Ana Kalèbho dènge dhèu Na 144.000 (cangasu èpa nguru èpa riho) dhèu
14
Èle èèna ka, ja'a boti kètu, kaca'a laa, ja'a ladhe kèdhi Ana Kalèbho dhu titu ètu kolo ledhe iiki èci. Ngara na ledhe Sion. Na titu dènge dhèu Na 144.000 (cangasu èpa nguru èpa riho) dhèu. Ètu katangarèi dhèu se'e, dhu suri ngara Ana Kalèbho, dènge ngara Ama Na.a 2 Hèia ja'a tadèngi lii èci nèti dedha-liru. Lii ne kadèru sèmi lii bèbhe naha dhasi kapai, aa dou sèmi lii d'oro. Te ngaa lii ne culi be'a titu kèna, nuka sèmi dhèu ae dhu karihu sasadhu. 3 Ka ja'a kèdhi 144.000 (cangasu èpa nguru èpa riho) dhèu se, dhu titu tangare asa madha Ama Lamatua, dènge badha aae èpa ngi'u dhu reo rare kadera paredha Lamatua, aa dènge katua-katua sèra. Dhèu ae-ae se sod'a lii sod'a hiu èci. Lii sod'a ne, dhodhoka rèngu di dhu re'a, dhèu leo aad'o. Te rèngu dhu pabe'a le dènge Lamatua, lula Lamatua pake raa Ana Na, ho sui si nèti sasala-sasigo ra. 4 Mamuri rèngu mola-mèci le, nuka sèmi mone kalora iisi dhu pa'èci nèdhi mèka dènge dhèu bhèni. Rèngu parai eele boe dènge Ana Kalèbho èèna, sad'i asa era mia èèna ka, lula Ama Lamatua sui le rèngu pake raa Ana Na, sèna ka rèngu j'aj'i dhèu unu Lamatua. Rèngu èci èèna ka dènge hua hela dhu uru tèka nèti d'ara oka hia mi Lamatua dènge Ana Kalèbho. 5 Rèngu dhu re'a boe padhai lii leko-monya, lula d'ara ra mola.bTèlu ana pajuu nèti sorga rèti lii
6 Ka ja'a kèdhi ana pajuu Lamatua ca dhèu hari mai nèti sorga. Ana pajuu ne dhu lela dedha titu kèna, ho rodhe palème Lii Lolo Be'a Lamatua, dhu ma'ète boe ciki sa. Na lela palème era, ho peka dènge dhèu aa'i-aa'i ètu rai-haha, nèti suku aa'i-aa'i, nèti udhu-rasa aa'i-aa'i, nèti lii aa'i-aa'i, dènge negara aa'i-aa'i. 7 Na pa'oo-parodha, peka na,
“Miu hud'i pakab'ua ku Ama Lamatua!
Miu hud'i j'oka padedha-dedha kolongara Na dhu dedha risi eele!
Lula lod'o na d'ai le,
ho Lamatua parisa lii langu dhèu aa'i-aa'i madhutu tatao ra.
Koa-kio Ne!
Ded'e padedha-dedha kolongara Na!
Lula Nèngu ka paj'aj'i liru dènge rai-haha.
Aa nèti paredha Na, ka dhasi dènge madha èi j'aj'i aa'i mèu-mèu.”
8 Ropa padhai lii nare sèmi èèna, hèia ja'a kèdhi hari ana pajuu dhu leo ca dhèu nèti sorga, dhu mai madhutu ana pajuu dhu mai uru èèna. Na lii, aku nèngu na, “Laho eele le! Laho mae-mae le! Kota Babel dhu kapai na, laho le! Kota dhu bhelu èèna, guri eele le pamera dènge rai. Uru èèna, kota ne, nuka sèmi bhèni kajeo dhu laka-seti suku aa'i-aa'i ètu rai-haha ne ho rinu mahu, aa madhutu dad'èi na, ka ad'u-ue j'ara makae. Te ngaa limuri ne kota ne, pasae nare le pala na nèti nanasa Lamatua.”c
9 Hèia ja'a kèdhi hari ana pajuu dhu leo ca dhèu nèti sorga, mai madhutu ana pajuu ka dua deo na. Na pa'oo-parodha, peka na, “Mata unu mi! Dhèu aa'i-aa'i dhu sogo-tagu badha bhelu dènge mèdha sogo-tagu na, do abhu cap ètu katangarèi, do ètu kacui-aai, pe rèngu pasae rare nanasa Lamatua! 10 Bèli-camèd'a Lamatua mesa Na sabhori mai nanasa Na mi dedha rèngu, nuka sèmi Na panginu si èi uuru nèti èi anggor pèd'u. Èèna Na core si asa d'ara èi nasu dhu heo robhe-robhe dhu loe boe ciki sa. Ana pajuu Na nèti sorga sèra, aa Ana Kalèbho èèna kahèi ladhe rèdhi j'ara ne'e.d 11 Peka ka laa, dhèu aa'i-aa'i dhu sogo-tagu badha bhelu dènge mèdha sogo-tagu na, do rèngu dhu lèke le cap na, pe dui rare j'aj'èra taa-taa. Sèb'u nèti j'aj'èra rèngu bhodho mai loe boe mèu-mèda.”e
12-13 De se'e se, sasoa na, dhèu unu Ama Lamatua, hud'i nanene ku paie-iie lii paredha Na, aa parcaya taruu mi Yesus, aa baku hari kabodho.
