Segel ka pidhu — ana pajuu Lamatua sèmi rare tèbhe pidhu bua
8
Hèia Ana Kalèbho ne bhoke segel ka pidhu. Kabèdhi laa, aa'i-aa'i ètu sorga kalau-karèto boe. Abhu boe lii èci sa, pe d'ai catenga jam sa. 2 Ka ja'a ladhe kèdhi ana pajuu dhèu pidhu nèti sorga, titu taruu ètu madha Ama Lamatua, dhu pa'èra lalau Ne. Rèngu èci-èci ka sèmi rare tèbhe ra.3 Ka ana pajuu dhu leo ca dhèu, titu ètu madha mei era tunu raa aj'u hèu mèngi. Nèngu dhu nèd'u dènge mago hualaa cue, era isi raa aj'u hèu mèngi. Hèia ra hia ne raa aj'u hèu mèngi ae-ae, sèna ka na pab'ali dènge lii manèngi-mangaj'i nèti dhèu unu Ama Lamatua. Ka na nèti mago hualaa, ho tao sèmi korban dhu hèu mèngi, sèna ka la'e tèke asa dedha mei hualaa ètu madha kadera paredha aae.a 4 Ka na tunu raa aj'u hèu mèngi ne. Hèia hèu mèngi na ca'e asa madha Ama Lamatua, palere-lere dènge lii manèngi-mangaj'i nèti dhèu unu Lamatua.
5 Èle èèna ka, ana pajuu ne nare ai nèti dedha mei ne, la'e tao asa d'ara mago hualaa èèna. Hèia na pèci mago ne asa rai-haha. Kaca'a laa, ja'a ladhe kèdhi bela kacèb'a lolo aae nèti g'ana-kariu ètu rai-haha. Ka lii tea ma'ète boe, aa rai opo kapai titu kèna.b
6 Èle ka, ana pajuu dhèu pidhu nèti sorga sèra, pa'èra ho tiu tèbhe ra.
Tiu tèbhe ka èci — ana aaj'u kèpu-ladhu ai
7 Ropa ana pajuu ka èci tiu tèbhe na, hèia èj'i es aa ai pab'ali dènge raa, sabhori mai asa rai-haha. J'u'u aa'i-aa'i ètu mia-mia kèpu-ladhu ai. Ca era nèti tèlu era ètu rai-haha ne, kèpu-ladhu ai. Aa ca kaboko nèti tèlu kaboko ana aaj'u ètu rai-haha ne, dhu kèpu-ladhu ai kahèi.c
Tiu tèbhe ka dua — ngaa-ngaa ètu d'ara dhasi madhe
8 Ropa ana pajuu ka dua tiu tèbhe na, ka mèdha èci sama sèmi ledhe aae cue dhu heo robhe-robhe, pèci la'e asa d'ara dhasi, toke ca era nèti tèlu era ètu d'ara dhasi j'aj'i raa. 9 Hèia ca kaboko nèti tèlu kaboko badha ètu d'ara dhasi, madhe aa'i mèu-mèu. Ca kaboko nèti tèlu kaboko kapa aa'i-aa'i ètu d'ara dhasi, laho eele aa'i si.
Tiu tèbhe ka tèlu — èi j'aj'i pèd'u
10-11 Ropa ana pajuu ka tèlu tiu tèbhe na, hèia nèti dedha-liru hua-hètu aae cue bèbhe mai, nuka sèmi ob'o kapai aae èci dhu heo. Hua-hètu ne, ngara na ‘Pèd'u’. Ropa na bèbhe mai, èi loko dènge madha èi, j'aj'i pèd'u. Hèia nèti dhèu dhu rinu, ae ka dhu madhe. Ladhe sèmi loko dènge èi madha ètu rai-haha ne hag'e mi tèlu, na, ca hag'e j'aj'i pèd'u.d
Tiu tèbhe ka èpa — madha lod'o, hèru dènge hua-hètu maroga
12 Hèia ana pajuu ka èpa tiu tèbhe na. Kaca'a laa, madha lod'o, hèru dènge hua-hètu lèke hake, hèia maroga. Ladhe re mèu, maroga èpa jam, lula madha lod'o heo iia heka. Aa ladhe re mèda, maroga kiu-kiu èpa jam kahèi, lula hèru dènge hua-hètu heo iia heka kahèi.e
13 Èle ka, ja'a doa kètu, ka ladhe kèdhi manea luji ci'u dhu lela dedha titu kèna. Na parodha, peka na, “Kasian! Kasian! Bèli-camèd'a j'aj'èra kapai lèke dhèu aa'i-aa'i dhu mamuri ètu rai-haha. Te ana pajuu dhèu tèlu era, dhu tiu mèka tèbhe ra.”