Ama Lamatua tao cap mi 144.000 (cangasu èpa nguru èpa riho) dhèu
7
Hèia ja'a ladhe kèdhi ana pajuu Lamatua dhèu èpa puru mai nèti sorga, titu ètu èpa madha ngèlu ètu rai-haha ne, ho taha ngèlu. Ka ngèlu bisa boe tiu asa d'ara dhasi, rai-dedha, dènge aj'u-aj'u.a 2 Lamatua hia si koasa, ho ra pa'ele iie rai-dedha dènge d'ara dhasi. Ka ja'a kèdhi hari ana pajuu dhu leo ca dhèu nèti sorga, mai nèti dhimu. Na mai nèti dènge cap Ama Lamatua dhu mamuri taa-taa. Hèia na rodhe mi ana pajuu dhèu èpa sèra, peka na, 3 “Mate ku! Baku pa'ele iie ku rai-dedha, do d'ara dhasi, do aj'u sèra. Mate toke ji'i tao ngare ku cap mi katangarèi dhèu unu Lamatua sèra.”b4 Èle èèna ka, rèngu peka dènge ja'a, na, ana pajuu ne tao le tadha mi dhèu unu Lamatua sèra. Dhèu sèra aa'i-aa'i ra 144.000 (cangasu èpa nguru èpa riho) dhèu, dhu mai nèti suku Isra'el. Nuka:
5 nèti suku Yahuda, 12.000 (canguru dua riho) dhèu;
suku Ruben, 12.000 dhèu;
suku Gad, 12.000 dhèu;
6 suku Aser, 12.000 dhèu;
suku Naftali, 12.000 dhèu;
suku Manase, 12.000 dhèu;
7 suku Simeon, 12.000 dhèu;
suku Lewi, 12.000 dhèu;
suku Isaskar, 12.000 dhèu;
8 suku Sebulon, 12.000 dhèu;
suku Yusuf, 12.000 dhèu;
aa nèti suku Benyamin, 12.000 dhèu.
Dhèu mola-mèci koa-kio Ama Lamatua dènge Ana Kalèbho
9 Èle èèna ka, ja'a kèdhi dhèu ae titu kèna, dhu ige kore boe. Rèngu mai nèti suku aa'i-aa'i, nèti udhu-rasa aa'i-aa'i, nèti kabarai aa'i-aa'i, aa nèti lii aa'i-aa'i ètu rai-haha. Rèngu pakaboko tangara asa kadera paredha, aa asa Ana Kalèbho kahèi. Dhèu sèra pake kodho pudhi, aa ra kèpe dènge rèu palam. 10 Ka aa'i-aa'i ra koa-kio, aku rèngu na,
“Ji'i koa-kio Ama Lamatua ji'i,
dhu madhèdi ètu kadera paredha Na.
Ji'i ded'e padedha-dedha Ana Kalèbho ne kahèi!
Rèngu se'e ka dhu pala mamuri hia ji'i.
Rèngu se'e ka dhu bhoke j'ara mamuri hia ji'i.”
11 Ropa padhai lii rare sèmi èèna, ana pajuu Lamatua nèti sorga dhu rai-reo rare kadera paredha ne, patitu kètu urutuu ra, toke rèhu d'ai rai, tangare asa kadera paredha aae ne. Katua-katua dènge èpa badha aae sèra, tao madhutu sèmi èèna kahèi. Rèngu aa'i-aa'i ra pahaha iisi mi Ama Lamatua, 12 aa ra peka na,
“Tare'a! Èèna tare'a-re'a!
Ji'i koa-kio Ama Lamatua kahèi!
Ji'i j'oka padedha-dedha kolongara Lamatua kahèi!
Ngangee dènge lii padhai Lamatua, dhu lèke mola-mola.
Koasa Lamatua dhu kapai risi eele.
A'èra Lamatua seli eele.
Ji'i loe boe manèngi makasi mi Ama Lamatua.
Ji'i loe boe pakab'ua Lamatua.
Lèke! Tare'a sèmi èèna!”
13 Ropa rèngu koa-kio rare sèmi èèna, hèia nèti 24 (dua nguru èpa) katua se, èci karèi ja'a, aku nèngu na, “Dhèu ae-ae dhu pake kodho pudhi se, èu tadha si, do? Rèngu se mai nèti mia?”
14 Te ngaa ja'a dhaa, peka na, “Aad'o, ama. Ja'a tadhe boe rèngu se, cee. Ama ka dhu tadhe risi.”
Ka na peka dènge ja'a, aku nèngu na, “Rèngu se, dhèu dhu bhodho nèti d'ara j'aj'èra aae.
Rèngu se, dhèu dhu pake le raa Ana Kalèbho ne,
sèna ka rase mèdha-papake ra,
aa tao papudhi kodho ra.c
15 Nèti èèna ka, rèngu titu ètu madha kadera paredha Ama Lamatua.
Mèu-mèda rèngu lalau-lalo'o Lamatua ètu d'ara Èmu Manèngi-Mangaj'i Na.
Lamatua dènge si taa-taa.
Lamatua madhenge si taa-taa.
16 Pe rèngu re'a heka manganga.
Pe rèngu koko-kamango heka.
Pe madha lod'o pakèpu heka si.
Pe ka'uri rèngu carici heka lèke lod'o pana.d
17 Ana Kalèbho dhu padètu dènge kadera paredha èèna,
Pe Nèngu ka j'aj'i dhèu bata-magee kètu rèngu.
Èèna na Nèngu ka eo nèti si,
lasi rinu asa madha èi dhu nèti mamuri hia dhèu.
Pe Lamatua saku eele sasusa ra,
sèna ka ra tangi ia ka.”e