Hèia ja'a tadèngi lii èci nèti dedha-liru, peka na, “Yohanis! Èu hud'i suri ku sèmi ne'e: karèi nèti deo ne'e, dhèu dhu parcaya Lamatua Yesus, ladhe ra madhe, rèngu abhu oto.”
Hèia Roh Ama Lamatua dhu Mola-Mèci dhaa, peka na, “Tare'a! Bèli-camèd'a rèngu sèra oto tare'a-re'a! Lula rèngu j'èra le ètu rai-haha, te ngaa ra taha ho madhutu taruu Lamatua. De èèna na, Lamatua b'ala j'aj'èra rèngu, ka rèngu mamuri j'èra heka ètu sorga.”
Hahuku Ama Lamatua ètu rai-haha nuka sèmi puu-g'ètu dhu pake hela pare j'u'u
14 Èle èèna ka, ja'a padoa kètu. Kaca'a laa, kèdhi ra'i-liru dhu pudhi lao-lao, aa ca dhèu dhu madhèdi ètu dedha na. Dhèu ne, oe sèmi Dhèu Rai-haha Tare'a-re'a. Na pake dènge solo juara dhu tao nèti hualaa, aa nèd'u dènge hela pare j'u'u madèka èci.f
15 Hèia ja'a kèdhi ana pajuu dhèu èci hari nèti sorga, kalua nèti d'ara Èmu Manèngi-Mangaj'i Ama Lamatua. Na rodhe dhèu dhu madhèdi ètu dedha ra'i-liru èèna, peka na, “Pake hela èu èèna ho lamu puu-g'ètu ka! Te d'ai le hèru pakaboko isi rai.”g 16 Ka Dhèu dhu madhèdi ètu dedha ra'i-liru ne, kèpe nare hela na, ka na la'e puu-g'ètu. Hèia na oru kaboko isi rai nèti rai-haha.
17 Ka ana pajuu dhu leo hari ca dhèu kalua nèti d'ara Èmu Manèngi-Mangaj'i ètu sorga. Nèngu nèd'u dènge hela pare j'u'u madèka èci, ho neo g'ètu hua aj'u.
18 Hèia ana pajuu dhu leo hari èci kalua nèti era tunu raa aj'u hèu mèngi ètu d'ara Èmu Manèngi-Mangaj'i ètu sorga. Sasab'a ana pajuu ne, nuka j'aga ai ètu era tunu raa aj'u hèu mèngi. Na pa'oo pua ana pajuu dhu nèd'u hela pare j'u'u deo na, aku nèngu na, “Pake ka hela èu èèna, ho lamu ka g'ètu hua aj'u ètu rai-haha! Te ètu nèi, hua anggor dhu madhasa aa'i le.” 19 Ka ana pajuu ne kèpe nare ka hela pare j'u'u na la'e asa rai-haha, ho na g'ètu hua anggor, j'ue dènge ii kateme. Hèia na pamaso hua anggor se asa d'ara bak pacèli anggor. Ka ra j'èli marèu anggor se, sèna ka rare èi. J'èli marèu hua anggor ètu d'ara bak pacèli ne, sasoa na, nanasa Lamatua. 20 Bak pacèli ne ètu li'u kota. Ropa ra j'èli marèu anggor se, hèia raa kalua ae-ae. Raa ne hae sama sèmi loko cue, dhu madhera na 300 (tèlu ngasu) kilo, aa marèma na d'ai ca meter ca èta.h i