Dhèu rèti lii padhai Ama Lamatua dhèu dua dhu kapai risi
11
Hèia ra j'ole hia ja'a aj'u a'uku calaa dhu madhera nuka sèmi tatea. Ka Ama Lamatua paredha ja'a, peka na, “Yohanis, lamu ho uku Èmu Kapua Manèngi-Mangaj'i Ja'a dènge mei sogo-tagu na ètu kota Yerusalem. Aa ige dhèu-dhèu dhu sabaj'a ètu d'ara Èmu èèna.a 2 Te ngaa madha Èmu Manèngi-Mangaj'i èèna, mage mu uku, te era èèna dhu hag'e eele le hia suku-suku leo dhu tadhe boe Ja'a. Èèna na rèngu mai j'aj'èli leli ho pakaj'alu kota Ja'a ne, d'ai tèlu tèu dènge cabèka (nuka, 1.260 [ca riho dua ngasu èna nguru] lod'o).b 3 Pe Ja'a pua dhèu Ja'a dhèu dua lasi asa era èèna, sèna ka rèti lii padhai Ja'a. Dhèu dua se pake mèdha sasusa, aa ra lole lii moa nèti Ja'a, toke èle 1.260 (ca riho dua ngasu èna nguru) lod'o èèna.”4 Sakaria, ca dhèu nèti lii padhai Lamatua, dhu suri mema le nèti uru ka, lula-nèti dhèu dua se. Na pakasame sèmi aj'u saitun dua kapua, aa era tatèke labhu dua, dhu patitu tangare asa Ama Lamatua, dhu j'aj'i Kètu mi dhèu aa'i-aa'i ètu rai-haha.c 5 Ladhe dhèu neo paj'èra dhèu dua dhu rèti lii padhai Lamatua, èèna na ai bhodho nèti d'ara hèb'a ra, ho pakèpu aa'i musu ra. Dènge j'ara sèmi ne'e, dhèu dhu neo paj'èra si, tatu madhe. 6 Lod'o dua ra j'aj'i dhèu rèti lii padhai Lamatua ètu rai-haha ne, Lamatua pangèd'u ra koasa ho ra bisa taha èj'i, koasa sèna ka tao madha èi j'aj'i raa, aa koasa ho ad'u-ue rupa-rupa mamadhe-mamopo ètu rai-haha, madhutu dad'èi ra.d
7 Lod'o d'ai èle sasab'a-la'a ra, èèna na badha bhelu ci'u bhodho mai nèti ro'a j'aj'èra dhu dènge boe too-lane. Badha ne'e lab'a rèngu dua ra, toke na segi si, aa na pamadhe dua ra.e 8-9 Dènge j'ara ne'e, dua ra madhe ètu kota kapai, dhu uru èèna era dhèu paku pamadhe Lamatua rèngu ètu aj'u palolo-palèbha. Te kota ne'e j'aj'i le kota bhelu, sèmi kota Sodom dènge rai Masir uru èèna. Èèna na, dhèu core eele ngi'u aae dua ra, toke d'ai tèlu lod'o dènge ca èta. Ka dhèu-dhèu nèti suku aa'i-aa'i, nèti udhu-rasa aa'i-aa'i, aa dènge nèti kabarai aa'i-aa'i ra, mai lingu. Dhèu se ro'o boe hia ijin ho padhane si,f 10 lula ra karej'e laladhe ngi'u aae dhèu dua se, dhu mai lalai ngangee dhèu ae ètu rai-haha ne. Ka dhèu se aa'i-aa'i ra tao pesta, aa ra pa'adhu hadia èci dènge èci.
