le, lula suku aa'i-aa'i ètu rai-haha ne,
loe boe mai rinu mahu èi anggor na.
Nèngu laho le, lula udhu-rasa aa'i-aa'i ètu rai-haha ne,
loe boe mai ad'u-ue j'ara makae dènge ana kabarai kota ne.
Dhèu aae-dhèu aae nèti negara aa'i-aa'i,
mai j'unu pa'èci ètu èèna.
Dhèu d'aga nèti kota aa'i-aa'i,
mai pahia toke rèngu j'aj'i kaja.
Lula kota ne nuka sèmi dhèu bhèni dhu d'èi hèli mèdha dhu kab'ua aae.
Lula kota ne sama sèmi bhèni kajeo dhu d'èi dhoka tenge ngaa-ngaa dhu hua iia di.”b
4 Hèia ja'a tadèngi hari lii leo èci, paroa nèti dedha-liru, peka na,
“Wee! Dhèu Ja'a aa'i-aa'i!
Rai eele ka era èèna!
Tèke eele ka kota èèna!
Baku tao madhutu bhabhelu ana kabarai kota ne,
sèna ka baku lèke hahuku ra kahèi.c
5 Lula bhabhelu ra,
ae seli eele.
Aa sasala ra,
tanga-tanga d'ai dedha-liru.
Limuri ne Ama Lamatua bhèlu heka,
j'ara mamuri ra dhu bhelu-katub'a èèna.
Limuri ne Ama Lamatua dhu pa'èra le,
ho neo huku si.d
6 De miu hud'i b'ala ku bhabhelu ra,
sama sèmi rèngu tao le bhabhelu mi dhèu leo.
Te ngaa miu hud'i b'ala si,
toke d'ai babia na dua-dua hari.
Uru èèna, rèngu tipu le dhèu,
ho rinu nèti d'ara cangkir hualaa ra, dhu pènu dènge èi anggor j'aj'èra.
Te ngaa limuri ne rèngu mesa ra hud'i rinu ku
anggor j'aj'èra èèna, toke dua-dua hari.e
7 Rèngu se tao ngi'u ra kapai.
Aa ra padedha-dedha ngi'u unu ra.
Rèngu d'èi dhoka mamuri karej'e-karae di.
Rèngu d'èi dhoka dhu be'a-be'a di.
Nèti èèna ka, rèngu hud'i abhu ku sasusa dhu bia.
De rèngu hud'i mamuri j'èra bia ku.
Te uru èèna, ra padhai lii padedha iisi sama sèmi bhèni kajeo, peka na,
‘Ja'a ne, ina bhèni aae!
Ja'a ne, èèna na j'aj'i boe bhèni balu!
Ja'a èèna na roma iisi boe.
Ja'a èèna na silu boe mèdha balu dhèu madhe.’
8 Ra padhai lii sèmi èèna, toke Ama Lamatua nasa le dènge ra.
Ka Ama Lamatua neo huku si.
Èèna na, d'ara ca lod'o di,
rèngu manganga titu kèna,
rèngu tangi roma iisi,
aa ra madhe aapa.
Toke dhèu core eele si asa d'ara ai.
Toke ai na'e pakèpu ngi'u aae si.
Te Lamatua dhu koasa kapai risi, ka dhu papuru huku ne.
Aa Lamatua dhu èra risi eele, dhu pama'ète lii langu ne.f
9 Dhèu aae-dhèu aae uru sa,
mai j'unu pa'èci dènge ana kabarai kota ne,
aa mamuri karej'e-karae ètu èèna.
Pe ladhe rèdhi sèb'u dhu ca'e nèti d'ara ai,
pe re'a, na, kota ne dhu ai na'e aa'i le.
Ka ra tangi ne dènge d'ara pèd'a.
10 Ka ra mangingi, ladhe j'aj'èra dhèu sèra.
Te ngaa ra bani dhoka titu ètu kaj'èu di.
