Lamatua Yesus pa'adhu lii moa hia juma'at ètu Sardis
3
Hèia Dhèu Rai-haha Tare'a-re'a ne lii hari dènge ja'a, aku nèngu Na, “Èu suri more hari ku sasuri leo èci, dhu isi na sèmi ne'e:‘Mi juma'at ètu kota Sardis:
Sasuri ne, nèti Ja'a, Yesus. Roh Ama Lamatua ètu Ja'a. Aa Roh ne, pidhu rupa. Ja'a dhu kèpe kahèi pidhu hua-hètu ètu d'ara ai Ja'a. Nanene lii padhai Ja'a.
Ja'a ke'a le tatao miu ètu Sardis. Dhèu peka, na, miu se mamuri madhutu dad'èi Ja'a, te ngaa miu nuka sèmi samanga aad'o ètu kètu. 2 De kèd'i ka! Pa'èra parcaya miu dhu oe èle na. Te Ja'a dhu parisa le ngaa dhu miu sab'a, abhu boe dhu mèci ètu madha Ama Lamatua. 3 De baku bhèlu lii aj'a-nori dhu mola, dhu miu nanene aa abhu nèti uru èèna. Madhutu paie-iie dad'èi Ama Lamatua, aa tèke eele sasala-sasigo miu sèra. Ladhe miu kèd'i malai boe, ho mi tao madhutu j'ara sèra, cag'ag'a laa Ja'a dhiu nuka sèmi dhèu mana'u dhu miu me'a mere boe.a
4 Te ngaa abhu cahag'e era nèti miu ètu Sardis dhu mamuri mola, nuka sèmi dhèu dhu pakaj'alu boe mèdha-papake ra. Lula miu mamuri mola, ka miu nia kako palere-lere dènge Ja'a, pake mèdha-papake pudhi. 5 Dhèu cee dhu taha madhutu Ja'a toke madhe, bèli-camèd'a nèngu pake mèdha-papake pudhi kahèi. Bèli-camèd'a Ja'a roso eele boe ngara na nèti d'ara sasuri dhu suri ngara dhèu aa'i-aa'i dhu èèna na mamuri taa-taa dènge Lamatua. Èèna na Ja'a mangaku ne ètu madha Ama Ku, dènge ètu madha ana pajuu Ama Ku ètu sorga, peka na, nèngu ne dhèu Ja'a.b
6 Nanene paie-iie, ngaa dhu Roh Lamatua peka dènge juma'at Na sèra.”’
Lamatua Yesus pa'adhu lii moa hia juma'at ètu Piladelfia
7 Ka Dhèu Rai-haha Tare'a-re'a ne lii hari, peka na, “Yohanis, èu hud'i suri more hari ku sasuri leo èci, dhu lii na sèmi ne'e ka:
‘Mi juma'at ètu kota Piladelfia:
Sasuri ne nèti Ja'a, Yesus. Ja'a dhu Mola-Mèci dènge dhu Lèke Tare'a. Ja'a ka dhu kèd'u gagoe dhèu aae Daud. Ladhe Ja'a bhoke kore babèdho, abhu boe ca dhèu sa bisa bèdho hari. Ladhe Ja'a bèdho kore, abhu boe ca dhèu sa bisa bhoke.c
8 Ja'a ke'a aa'i ngaa dhu miu tao. Ja'a ke'a kahèi, pangaru miu kapai boe. Masi ka sèmi èèna, miu pasili boe Ja'a, aa madhutu taruu lii a'aj'a Ja'a. Sanèd'e paie, te Ja'a dhu conge le babèdho hia miu, de dhèu èci sa bisa boe bèdho hari.
9 Nanene paie-iie! Te abhu dhèu leko-monya dhu peka na, rèngu sèra dhèu unu Lamatua. Te ngaa rèngu sèra, dhèu kapod'e-kabèli dhu madhutu dhèu aae nidhu. Pe me'a unu mi! Ja'a tao si, sèna ka ra dhiu patitu kètu urutuu ètu madha miu, aa ra mangaku na, Ja'a tare'a-re'a sue miu.d 10 Lula miu madhutu le paredha Ja'a, ka miu taha madhutu Ja'a, nèti èèna ka, Ja'a bhabhae miu nèti j'aj'èra dhu Lamatua neo hia mai, ho sèku dhèu aa'i-aa'i ètu rai-haha ne.
