Ana pajuu nèti sorga dhu nèd'u dènge lalulu sasuri iiki
10
Hèia ja'a ladhe kèdhi ana pajuu Lamatua dhu kapai èci puru mai nèti sorga. Ra'i-liru sarimu nare ngi'u na. Kètu na dhu poi dènge saroo. Rèhu na heo sama sèmi madha lod'o, aa haga na heo èci èèna ka dènge heo ai. 2 Nèngu ne kèpe dènge lalulu sasuri iiki, dhu bhoke tèke. Na titu, haga g'ana na ètu d'ara dhasi, haga kariu na ètu dedha-rai. 3 Hèia na pa'oo-parodha, sèmi lii taraa singa. Ropa na pa'oo-parodha nare, hèia d'oro lii pagod'o-god'o pidhu hari. 4 Ropa d'oro lii, ka ja'a neo suri lii padhai ra. Te ngaa ja'a tadèngi lii èci nèti sorga, peka na, “Èu baku lolo dènge dhèu lii padhai lula-nèti pidhu d'oro se'e! Mage mu suri ngaa-ngaa kahèi.”5 Ka ana pajuu dhu titu haga calaa ètu dedha-rai, aa haga calaa ètu d'ara dhasi èèna, j'oka ai g'ana na asa dedha-liru, 6 hèia na subha, peka na, “Lii dhu ja'a peka ne, lèke tare'a! Ja'a subha dènge kolongara Ama Lamatua, lula Nèngu ka dhu taa-taa! Nèngu ka dhu paj'aj'i liru dènge rai-haha, aa isi ra aa'i-aa'i. Nanene paie-iie! Lod'o dhu èdhi tatae èèna, mamai na oe dètu le. 7 Te ladhe ana pajuu Lamatua ka pidhu èèna neo tiu tèbhe na, pe Lamatua tao madhutu ngaa dhu uru èèna dhèu dhae re'a mèka. Te ngaa, ngaa dhu Na neo tao ne, Na peka le dènge dhèu rèti lii padhai Na dhu lalau-lalo'o Ne. De nanene paie-iie, te lii padhai Ja'a ne lèke tare'a.”a
8 Ka lii dhu ja'a tadèngi nèti dedha-liru èèna, peka hari dènge ja'a, aku nèngu na, “Yohanis, lamu ka asa ana pajuu nèti sorga nèi, dhu titu haga na calaa ètu rai-dedha, aa calaa ètu d'ara dhasi. More nèti kacui-aai na, lalulu sasuri iiki dhu bhoke tèke èèna.”
9 Hèia ja'a laku dènge ka asa ana pajuu ne, manèngi kore sasuri iiki èèna. Ka na lii dènge ja'a, aku nèngu na, “More ho mu'a ka! Èèna na d'ara hèb'a èu, rasa kee nuka sèmi dhua nasu oni, te ngaa ètu d'ara kabake èu, rasa pèd'u.”
10 Ropa na padhai lii nare sèmi èèna, ka ja'a sèmi kore sasuri iiki èèna nèti kacui-aai na. Hèia ja'a ku'e dènge ka. Ètu d'ara hèb'a ja'a ne kee sèmi dhua nasu oni. Te ngaa ropa ja'a dhèle, ja'a rasa na ètu d'ara kabake ja'a pèd'u.b
11 Ka abhu dhu pua ja'a, peka na, “Èu hud'i lamu hari ku, ho peka dènge ka ngaa dhu bèli-camèd'a Lamatua neo tao ètu rai-haha. Peka j'ara-j'ara dhu bèli-camèd'a j'aj'i mi dhèu aae aa'i-aa'i, mi dhèu nèti suku aa'i-aa'i, nèti udhu-rasa aa'i-aa'i, aa dènge nèti lii aa'i-aa'i ètu rai-haha.”