Ana Kalèbho bhoke eele segel se èci-èci Segel ka èci — Kapala pamusu kalua mai
6
Èle ka, ja'a ladhe kèdhi Ana Kalèbho bhoke segel ka èci nèti lalulu sasuri èèna. Hèia ja'a tadèngi, na, èci nèti èpa badha aae sèra parodha dènge lii mèdhu, nuka sèmi lii d'oro. Na paredha, peka na, “Lamu dènge ka!” 2 Cag'ag'a laa, ja'a kèdhi jara pudhi ci'u. Dhèu èci dhu manya'e pake dènge solo kapala musu, lula nèngu ka dhu segi taruu ètu d'ara pamusu. Limuri ne na kèpe le kataki-hahusu, la'e ho segi hari musu na ètu rai-haha.aSegel ka dua — patao-palaha ètu rai-haha
3 Hèia Ana Kalèbho ne bhoke segel ka dua. Ka ja'a tadèngi badha aae ka dua paredha, peka na, “Lamu dènge ka!” 4 Ka jara ci'u dhu mea gèu-gèu kalua mai. Dhèu dhu manya'e jara ne sèmi nare samala aae èci. Ra hia ne koasa ho la'e pamaruru ètu rai-haha, sèna ka dhèu rai-haha èci pamadhe èci.b
Segel ka tèlu — tèu manganga-mad'èu
5 Ka Ana Kalèbho bhoke segel ka tèlu. Hèia ja'a tadèngi lii paredha nèti badha aae ka tèlu, peka na, “Lamu dènge ka!” Kaca'a laa, ja'a kèdhi jara mèdhi ci'u. Dhèu dhu manya'e jara ne nèd'u dènge kabatai cue, sèna ka tai nganga'a dhu oe kura kèna.c 6 Hèia ja'a tadèngi hari, nuka sèmi lii èci mai nèti talora aae badha èpa ngi'u se, peka na, “Bèli-camèd'a, abhu manganga-mad'èu dhu kapai titu kèna ètu rai-haha. Gaji dhèu ca lod'o nia dhoka hèli laludhu tèlu moo di; te ngaa neo laludhu be'a, abhu dhoka ca moo di. Masi ka sèmi èèna, dhèu bisa boe pa'ele iie aj'u saitun dènge aj'u anggor ètu d'ara oka ra.”d
Segel ka èpa — dhèu ae madhe
7 Èle èèna ka, Ana Kalèbho ne bhoke segel ka èpa. Hèia ja'a tadèngi lii nèti badha aae ka èpa hia paredha, peka na, “Lamu dènge ka!” 8 Kaca'a laa, ja'a ladhe kèdhi jara ci'u dhu rèu na sanama karara. Dhèu dhu manya'e jara ne, ngara na ‘Mamadhe’. Aa abhu dhu madhutu ne re limuri, ngara na ‘Era pea Samanga Dhèu Madhe’. Rèngu dua ra abhu koasa ho lasi pamadhe dhèu ètu rai-haha pake samala, tèu manganga-madèu, papèd'a-tarègu, dènge pasoku badha hui dhu bhelu. Ladhe ige aa'i dhèu dhu madhe, aa'i-aa'i ra ca kaboko nèti èpa kaboko nèti dhèu dhu pea ètu rai-haha.e
Segel ka lèmi — dhèu unu Lamatua tatae toke Na pama'ète lii langu si
9 Hèia Ana Kalèbho ne bhoke segel ka lèmi. Ka ja'a kèdhi samanga dhèu dhu ra pamadhe uru sèra ètu ro'a mei korban. Ra pamadhe rèngu lula parcaya Ama Lamatua, aa aj'a-nori dhèu taruu lula-nèti Lii Holo-Nori Na. 10 Ra pa'oo-parodha, peka na, “Oo Lamatua, Ama dhu kapai risi! Ama dhu mola-mèci! Ji'i parcaya ngaa dhu Lamatua peka-padhai. Te ngaa ji'i hud'i tatae d'ai pèri lod'o hari, heka Lamatua pama'ète lii langu, sèna ka huku dhèu dhu pamadhe ji'i ètu rai-haha nèi?”
11 Ropa rèngu karèi rare sèmi èèna, hèia rèngu èci-èci ka abhu kodho pudhi robho d'ai rai. Abhu dhu peka dènge ra, “Tatae hari ku ciki oo'e, toke miu tesa aa'i. Te abhu anga miu era dhu ra pamadhe sèmi miu kahèi.”
Segel ka èna — mamadhe-mamopo ètu dedha-liru dènge rai-haha
12 Ka Ana Kalèbho ne bhoke segel ka èna. Kaca'a laa, ja'a ladhe kèdhi rai-haha ne opo kapai titu kèna. Hèia madha lod'o maroga kiu-kiu, nuka sèmi bèla mèdhi, aa hèru mea sama sèmi raa.f 13 Hua hètu-hua hètu nèti dedha-liru bèbhe mai asa rai-haha, nuka sèmi hua aj'u hoa dhu kabhui, lula lèke ngèlu aae. 14 Hèia ja'a ladhe, na, liru mae bagi mi dua, ka lulu nuka sèmi dhèpi, toke ele. Aa ledhe-ledhe dènge pulu aa'i-aa'i ra gaged'o, toke ele nèti era ra.g 15 Ropa j'ara se j'aj'i, dhèu aa'i-aa'i ètu rai-haha, mulai nèti dhèu aae-dhèu kapai, komedhaa sordad'u, dhèu kaja-su'i, toke d'ai ènu sèra, aa'i-aa'i ra madha'u titu kèna. Ka rai lasi lu'u ètu ro'a-ro'a loe, dènge sasanga-sasanga hadhu ètu ledhe.h 16 Dhèu sèra pua ledhe-ledhe aa hadhu aae sèra, peka na, “Saguru mere ka ji'i laa! Pahuni ji'i sèna ka Nèngu dhu madhèdi ètu dedha kadera paredha aae èèna, baku nèdhi ji'i. Aa Ana Kalèbho èèna huku ia ka ji'i.i 17 Ira ii! Ji'i laho mae-mae le, te lod'o d'ai mamadhe-mamopo kèna! Ama Lamatua dènge Ana Kalèbho èèna, neo dutu nanasa Rèngu mi dedha ji'i. Te ngaa èci sa bisa boe sili rare, hèia tatu madhe aa'i mèu-mèu!”j