Badha bhelu dhu kalua nèti d'ara dhasi
13
Hèia ja'a kèdhi badha bhelu ci'u dhu kalua nèti d'ara dhasi. Badha ne, kètu na pidhu, aa tadhu na canguru. Ètu kolo tadhu na sèra, dhu pake solo dhèu aae. Ètu kètu na sèra, dhu suri lii-lii pakarehe Ama Lamatua.a 2 Ngi'u na, sama sèmi meo aasu. Haga na, èci èèna ka dènge haga kiu aau. Hèb'a na sèmi hèb'a singa. Mege naga èèna pangèd'u koasa na mi badha bhelu ne, ho madhèdi ètu dedha kadera paredha, aa pake koasa na aa'i-aa'i.b 3 Ètu kètu èci nèti badha bhelu ne, abhu era hisu aae èci, nuka sèmi dhu ra pare ne ka oe madhe, te ngaa madhe boe. Dhèu aa'i-aa'i ètu rai-haha ne malaa, ropa ladhe rèdhi a'èra na, ka dhèu se madhutu ne. 4 Dhèu se pahaha iisi ra mi mege naga ne, dènge ded'e padedha-dedha ne nuka sèmi Lamatua, lula mege ne ka dhu pangèd'u koasa na mi badha bhelu èèna. Dhèu sèra koa-kio kahèi badha bhelu ne, peka na, “Nèngu ne kapai titu kèna! Abhu boe èci sa dhu bisa segi ne!”5 Ama Lamatua soro tèke badha bhelu ne, sèna ka na padedha iisi na, aa padhai lii pakarehe Lamatua. Hia ne ijin kahèi, ho nèd'u paredha toke d'ai tèlu tèu dènge ca èta (nuka 42 [èpa nguru dua] hèru). 6 Nèti èèna ka, na padhai lii pamanahu kolongara Ama Lamatua, dènge pakarehe kolongara dhèu-dhèu unu Lamatua dhu pea ètu sorga.c 7 Ama Lamatua soro tèke ne kahèi, ho pamusu lab'a dhèu-dhèu unu Lamatua, toke na segi. Na abhu koasa kahèi, sèna ka paredha suku aa'i-aa'i, udhu-rasa aa'i-aa'i, lii aa'i-aa'i, aa kabarai aa'i-aa'i ètu rai-haha ne.d 8 Nèti èèna ka, dhèu aa'i-aa'i ètu rai-haha ne, sogo-tagu badha bhelu èèna, nuka rèngu aa'i-aa'i dhu ngara ra suri boe ètu d'ara Sasuri Ana Kalèbho. Uru èèna dhèu pamadhe Ana Kalèbho èèna, te ngaa Lamatua pamamuri hari Ne. Lod'o Ama Lamatua paj'aj'i mèka rai-haha ne, Nèngu dhu suri nare le ngara-ngara nèti dhèu parcaya aa'i-aa'i ra ètu d'ara sasuri Na. Dhu peka na, pe rèngu sèra ka dhu unu mamuri taa-taa, toke d'ai mia-mia dènge Nèngu.e
9 “Nanene paie-iie!
10 Ladhe Lamatua pama'ète nare le, dhèu cee ka dhu hud'i lèke kèpe,
pe ra kèpe rare ne.
Aa ladhe Lamatua pama'ète nare le, dhèu cee ka dhu hud'i madhe ku dènge samala,
pe ra pamadhe nèngu pake samala kahèi.”
Nèti èèna ka, dhèu-dhèu unu Lamatua baku hari kabodho, te èèna hia ra tebho ho madhutu taruu dènge parcaya Na taa-taa!f
Badha bhelu dhu bhodho nèti rai-haha
11 Èle, hèia ja'a kèdhi badha bhelu dhu leo ci'u, bhodho nèti rai-haha. Tadhu na dua, nuka sèmi tadhu kahib'i-kalèbho. Lii na nuka sèmi lii mege naga. 12 Nèngu nèti lii padhai lamatua na, nuka badha bhelu dhu uru èèna, dhu lèke pare ka oe madhe. Na abhu koasa nèti lamatua na, sèna ka na laka-seti dhèu rai-haha aa'i-aa'i ho sogo-tagu lamatua na. 13 Nèngu tao tadha-tadha malaa dhu kapai kahèi, toke na bisa papuru ai nèti dedha-liru, ètu madha dhèu ae-ae. 14 Dènge j'ara sèmi ne'e, ka badha bhelu ka dua ne, pake koasa nèti lamatua na, ho kapod'e-kabèli dhèu rai-haha. Na paredha dhèu ho tao mèdha sogo-tagu cue, rupa na nuka sèmi lamatua na, sèna ka ra pakab'ua lamatua na, dhu uru èèna dhèu pare ne, ka oe madhe. 15 Ama Lamatua soro tèke kahèi, badha dhu kapod'e-kabèli ne, ho na hia a'ae, sèna ka pamamuri mèdha sogo-tagu ne. Nèti èèna ka, mèdha sogo-tagu ne bisa padhai lii, ho pua pamadhe dhèu dhu ro'o boe pahaha iisi mi nèngu.
16 Badha dhu kapod'e-kabèli ne laka-seti dhèu kahèi, sèna ka tao tadha mi ai g'ana ra, do mi katangarèi ra. Dhèu aa'i-aa'i, nuka ana iiki-dhèu kapai, dhèu kaja-dhèu unu aad'o, dhèu ènu, do dhèu mardeka, rèngu aa'i-aa'i ra hud'i abhu ku cap èèna. 17 Te ladhe aad'o, dhèu sèra bisa boe pahia do pahèli ngaa-ngaa. Ètu d'ara cap ne, dhu suri ngara badha bhelu ka èci, dènge nomer na.
18 De hud'i pangee paie-iie! Dhèu dhu d'èlu-mèu bisa re'a sasoa nèti nomer èèna. Nuka “666” (èna ngasu èna nguru èna), dhu paj'uj'u mi dhèu rai-haha.g