11 Te ngaa ropa èle tèlu lod'o dènge ca èta, hèia Ama Lamatua hia si a'ae, ka dua ra mamuri hari. Hèia dhèu-dhèu dhu ladhe rèdhi si, madha'u toke isi ra rèbha-rèbha.g 12 Ka dhèu dua se tadèngi lii dhu mèdhu èci nèti dedha-liru pua ra, peka na, “Dua mi ca'e ka asa ne'e mai!” Hèia dua ra ca'e asa dedha-liru lasi dènge ra'i-liru dhu sarimu nare si. Ropa rèdhi sèmi èèna, ka musu ra malaa ko'a-ko'a sène.h 13 Kaca'a laa, rai opo dhu kapai titu kèna. Ladhe ige èmu aa'i-aa'i ètu d'ara kota, nèti canguru èmu, dhu guri, cue. Aa dhèu dhu madhe, pidhu riho dhèu. Dhu madhe boe, ra madha'u bia. Te ngaa rèngu èèna na pakab'ua kahèi kolongara Ama Lamatua, lula Nèngu ka dhu nèd'u paredha ètu sorga.i
14 Dènge sèmi ne'e, j'aj'èra ka dua seli le. Te ngaa baku pamud'e! Te calaka ka tèlu oe mai kèna.
Tiu tèbhe ka pidhu — Ama Lamatua dènge Yesus Kristus rèd'u paredha ètu rai-haha
15 Hèia ana pajuu Lamatua ka pidhu tiu tèbhe na. Kaca'a laa, ja'a tadèngi lii ae-ae nèti sorga, dhu peka na,
“Limuri ne, dhu rèd'u paredha ètu rai-haha,
dhodhoka Ama Lamatua dènge Kristus,
nuka Dhèu dhu Lamatua hag'e nare karèi nèti uru ka mai.
Èèna na Lamatua nèd'u paredha taa-taa, sama sèmi Dhèu Aae.”j
16 Ka 24 (dua nguru èpa) katua dhu madhèdi ètu dedha kadera paredha ètu madha Ama Lamatua, tadèngi lii èèna kahèi. Hèia ra patitu kètu urutuu, toke rèhu ra d'ai rai, ka ra koa-kio Ama Lamatua, 17 aa sod'a, peka na,
“Oo Ama Lamatua!
Kètu ji'i!
Ama Lamatua ji'i!
Lamatua ka dhu paredha aa'i-aa'i.
Lamatua ka dhu koasa nare aa'i.
Lamatua ka dhu karèi nèti uru ka mai.
Lamatua ka dhu deo ne'e ne.
Ji'i manèngi makasi mi Lamatua,
Lula Ama pake le koasa Mu dhu kapai risi,
sèna ka mèd'u paredha ètu rai-haha.
18 Te ngaa dhèu nèti suku-suku nasa titu kèna,
lula rèngu ro'o boe madhutu Lamatua.
Te ngaa limuri ne, Lamatua nasa kahèi,
lula rèngu ro'o boe tadhe Ne.
Limuri ne, d'ai le lod'o na,
sèna ka Lamatua huku dhèu dhu pusi-pahae boe Ne.
Limuri ne, d'ai le lod'o na,
ho Lamatua palaho dhèu dhu palaho dhèu leo.
Limuri ne, d'ai le lod'o na,
ho Lamatua parisa lii langu dhèu madhe.
Limuri ne, d'ai le lod'o na,
ho Lamatua b'ae-baj'a èi kabhèsu dhèu sab'a Na.
Nuka: dhèu rèti lii padhai Lamatua,
dènge dhèu unu Lamatua,
Ana iiki-dhèu kapai, dhèu ngèru-dhèu heka.
Lamatua b'ae rui-j'aj'èra mi dhèu aa'i-aa'i ra,
dhu pakab'ua kolongara Na.”k
19 Èle èèna ka, ja'a ladhe kèdhi babèdho Èmu Manèngi-Mangaj'i Lamatua ètu sorga, dhu conge tèke. Ka ja'a kèdhi boaraka dhu uru èèna era tèke lii paredha Ama Lamatua dhu suri ètu lei hadhu. Hèia bela kacèb'a lolo aae nèti haa, nèti dhimu, d'oro lii pagod'o-god'o, rai-haha ne karedha, dènge èj'i es hadhu dhu bia, kabhui mai nèti dedha-liru.l