3 Èle èèna ka, Roh Ama Lamatua maso asa ja'a, hèia ana pajuu nèti sorga ded'e nèti ja'a asa d'ara mamoo èci. D'ai nèi, ja'a ladhe kèdhi dhèu bhèni ca dhèu dhu madhèdi ètu dedha kabodho badha bhelu mea ci'u. Kètu badha ne pidhu, dènge tadhu na canguru. Palème ètu ngi'u na dhu suri lii-lii dhu pakarehe Ama Lamatua.^c 4 Bhèni ne pake bèla manii mea dènge mea sanama mangèru. Na pagaa ngi'u na dènge nèu mèdha hualaa, hadhu kale'e dhu kab'ua, dènge mutiara. Ètu ai g'ana na, nèd'u dènge cangkir hualaa èci dhu pènu dènge èi anggor. Anggor ne, sasoa na, j'ara makae, aa bhabhelu dènge tatao kaj'alu aa'i-aa'i dhu leo, dhu na ad'u-ue.^d 5 Ètu katangarèi na, dhu suri ngara èci, dhu dhèu re'a boe. Lii dhu ra suri èèna, sèmi ne'e ka:

6 Ja'a laladhe, na, bhèni ne dhu mahu bia, lula nèngu dhu ninu le raa dhèu unu Ama Lamatua sèra. Sasoa na, na pamadhe le dhèu unu Ama Lamatua, lula rèngu loe boe peka j'ara mamuri Yesus.

Ropa ja'a kèdhi tatao bhèni ne sèmi èèna, hèia hèb'a ja'a nganga-nganga sène, lula malaa bia.

7 Hèia ana pajuu ne karèi ja'a, peka na, “Nga tao ka èu naa-naa, aa malaa sèmi èèna? Mai ho ja'a peka dènge èu sasoa na nèti bhèni kajeo ne. Sèmi èèna kahèi, dènge sasoa nèti badha bhelu dhu nèngu manya'e èèna. Badha ne'e ka dhu kètu pidhu dènge tadhu canguru. 8 Uru èèna, badha bhelu ne dhu mamuri le ètu rai-haha, te ngaa limuri ne aad'o heka. Te ngaa nèbhu heka, na kalua hari mai nèti ro'a j'aj'èra dhu dènge boe too-lane èèna. Lod'o èèna, abhu dhèu dhu mamuri ètu rai-haha, dhu ngara ra dhae suri mèka ètu d'ara Sasuri Ana Kalèbho, dhu Ama Lamatua suri tèke le karèi uru ka, nèti Na paj'aj'i rai-haha ne. Bèli-camèd'a, dhèu se'e se malaa-maloha, lula rèdhi badha bhelu ne lèpa hari mai. Te ngaa ladhe na mai hari, pe Ama Lamatua pèci ne asa d'ara dhasi ai èi nasu dhu heo na taa-taa.^e

9 Dhèu cee dhu d'èlu-mèu, na, nèngu bisa ne'a sasoa j'ara se'e. Badha bhelu dhu kètu pidhu, sasoa na, nuka ledhe pidhu bua. Bhèni kajeo èèna, dhu madhèdi ètu dedha ledhe sèra. Aa sasoa nèti kètu pidhu sèra, nuka dhèu aae dhèu pidhu. 10 Lèmi nèti dhèu aae pidhu se, madhe le. Ca dhèu dhu nèd'u paredha limuri ne. Aa ca dhèu hari dhae mai mèka. Te ngaa ladhe mai, nèngu nèd'u paredha nèbhu boe. 11 Ne'e ne ja'a lole dènge èu, nèti badha bhelu dhu uru èèna mamuri, te ngaa limuri ne madhe le. Lod'o èèna, nèngu ne ca dhèu nèti pidhu dhèu aae sèra, te ngaa èèna na mai hari nèd'u paredha, ho j'aj'i dhèu aae ka aru. Pe na laho mae-mae kahèi.

12 Canguru tadhu se, sasoa na, nuka canguru dhèu aae. Rèngu se dhae rèd'u mèka paredha. Bèli-camèd'a rèngu abhu koasa, ho rèd'u paredha sama-sama dènge badha bhelu ne, te ngaa dhoka ciki-diki di.^{f g} 13 Te rare lii èci, ho pangèd'u koasa ra mi badha bhelu èèna. 14 Dhèu aae sèra, bèli-camèd'a lasi pamusu, lab'a Ana Kalèbho. Te ngaa Ana Kalèbho dènge dhèu unu Na segi aa'i si. Dhèu-dhèu dhu madhutu Ana Kalèbho ne, nuka rèngu dhu Na hag'e nare le, aa Na paroa si ho madhutu Ne taa-taa. Pe rèngu segi, lula Ana Kalèbho ne èra titu kèna. Dhodhoka Nèngu di dhu j'aj'i Dhèu Aae nèti dhèu aae aa'i-aa'i ra, aa Lamatua nèti lamatua aa'i-aa'i ra.

15 Aa èi ae-ae dhu padètu dènge bhèni kajeo ne, nuka dhèu-dhèu nèti suku aa'i-aa'i, nèti udhu-rasa aa'i-aa'i, aa dènge dhèu ae-ae nèti lii aa'i-aa'i ètu rai-haha. 16 Canguru dhèu aae dènge badha bhelu se, èèna na ra tèka d'ara dènge bhèni kajeo dhu ne'a boe makae ne. Èèna na parame rare mèdha-papake dènge mèdha-panyau na aa'i-aa'i, ka tèke eele ne dènge boe mèdha-papake ètu ua na. Èle èèna ka, ra'e sisi bhèni ne kahèi. Aa ngi'u na dhu ate, core asa d'ara ai. 17 Ama Lamatua mesa Na ka dhu tao, toke canguru dhèu aae se rare lii èci, ho pangèd'u koasa ra mi badha bhelu ne, toke na palaho bhèni ne. Dènge j'ara ne'e, ngaa dhu Ama Lamatua neo ad'u-ue, bèli-camèd'a aa'i-aa'i ra j'aj'i.

18 Bhèni kajeo dhu èu mèdhi èèna, nuka dhèu aae-dhèu kapai nèti kota kapai dhu paredha dhèu aae aa'i-aa'i ètu rai-haha.”