Lalulu sasuri dhu segel madhe
5
Èle èèna ka, ja'a ladhe hari Nèngu dhu madhèdi ètu dedha kadera paredha èèna. Na kèpe dènge sasuri ca lulu ètu ai g'ana Na. Ètu lalulu sasuri ne, dhu suri le re li'u dènge d'ara. Ra segel le ètu pidhu era.a2 Hèia ja'a kèdhi ana pajuu nèti sorga ca dhèu dhu kapai aae. Dènge lii aae, na karèi, “Dhèu cee ka dhu dènge hak ho bisa bhoke segel aa baca sasuri ne?” 3 Na karèi sèmi èèna ka, te ngaa ra abhu boe ca dhèu sa dhu dènge hak, ho bisa bhoke dènge baca isi sasuri ne. Masi ka ètu sorga, do ètu rai-haha ne, abhu boe èci sa hèi dhu dènge hak. Ètu era dhèu madhe, aad'o kahèi. 4 Ropa kèdhi sèmi èèna, hèia ja'a tangi d'ara pèd'a, lula abhu boe ca dhèu sa dhu dènge hak ho bisa bhoke sasuri aa baca isi na. 5 Èle ka, ca dhèu nèti dua nguru èpa katua se'e, lii dènge ja'a, peka na, “Baku tangi, we. Te ana-èpu dhèu aae Daud ca dhèu dhu kapai risi eele, dhu ra haji ngara Na, ‘Singa nèti udhu-rasa Yahuda’. Nèngu ka dhu ab'o palaho le aa'i-aa'i dhu bhelu-katub'a. De Nèngu ka dhu dènge hak, sèna ka bisa bhoke segel aa baca isi sasuri ne.”b
6 Ropa tadèngi kore lii ne'e, ja'a kèdhi Ana Kahib'i-Kalèbho dhu titu ètu talora aae badha èpa ngi'u sèra, dènge 24 (dua nguru èpa) katua dhu madhèdi reo rare kadera paredha èèna. Ana Kahib'i-Kalèbho ne, oe sèmi dhu ra pamadhe le. Nèngu ne dènge tadhu pidhu, aa musi madha Na pidhu kahèi. Musi madha pidhu sèra, nuka sèmi Roh Na dhu dènge pidhu rupa, dhu Na papuru mai palème rai-haha ne.c 7 Hèia ja'a ladhe kèdhi Ana Kalèbho ne, kako la'e asa madha Nèngu dhu madhèdi ètu kadera paredha èèna, sèna ka sèmi nare lalulu sasuri nèti ai g'ana Na.
8 Ropa Ana Kalèbho ne sèmi nare sasuri, cag'ag'a laa badha èpa ngi'u, dènge 24 (dua nguru èpa) katua sèra, pabèbha iisi ra, ka ra patitu kètu urutuu ètu madha Na. Rèngu se èci-èci ka kèpe mèdha lii sod'a oe sèmi sasadhu sa, dènge mago hualaa dhu isi dènge raa aj'u hèu mèngi, sèna ka ra pasèbu ho pahèu mèngi. Raa aj'u hèu mèngi se'e ka, nuka lii manèngi-mangaj'i nèti dhèu unu Lamatua.d 9 Ka rèngu aa'i-aa'i sod'a lii sod'a hiu èci, peka na:
“Ana Kalèbho ne'e ka dhu nia sèmi nare sasuri ne.
Ana Kalèbho ne'e ka dhu dènge hak ho bisa bhoke segel sèra.
Te Nèngu ne'e ka dhu ra pamadhe le.
Hèia Ama Lamatua pake raa Na,
ho sui nare dhèu nèti suku aa'i-aa'i ètu rai-haha ne,
sèna ka dhèu cahag'e bisa j'aj'i dhèu unu Lamatua.
Dènge sèmi èèna, dhèu rai-haha nèti lii aa'i-aa'i dènge rai aa'i-aa'i,
bisa j'aj'i ana-ana Lamatua.e
10 Ana Kalèbho ne'e ka, oru nare si aa'i-aa'i,
j'aj'i mi ca rae-ca nadha.
Ana Kalèbho ne'e ka, hag'e nare si,
j'aj'i dhèu sab'a Lamatua.
Bèli-camèd'a rèngu se'e ka dhu rèd'u paredha ètu rai-haha.
Pe rèngu sab'a hia Lamatua ètu rai-haha.”f
11 Èle ka, ja'a boti kètu, hèia tadèngi lii mèdhu aae èci. Hèia ja'a ladhe badha aae èpa ngi'u, dènge 24 (dua nguru èpa) katua se, tabha hari dènge ana pajuu nèti sorga ae titu kèna. Ana pajuu se d'ai juta-kehi.g 12 Rèngu aa'i-aa'i ra sod'a dènge lii mèdhu, peka na,
“Ji'i ded'e padedha-dedha Ana Kalèbho dhu ra pamadhe le,
Lula Nèngu ka dhu nia sèmi nare lii koa-kio ji'i!
Koasa Na, kapai risi eele.
Kakaja Na, lale-kabèle.
Ngangee lii padhai Na, lèke mola-mola.
A'èra Na, èci sa risi boe.
Ji'i j'oka padedha-dedha kolongara Na.
Ji'i pakab'ua Ne.
Ji'i koa-kio Ne.”
13 Èle èèna ka, ja'a tadèngi hari lii sod'a dhu leo èci. Lii sod'a ne, mai nèti aa'i-aa'i dhu mamuri ètu: sorga, dedha-liru, rai-haha, dènge d'ara dhasi. Rèngu aa'i-aa'i ra sod'a. Nèti era dhèu madhe kahèi, ra madhutu sod'a. Aa'i-aa'i ra sod'a, peka na,
“Ji'i koa-kio Ama Lamatua dhu madhèdi ètu dedha kadera paredha.
Ji'i nedhe padedha-dedha kahèi Ana Kalèbho ne.
Ji'i pakab'ua Rèngu.
Ji'i pahaha iisi mi Rèngu.
Lula Rèngu ka dhu rèd'u paredha taa-taa!
Aa koasa Ra dhu dènge boe too-lane!”
14 Hèia èpa badha aae se, loe boe dènge lii dhaa, peka na, “Tare'a-re'a! Lèke kèna!” Ka 24 (dua nguru èpa) katua se'e pabèbha hari iisi ra, hèia ra patitu kètu urutuu, ho ra pahaha iisi mi Ama Lamatua, dènge Ana Kalèbho èèna.