Tiu tèbhe ka lèmi — kabara paj'èra dhèu rai-haha
9
Èle èèna ka, ana pajuu ka lèmi tiu tèbhe na. Hèia ja'a kèdhi hua-hètu cue bèbhe asa rai-haha. Ra pangèd'u hua-hètu ne gagoe èci, ho na bhoke babèdho ro'a j'aj'èra dhu marèma na dènge boe too. 2 Lod'o na bhoke nare babèdho ro'a ne, kaca'a laa sèb'u dhu mèdhi guru-guru kalua mai, nuka sèmi sèb'u ai na'e j'ami. Sèb'u ne kalua mai dhu kahore-kahore, ca'e la'e asa dedha, ka dedha-liru dènge madha lod'o maroga.a 3 Hèia kabara ae titu kèna, lela nèti d'ara sèb'u ai ne, ka bèbhe asa rai-haha. Ama Lamatua dhu pangèd'u le koasa mi rèngu, sama sèmi karakarai.b 4 Te ngaa Ama Lamatua peka dènge si, ho baku pa'ele iie j'u'u, aj'u-aj'u, dènge ana aaj'u ètu rai-haha. Te ngaa ra hud'i paj'èra ku dhèu dhu dènge boe tadha Lamatua ètu katangarèi ra.c 5 Lamatua soro tèke kabara se paj'èra dhèu sèra toke d'ai lèmi hèru, te ngaa bisa boe pamadhe si. Dhodhoka tao papèd'a di, sama sèmi karakarai tèpu. 6 Ètu d'ara lèmi hèru èèna, rarii aa j'èra titu kèna, toke ra manèngi madhe. Masi ka sèmi èèna, ra madhe boe.d7 Ja'a ladhe rupa kabara se sama sèmi jara pamusu. Rèngu pake solo kapala musu dhu tao nèti hualaa. Rèhu ra sama sèmi rèhu dhèu.e 8 Rèu kètu ra madhera èci èèna ka dènge rèu kètu dhèu bhèni. Ngutu ra mariu sèmi ngutu singa.f 9 Rèngu se oe sèmi pake kodho bèsi ètu sangasa ra. Lii kahaku èla ra mèdhu sama sèmi jara sordad'u ae titu kèna dhu ère kareta pamusu ra.g 10 Rèu lai ra èra titu kèna, aa dhu dènge raco nuka sèmi raco karakarai. Rèngu se abhu koasa, ho paj'èra dhèu pake raco ra, toke d'ai lèmi hèru. 11 Dhèu aae kabara se, nuka kètu nèti rèngu aa'i-aa'i dhu ra babège si nèti d'ara ro'a j'aj'èra dhu dènge boe too-lane. Ngara na ètu d'ara lii Ibrani, Abadon, aa madhutu lii Yunani, Apolion. Sasoa na, “Dhu d'èi pa'ele iie”.
12 Dènge j'ara ne'e, seli le j'aj'èra ka èci. Te ngaa baku pamud'e! Te dua j'aj'èra dhu leo era, dhu bèli-camèd'a j'aj'i hari.
Tiu tèbhe ka èna — tèlu rupa j'aj'èra ètu rai-haha
13 Ka ana pajuu ka èna tiu tèbhe na. Hèia ja'a kèdhi mei hualaa, era dhu pake tunu raa aj'u hèu mèngi, dhu patangara dènge Lamatua. Ka lii èci kalua nèti èpa tadhu ètu kabicu mei èèna,h 14 ho peka dènge ana pajuu dhu heka tiu nare tèbhe na, “Abhu ana pajuu dhèu èpa, dhu nèbhu nare sange ne'e lèke èki ètu d'ara loko aae èci, dhu ngara na Efrat. Lamu patabuli eele si!” 15 Hèia la'e patabuli si, sèna ka ana pajuu èpa se lasi pamadhe dhèu, dhu lèke dènge tèu na, hèru na, lod'o na, dènge jam na, dhu Lamatua pama'ète nare le. Ladhe èdhi bagi dhèu aa'i-aa'i ètu rai-haha ne mi tèlu kaboko, na, dhu madhe, ca kaboko. 16 Rèngu peka dènge ja'a, na, sordad'u ana pajuu dhu ca'e jara pamusu sèra aa'i-aa'i ra, dua ngasu juta dhèu. 17 Hèia ja'a ladhe kèdhi sordad'u dènge jara ra. Sordad'u se dhu pake kodho bèsi pa'abhe sangasa ra. Kodho se nuka, dhu mea gèu-gèu, mangèru kale'e, dènge karara oe sèmi èi nasu. Rupa kètu jara se, sama sèmi kètu singa. Nèti hèb'a jara se, kalua ai, sèb'u, aa èi nasu, 18 ho hia j'aj'èra tèlu rupa asa rai-haha, toke dhèu ètu rai-haha ne madhe aa'i ca kaboko nèti tèlu kaboko. 19 Èle èèna, hèia jara se lasi paj'èra dhèu pake hèb'a dènge rèu lai ra. Ètu rèu lai ra, abhu kètu sèmi kètu mege.
20 Te ngaa abhu dhèu cahag'e ètu rai-haha, dhu ra pamadhe boe nèti j'aj'èra se'e. Masi ka sèmi èèna, rèngu neo boe tèke eele bhabhelu-katub'a ra. Rèngu sogo-tagu taruu nidhu aa mèdha-panyau dhu ra tao nèti hualaa, doi pudhi, tabaga, hadhu, dènge aj'u. Masi ka mèdha se bisa boe rèdhi ngaa-ngaa, bisa boe tadèngi ngaa-ngaa, aa bisa boe kako, te ngaa ra loe boe sogo-tagu si.i 21 Dhèu se'e ro'o boe loe kahèi nèti sasala dhu leo, nuka sèmi pamadhe dhèu, pake na'i nidhu, tao j'ara karehe dènge dhèu dhu j'aj'i boe dhèu èmu-kamali ra, aa mana'u pagogo-pagero.