Aa rèngu bani dhoka laladhe nèti nèi di.
Hèia ra padhai lii, peka na,
‘Ira ii! Kasian èu Babel!
Ira ii! Kasian kota kapai!
Te dhoka d'ara ca jam di, èu abhu huku le.
Te dhoka d'ara ciki oo'e di, èu laho le.’g
11 Tadèngi sèmi èèna, dhèu-dhèu dhu uru sèra, mai nèti mia-mia ho d'aga ètu èèna,
rèngu tangi roma iisi kahèi.
Te abhu boe ca dhèu sa,
dhu neo lasi hèli mèdha d'aga ra.h
12 Abhu heka dhu neo lasi hèli
mèdha ra dhu tao nèti hualaa, doi pudhi,
hadhu kale'e, do mutiara.
Abhu heka dhu neo lasi hèli
bèla lenan, do bèla sutra rèngu,
do bèla alus dhu leo, dhu mea oe sèmi mangèru sa.
Abhu heka dhu neo lasi hèli
mèdha ra dhu tao nèti aj'u hèu mèngi, aa mèdha dhu d'ule nèti èli gajah,
do aj'u dhu d'ule dhu leo sèra.
Abhu heka dhu neo lasi hèli
mèdha ra dhu tao nèti tabaga, bèsi, do hadhu marmar.
13 Abhu heka dhu neo lasi hèli
kayu manis, do bubhu lara dhu leo sèra.
Abhu heka dhu neo lasi hèli
raa aj'u hèu mèngi ra, do èi hèu mèngi dhu leo sèra.
Abhu heka dhu neo lasi hèli
èi anggor ra, èi mènyi saitun ra,
tarigu, do are-gandum ra.
Abhu heka dhu neo lasi hèli
sapi ra, kahib'i-kalèbho ra, do jara ra.
Abhu heka dhu neo lasi hèli
kareta mèdha ra,
do ènu ra sèra.i
14 Èèna na dhèu d'aga sèra manyasa, ka ra peka na,
‘Ira ii, Babel, ee!
Ira ii, kota kapai, ee!
Mèdha-panyau èu dhu hua iia sèra, dhu kabarai èu d'èi risi,
aad'o heka èci sa.
Aa'i-aa'i ra ela aa'i mèu-mèu, toke kabarai èu dènge boe ngaa-ngaa,
toke rod'o kakara d'ai rai.’
15 Uru èèna, dhèu d'aga se j'aj'i kaja, lula kota ne dhu nuka sèmi bhèni kajeo.
Te ngaa limuri ne, ra loe boe manyasa.
Rèngu j'aj'i madha'u titu kèna,
laladhe j'aj'èra ana kabarai kota ne.
Rèngu j'aj'i mangingi titu kèna,
laladhe hahuku ra.
Te ngaa rèngu dhoka bani laladhe nèti kaj'èu di.
Rèngu bani dhoka titu nèti era nèi di.
16 Hèia ra padhai lii, peka na,
‘Ira ii! Kasian èu Babel, ee!
Ira ii! Kasian kota kapai, ee!j
Uru èèna, ana kabarai èu pake mèdha bèla alus, dhu mea oe sèmi mangèru sa,
nèti bèla dhu kab'ua titu kèna.
Uru èèna, ana kabarai èu d'èi panèu mèdha hualaa, mutiara,
dènge hadhu kale'e dhu kab'ua titu kèna.
17 Te ngaa d'ara ca jam di,
mèdha-panyau èu sèra èla aa'i mèu-mèu si.
Dhodhoka d'ara ciki oo'e èèna di,
kakaja èu saku hani-hani!’
Uru èèna juraga kapa, dènge mataroo sèra,
kako lasi-mai nèti kota èèna.
Te ngaa limuri ne, rèngu bani dhodhoka panahu nèti kaj'èu di.
Te ngaa limuri ne rèngu bani dhoka laladhe nèti nèi di.k
18 Rèngu ladhe sèb'u kalua nèti d'ara ai èèna.
Ka re'a, na, ai na'e aa'i le.
