Mege naga pamusu dènge dhèu bhèni aa dènge ana na
12
Ka cag'ag'a laa, ja'a kèdhi tadha èci dhu kapai titu kèna cèu ètu dedha-liru, dhu dhèu dhae rèdhi mèka ca tèka sa. Tadha ne, nuka sèmi: bhèni ca dhèu dhu ngi'u na pahutu dènge madha lod'o. Hèru j'aj'i mi era pacapa haga na. Nèngu pake solo dhèu aae, dhu dènge hua-hètu canguru dua bua. 2 Bhèni ne dènge babia, ka dhu tangi, te abhu le tadha ho nara iisi.3 Kaca'a laa, ja'a kèdhi hari tadha èci dhu kapai aae, dhu cèu ètu dedha-liru kahèi. Tadha ne, nuka mege naga mea ci'u dhu kapai. Kètu na pidhu, aa tadhu na canguru bua. Ètu kètu na sèra, dhu pake solo dhèu aae.a 4 Na pake rèu lai na, ho saku eele hua-hètu ca kaboko nèti tèlu kaboko ètu dedha-liru. Hèia na core hua-hètu se asa rai-haha. Ka la'e titu ètu madha bhèni ne, na tatae toke bhèni ne nara iisi. Te na neo dhèle dènge ka ana nèti bhèni ne.b 5 Hèia bhèni ne nara iisi Ana Mone ca dhèu. Te ngaa ana pajuu Ama Lamatua ca dhèu nèti sorga, mai parame nare Ana ne, ka rai nèti asa Lamatua, sèna ka nèd'u paredha sama-sama dènge Ama Lamatua ètu sorga. Te bèli-camèd'a Ana ne paredha suku aa'i-aa'i ètu rai-haha dènge koasa dhu kapai risi eele.c 6 Te ngaa bhèni ne rai la'e asa d'ara mamoo èci dhu Lamatua tao tèke hia ne. Pe ra ladhe-leru ne, toke tèlu tèu dènge ca èta, (nuka, 1.260 [ca riho dua ngasu èna nguru] lod'o).
Mikael pamusu dènge mege naga ètu sorga
7 Èle èèna ka, j'aj'i pamusu aae ètu sorga. Ana pajuu Ama Lamatua nèti sorga, dènge kapala musu ra Mikael, lab'a mege naga dènge ana pajuu na.d 8 Ka Mikael si segi mege naga ne dènge ana pajuu na sèra. Èle ka, ra kai mege naga ne dènge ana pajuu na sèra, ho pea ia ka ètu sorga. 9 Nèti èèna ka, ra bhabhoo eele si nèti sorga, hèia core si asa rai-haha. Mege naga ne, nuka dhèu aae nidhu, dhu ngara na ‘Lamatua nidhu’. Karèi nèti uru ka, nèngu ne'e ka dhu leko-monya dhèu ho ad'u-ue sasala.e 10 Hèia ja'a tadèngi hari lii dhu mèdhu èci nèti dedha-liru, peka na,
“Uru èèna, mege naga ne'e ka dhu titu dhii-dhii ètu madha Ama Lamatua.
Sasab'a nèngu, nuka pèci sasala asa a'ari èdhi, dhèu parcaya sèra.
Na loe boe galaa si mèu-mèda.
Te ngaa limuri ne, ra bhabhoo eele ne nèti sorga.
De limuri ne aa'i-aa'i tesa le.
Te d'ai lod'o na kèna, sèna ka Lamatua hia mamuri mi dhèu rai-haha.
Limuri ne Lamatua nèd'u le paredha dènge koasa Na dhu kapai.
Aa Na ded'e le Kristus,
Dhèu dhu hag'e nare ho j'aj'i Dhèu Aae dhu paredha suku aa'i-aa'i ra.f
11 A'ari èdhi sèra ka dhu segi mege naga èèna, dhu uru èèna pèci sasala mi rèngu,
lula raa Ana Kalèbho dhu suti sèna ka saku eele sasala-sasigo ra.
A'ari èdhi segi ne kahèi,
lula rèngu bani lole Lii Holo-Nori Lamatua.
Masi ka dhèu nasa ho neo pamadhe si,
te ngaa ra bege boe.
12 De aa'i-aa'i dhu mamuri ètu sorga hud'i karej'e-karae ku!
Te ngaa aa'i-aa'i dhu mamuri ètu rai-haha hud'i bori pa'èra ku,
lula mamadhe-mamopo oe bèbhe mai lèke miu.
Dhèu aae nidhu puru mai le ètu talora aae miu.
Nèngu nasa titu kèna,
lula ne'a, na, lod'o ho nèngu tao bhabhelu, oe èle kèna!”
Mege naga patangi-tenge bhèni èèna ètu rai-haha
13 Ropa mege naga ne'a, na, nèngu dhu ra core le asa rai-haha, ka la'e dènge tenge bhèni dhu nara iisi Ana èèna, ho neo paj'èra ne. 14 Te ngaa ra hia bhèni ne èla dua, nuka sèmi èla manea luji, sèna ka na lela la'e lu'u asa d'ara mamoo dhu pakaj'èu nèti mege naga. Ètu era nèi, ra ladhe-leru ne, toke tèlu tèu dènge ca èta.g 15 Ropa nèdhi nare sèmi èèna, hèia mege naga ne sabhuu èi, nuka sèmi èi aae lala, ho neo hae nèti bhèni ne. 16 Te ngaa rai-haha bara bhèni ne, dènge j'ara pacangange rai, ho dhèla aa'i mèu-mèu èi ne, dhu kalua nèti d'ara hèb'a mege naga, sèna ka baku d'ai bhèni ne. 17 Ka mege naga ne nasa titu kèna dènge bhèni ne. Hèia la'e pamusu dènge ana-ana leo nèti bhèni ne, nuka dhèu-dhèu dhu madhutu lii paredha Ama Lamatua, aa dhu loe boe nèti peka-padhai Lii Lolo Be'a lula-nèti Yesus. 18 Èle èèna ka, mege naga ne la'e titu ka ètu sebhe dhasi, dènge kadhi ngutu kèru-kèru.