Ana pajuu dhèu pidhu nèti sorga rèti pidhu calaka kapai asa rai-haha
15
Hèia ja'a ladhe kèdhi tadha èci ètu dedha-liru, dhu kapai titu kèna, toke ja'a malaa bia. Abhu ana pajuu dhèu pidhu nèti sorga, èci-èci ka dènge koasa ra, ho hia calaka kapai asa rai-haha. Pidhu calaka se, nuka j'aj'èra dhu limuri tèka. Ladhe j'ara se aa'i-aa'i ra j'aj'i ka, d'ara Ama Lamatua pacuhi, ka nasa heka dènge dhèu rai-haha.2 Ka ja'a kèdhi dhasi dhu ha'a-ha'a, nuka sèmi tèru dhu pab'ali dènge ai. Ja'a kèdhi kahèi dhèu ae dhu titu ètu sebhe dhasi èèna. Dhèu se'e ka dhu madhutu boe badha bhelu èèna, aa ra sogo-tagu boe mèdha sogo-tagu na, aa dhu sèmi boe cap na hèi. Rèngu aa'i-aa'i dhu kèpe dènge mèdha lii sod'a èci nuka sèmi sasadhu, dhu ra abhu nèti Ama Lamatua. 3 Ka ra sod'a lii sod'a èci dhu Musa suri. Musa ne, ana pua-paleha Ama Lamatua uru-uru sèra. Dhèu se'e se sod'a kahèi lii sod'a èci dhu koa-kio Yesus. Te uru èèna, dhèu pamadhe Ne, sama sèmi dhèu roro pamadhe ana kalèbho ètu d'ara Èmu Kapua Manèngi-Mangaj'i Ama Lamatua, sèna ka pamaringi d'ara Na. Dhèu se sod'a, peka na,a
“Ji'i koa-kio Ama Lamatua!
Ji'i j'oka padedha-dedha kolongara Na!
Lula koasa Lamatua kapai risi eele.
Dènge a'èra Na kapai titu kèna.
Lamatua ka dhu nèd'u le paredha mi suku aa'i-aa'i ètu rai-haha.
Lamatua ka dhu j'aj'i Dhèu Aae mi udhu-rasa aa'i-aa'i ètu rai-haha.
Tatao Lamatua mola sèmi isi pupu.
Sasab'a Lamatua be'a seli eele!
J'ara Lamatua mèu rèd'e-rèd'e.
Mamuri Lamatua lèke mola-mola!b
4 Dhèu aa'i-aa'i ra j'oka padedha-dedha kolongara Lamatua,
Dhèu aa'i-aa'i ra koa-kio babe'a Lamatua.
Lula Lamatua mesa Na dhu mola-mèci.
Aa Lamatua mesa Na di, dènge boe sasala.
Pe suku aa'i-aa'i mai pahaha iisi mi Lamatua.
Pe udhu-rasa aa'i-aa'i mai manèngi makasi mi Lamatua.
Lula dhèu aa'i-aa'i re'a rèdhi le tatao Lamatua dhu be'a.
Aa dhèu aa'i-aa'i re'a le mamola d'ara Lamatua.”c
5 Ropa dhèu se èle sod'a, ja'a kèdhi Kama Luri Mola-Mèci ètu d'ara Èmu Manèngi-Mangaj'i Lamatua ètu sorga, dènge bhèla bhabhiri dhu bhoke pataleo tèke.d 6 Ka ja'a kèdhi ana pajuu dhèu pidhu nèti sorga dhu rèti dènge pidhu calaka sèra. Rèngu kalua mai nèti Èmu Manèngi-Mangaj'i Ama Lamatua. Rèngu pake mèdha-papake dhu kale'e pudhi mèu, aa pake salalu dhu tao nèti poe dènge pai. 7 Hèia ja'a ladhe kèdhi badha aae èci nèti èpa ngi'u sèra ètu sebhe kadera paredha Lamatua, dhu papala pidhu bokor hualaa mi ana pajuu dhèu pidhu sèra. Pidhu bokor se, èci-èci ka dhu isi ra hahuku nèti Ama Lamatua dhu taa-taa toke d'ai mia-mia. Te Na pa'èra le, ho sabhori nanasa Na asa rai-haha. 8 Nèbhu boe, hèia Èmu Manèngi-Mangaj'i ne pènu dènge sèb'u dhu bodho mai nèti dadedha dènge koasa Ama Lamatua. Abhu boe ca dhèu sa dhu bisa maso asa era èèna. Ana pajuu dhèu pidhu se hud'i sabhori pa'èle ku pidhu calaka asa rai-haha ne, heka dhèu bisa maso asa era èèna kèna.e