Hèia ra manyasa, ka peka na,
‘Ira ii, kasian! Abhu heka kota leo
dhu kapai sèmi kota Babel ne.
Aduu, kasian! Abhu heka kota dhu leo,
dhu babe'a na sama sèmi nèngu ne.’l
19 Rèngu soke ahu ho ceb'e mi kètu ra,
lula d'ara ra susa.
Rèngu tangi d'ara pèd'a,
lula d'ara ra laho mae-mae.
Ka ra peka na,
‘Ira ii! Kasian èu Babel, ee!
Ira ii! Kasian kota kapai!
Ji'i dènge kapa la'a-mai ngèti mèdha hia kabarai èu,
toke ji'i d'ai kaja-su'i kahèi.
Ji'i hua ngèti le mèdha kabarai èu,
toke ji'i mamuri hua iia kahèi.
Te ngaa dhoka d'ara ca jam di,
aa'i-aa'i se saku hani-hani.
Te ngaa dhoka ètu d'ara ciki oo'e di,
laho aa'i si mèu-mèu.’m
20 Hèia ja'a tadèngi lii aae èci peka tabha hari, sèmi ne'e ka:
‘He, miu dhu mamuri ètu sorga!
miu parluu heka d'ara pèd'a.
He, miu dhu j'aj'i le dhèu unu Lamatua!
D'ara miu parluu heka susa.
Miu dhu j'aj'i le dhèu pajuu-paleha Lamatua,
hud'i laa d'ara miu karae.
Miu dhu j'aj'i le dhèu rèti lii padhai Lamatua,
hud'i laa d'ara miu maho'o.
Uru èèna, Babel pasusa le miu.
Uru èèna, kabarai kota ne paj'èra miu.
Te ngaa limuri ne Lamatua pama'ète le lii langu miu dènge mola.
Te limuri ne Na b'ala le bhabhelu-katub'a kabarai kota èèna.”’n
21 Ka ja'a ladhe kèdhi ana pajuu èci nèti sorga dhu èra titu kèna. Na mai ded'e nare hadhu aae cue, dhu kapai na sange dhèu èci. Hèia na pèci hadhu ne asa d'ara dhasi. Ka na peka,
“Pe ra palaho eele Babel sèmi èèna kahèi.
Pe ra pa'ele kota kapai èèna, sèmi èèna kahèi.o
22 Abhu heka ca dhèu sa,
dhu karihu musiik ètu d'ara kota èèna.
Abhu heka dhèu,
dhu tadèngi lii gai sasadhu, tiu sakino,
aa lii tiu tèbhe ètu d'ara kota èèna.
Abhu heka tuka èci sa,
dhu sab'a ètu d'ara sab'a-la'a ra.
Abhu heka dhèu,
dhu gili are ètu kota èèna.p
23 Abhu heka dhèu,
dhu paheo labhu ètu d'ara kota èèna.
Abhu heka dhèu,
dhu tao pesta kab'i ètu èèna.
Uru èèna, ètu kota ne, dhèu pahia-pahèli mèdha ra,
toke j'aj'i kaja-su'i.
Uru èèna, dhèu d'aga ètu Babel,
mamuri hua iia.
Te ngaa rèngu pake na'i nidhu,
ho leko-monya dhèu ètu rai-haha.
Rèngu pake seher,
ho kapod'e-kabèli dhèu ètu rai-haha.q
24 Babel abhu le huku dhu bia,
lula kabarai na loe boe pamadhe dhèu rèti lii padhai Lamatua.
Kota kapai ne laho le,
lula kabarai na paj'èra toke madhe dhèu unu Lamatua.
Abhu kahèi dhèu-dhèu Lamatua dhu ra pamadhe ètu era-era leo.
Te ngaa Babel ka dhu hud'i dui nare sasala sèra.
Kota kapai èèna ka dhu hud'i tago nare aa'i.”r