Nanasa Ama Lamatua bhori mai asa rai-haha
16
Hèia ja'a tadèngi lii parodha èci kalua nèti d'ara Èmu Manèngi-Mangaj'i, ho peka dènge ana pajuu dhèu pidhu se, na, “Lami ka! Nedhe mèti ka bokor se'e, ho bhori ka nanasa Lamatua asa rai-haha.”2 Ropa tadèngi rare, hèia ana pajuu ka èci la'e bhori isi bokor na asa rai-haha. Kaca'a laa, papèd'a-tarègu lèke dènge dhèu aa'i-aa'i dhu uru sèra abhu cap nèti badha bhelu, dènge dhèu-dhèu dhu sogo-tagu mèdha sogo-tagu na. Rèngu se lèke èi papèd'a hisu huu dhu rarii titu kèna.a
3 Èle èèna ka, ana pajuu ka dua la'e bhori isi bokor na asa d'ara dhasi. Kaca'a laa, èi ètu d'ara dhasi j'aj'i raa dhu hèu mau, cakaraa hèu raa dhèu madhe. Ka aa'i-aa'i dhu mamuri ètu d'ara dhasi madhe aa'i si.
4 Hèia ana pajuu ka tèlu la'e bhori isi bokor na asa d'ara loko dènge madha èi. Ka èi aa'i-aa'i ra j'aj'i raa.b 5 Hèia ja'a tadèngi ana pajuu ca dhèu nèti sorga, dhu uri èi aa'i-aa'i ètu rai-haha ne. Na koa-kio Ama Lamatua, peka na,
“Oo Lamatua!
Lamatua dhu mola-mèci!
Lamatua dhu sala nèdhi boe!
Lamatua mema-mema karèi nèti uru ka.
Aa Lamatua taa-taa toke d'ai mia-mia.
Lamatua pama'ète lii langu dhu mola isi pupu.
Lamatua hia le huku dhu kasii-kasore boe.
6 Dhèu-dhèu pasuti le,
raa nèti dhèu unu Lamatua.
Dhèu-dhèu pamadhe le,
dhèu rèti lii padhai Lamatua.
Nèti èèna ka, Lamatua laka-seti si, ho rinu raa kahèi.
Nèti èèna ka, Lamatua b'ala si, dènge huku dhu lèke.”
7 Èle ka, ja'a tadèngi lii èci kalua nèti mei sogo-tagu, peka na,
“Tare'a! Ama Lamatua dhu koasa kapai risi eele.
Tare'a! Ama Lamatua dhu èra risi aa'i.
Lamatua dhu pama'ète lii langu dhu koe boe kapengo boe.
Lamatua dhu pamanahu huku dhu lèke mola-mola.”
8 Hèia ana pajuu ka èpa la'e bhori isi bokor na asa madha lod'o. Kaca'a laa, lod'o pana titu kèna, ka dhèu ètu rai-haha ne kèpu-ladhu ai. 9 Dhèu aa'i-aa'i dhu lèke tunu se, dhoo kolongara Ama Lamatua, lula Nèngu ka dhu papuru calaka ne hia mai asa rèngu. Masi ka sèmi èèna, te ngaa abhu boe ca dhèu sa dhu ele-ho'a, ka lèpa asa Lamatua ho koa-kio kolongara Na.
10 Ka ana pajuu ka lèmi la'e bhori isi bokor na asa kadera paredha badha bhelu se. Kaca'a laa, maroga kiu-kiu saguru nare dhèu aa'i-aa'i dhu sogo-tagu ne, toke j'èra titu kèna hèia ra gègu-ria.c 11 Dhèu se'e kahèi dhoo Ama Lamatua ètu sorga, lula hisu ra rarii titu kèna. Masi ka sèmi èèna, te ngaa abhu boe ca dhèu sa dhu ae eele nèti bhabhelu ra, ka lèpa asa Ama Lamatua.
12 Hèia ana pajuu ka èna bhori isi bokor na asa loko aae, dhu ngara na Efrat. Ka loko ne mango-meto dènge ka. Hèia ra tao j'ara ètu d'ara loko ne, hia dhèu aae-dhèu aae dènge sordad'u-sordad'u dhu bèli-camèd'a mai nèti cabèka dhimu.d 13 Ka ja'a ladhe kèdhi nidhu bhelu tèlu. Rupa ra sama sèmi ana gaged'e. Ci'u bhodho nèti d'ara hèb'a mege naga. Ci'u kalua nèti d'ara hèb'a badha bhelu. Aa ci'u hari bhodho nèti hèb'a dhèu kapod'e-kabèli, dhu nèti lii padhai mege naga èèna. 14 Nidhu tèlu se dènge koasa ho tao rupa-rupa tadha malaa. Ra kalua, lasi paraga dènge dhèu aae aa'i-aa'i ètu rai-haha, ka ra pajaji ho ètu d'ara ca lod'o sa lasi pamusu, lab'a Ama Lamatua dhu koasa kapai risi eele èèna. Te ngaa lod'o dhu ra pajaji èèna, lèke dènge lod'o dhu Ama Lamatua hag'e nare le, ho Na segi musu Na aa'i-aa'i ra.
15-16 Era dhu ra pakaboko ho pamusu èèna, lii Ibrani peka na, Armagedon.
Yesus Kristus peka kahèi, na, “Sanèd'e paie-iie! Te kaca'a laa, Ja'a mai nuka sèmi dhèu mana'u, dhu dhèu èci sa re'a boe. Dhèu dhu oto, nuka rèngu dhu beke dènge dhu bori mema dhari. Te ladhe Ja'a mai, nèngu na'e boe makae, lula dhèu rèdhi boe era makae na.”ef
17 Hèia ana pajuu ka pidhu la'e bhori isi bokor na asa madha ngèlu. Ka Ama Lamatua padhai lii mèdhu nèti kadera paredha Na ètu d'ara Èmu Manèngi-Mangaj'i, peka na, “Èle le! Nanasa Ja'a bhori aa'i mèu-mèu le!”
18 Hèia bela heo ha'a-ha'a, dènge d'oro lii gasi-gasi. Aa rai opo dhu kapai titu kèna, dhu j'aj'i nèdhi mèka karèi nèti rai-haha ne j'aj'i.g 19 Lod'o èèna, Ama Lamatua bhèlu boe bhabhelu dhèu ètu kota Babel. Ka Na pake rai opo dhu kapai aae, sèna ka tao kota kapai ne masèke mi tèlu. Ama Lamatua ad'u-ue sèmi èèna, sèna ka dhèu Babel re'a nanasa Na. Kota-kota leo ètu rai-haha ne, laho eele aa'i si kahèi.h 20 Lod'o èèna pulu-pulu cène aa'i si, aa ledhe-ledhe ela aa'i kahèi.i 21 Abhu kahèi èj'i es hadhu dhu kapai, bèbhe nèti dedha-liru, kabhie nare dhèu-dhèu ètu rai-haha. Es hadhu se, babia ra abhu kahèi d'ai èpa nguru kilo.j Lula èj'i es ne dhu paj'èra dhèu, ka ra dhoo Ama Lamatua.k