11 Nèbhu heka, Ja'a dhiu. De miu kèpe pa'èra-èra lii aj'a-nori Ja'a, dhu miu abhu le karèi nèti uru ka. Te mage dhoka abhu dhu parame rare rui-j'aj'èra dhu Lamatua neo b'ala hia miu. 12 Dhèu cee ka dhu taha madhutu Ja'a toke madhe, bèli-camèd'a nèngu pea taruu dènge Lamatua, sama sèmi agarii aae dhu titu mèno ètu d'ara Èmu Ama Lamatua. Pe Ja'a suri ngara Lamatua Ja'a, dènge ngara kota Lamatua ètu ngi'u dhèu ne. Kota èèna ra pangare, na, ‘Yerusalem Hiu’, dhu bèli-camèd'a Lamatua papuru mai nèti sorga. Aa èèna na, Ja'a suri kahèi ngara hiu Ja'a mi ngi'u dhèu ne.e
13 Nanene paie-iie, ngaa dhu Roh Ama Lamatua peka mi juma'at Na sèra.”’
Lamatua Yesus pa'adhu lii moa hia juma'at ètu Laodikia
14 Èle ka, Dhèu Rai-haha Tare'a-re'a ne, tuhu hari lii, peka na, “Yohanis, èu hud'i suri more ku sasuri dhu limuri tèka, dhu isi na sèmi ne'e ka:
‘Mi juma'at ètu kota Laodikia:
Sasuri ne nèti Ja'a, Yesus, dhu dhèu paroa na, ‘Tare'a sèmi èèna’. Ja'a ne loe boe padhai lii dènge mola Lii Holo-Nori Ama Lamatua. Dènge aa'i-aa'i dhu Lamatua ad'u-ue sèra, j'aj'aj'i ra nèti Ja'a.f
15 Ja'a ladhe kèdhi le tatao miu ètu Laodikia. Te ngaa miu sèmi ngaa mèro?! Pana aad'o, aa pacuhi aad'o kahèi. Ladhe pana, na, hud'i tare'a-re'a pana! Aa ladhe pacuhi, na, hud'i tare'a-re'a pacuhi! 16 Te ngaa, lula d'ara miu kajari, bèli-camèd'a Ja'a sabhuu eele miu nèti d'ara hèb'a Ja'a, sama sèmi dhèu sabhuu ilu.
17 Miu padhai lii padedha iisi, peka na, ‘Ji'i se, kaja-su'i. Ji'i mamuri be'a, kura boe ngaa-ngaa!’ Te ngaa madhutu iia-iia na, d'ara miu dhu bèdhu le, ka me'a heka mia ka dhu be'a. Nèti èèna ka, miu j'aj'i mi dhèu dhu dènge boe ngaa-ngaa, aa dhu dènge boe mèdha ètu ua mi. 18 De hua iia mai ho hèli mere poe-pai nèti Ja'a, sèna ka miu tare'a-re'a j'aj'i dhèu kaja-su'i. Aa hèli mere mèdha-papake pudhi, ho pahutu era makae mi. Aa hèli mere kahèi èi na'i musi madha, sèna ka roso mi musi madha miu, ho mèdhi mèu hari.
19 Ladhe dhèu pasue Ja'a tao sala, Ja'a kai aa huku si, sèna ka ra j'aj'i be'a. De miu hud'i pamola d'ara mi, ho madhutu Ja'a dènge d'ara kateme.g
20 Nanene paie-iie. Te Ja'a nuka titu ètu hèb'a èmu ne, aa Ja'a paroa taruu ho neo maso asa d'ara èmu. Ladhe dhèu cee dhu tadèngi lii Ja'a, ho na conge èmu, Ja'a dhiu asa d'ara, sèna ka madhèdi ta'a-tinu pa'èci. 21 Dhèu cee dhu taha madhutu Ja'a toke madhe, bèli-camèd'a Ja'a pangèd'u ne hak, ho nèd'u paredha bera-bera dènge Ja'a. Te Ja'a taha le madhutu Ama Ku kahèi, nèti èèna ka limuri ne Ja'a kèd'u paredha sama-sama dènge Ne.
22 Nanene paie-iie, ngaa dhu Roh Lamatua peka mi juma'at Na sèra.”’