Sasuri ne, nèti Ja'a, Yesus. Ja'a ka dhu kèd'u pidhu hua-hètu ètu ai g'ana Ja'a. Ja'a dhu kako palème kahèi laladhe pidhu labhu hualaa se cue-cue. Nanene paie lii padhai Ja'a.

2 Ja'a ladhe kèdhi le, j'ara mamuri miu ètu kota Epesus, peka na, miu sab'a bia hia Lamatua. Ladhe abhu dhèu bhelu ètu talora aae miu, miu soro tèke boe ne. Ladhe dhèu mai dadugu, peka na, nèngu dhèu pajuu-paleha Lamatua, miu parisa paie-iie mamuri na, sèna ka me'a na, nèngu ne dhèu kapod'e-kabèli. Hèia miu tule eele, aa nanene boe ne. 3 Masi ka dhèu paj'èra miu lula miu parcaya Ja'a, te ngaa miu taha taruu aa hari boe ciki sa.

4 Te ngaa Ja'a ladhe, na, miu manahu ètu ca madha j'ara. Lula uru èèna, lod'o miu hiu-hiu parcaya Ja'a, miu mamuri pasue èci dènge èci. Te ngaa limuri ne, miu sèmi heka èèna. 5 De miu hud'i sanèd'e hari ku j'ara uru èèna! Te limuri ne, miu pakaj'èu ae nèti j'ara uru èèna. De miu ae eele ka nèti sasala miu se'e, sèna ka mi pasue hari sèmi uru èèna. Te aad'o na, bèli-camèd'a Ja'a mai kore hari labhu hualaa èèna nèti miu. 6 Te ngaa d'ara Ja'a ako karej'e, lula miu tule eele lii aj'a-nori nèti Nikolai, dhu ana madhutu na sèra tao madhutu. Ja'a tule eele kahèi tatao kapod'e-kabèli ra sèra.^a

7 Nanene paie-iie, ngaa dhu Roh Lamatua neo peka dènge juma'at Na sèra. Dhèu cee dhu taha pa'èra madhutu Ja'a toke na madhe, pe Ja'a soro tèke na'a hua aj'u ètu d'ara talora oka Ama Lamatua. Te dhèu dhu na'a hua aj'u èèna, nèngu abhu mamuri taa-taa dènge Lamatua.”’^b

Sasuri ne, nèti Ja'a, Yesus. Aa'i-aa'i ra j'aj'i nèti Ja'a, karèi nèti uru ka toke d'ai èle. Uru èèna mema Ja'a madhe, te ngaa limuri ne, Ja'a mamuri hari le. De miu nanene lii padhai Ja'a ne.^c

9 Ja'a ke'a le j'aj'èra mamuri miu ètu kota Smirna. Masi ka ètu madha dhèu rai-haha, miu unu aad'o, te ngaa ètu madha Lamatua miu kaja. Abhu dhèu dhu mangaku, na, rèngu sèra dhèu unu Lamatua, te ngaa padhai lii pakarehe kolongara miu. Te ngaa madhutu iia-iia na, rèngu se unu boe Lamatua. Rèngu madhutu dhoka dhèu aae nidhu di. 10 De nanene paie-iie. Miu baku madha'u, ladhe abhu j'aj'èra era. Sad'i miu me'a, na, dhèu aae nidhu neo tenge dhèu ho kèpe miu cahag'e, sèna ka pamaso asa d'ara bèdho d'ai canguru lod'o. Dad'èi na, sèna ka miu rai tèke eele Ja'a. Masi ka nidhu neo pamadhe miu èèna ka, te ngaa miu baku bhèlu Ja'a kahèi. Te dhèu cee dhu taha madhutu Ja'a toke madhe, bèli-camèd'a Ja'a pala-bagi ne mamuri, sèna ka na mamuri taa-taa dènge Ja'a.

11 Nanene paie-iie, ngaa dhu Roh Lamatua neo peka dènge juma'at Na sèra. Dhèu cee dhu madhutu Ja'a toke madhe, èèna na nèngu abhu boe j'aj'èra ètu d'ara dhasi ai dhu heo robhe-robhe kura boe ciki sa èèna. Dènge sèmi ne'e, nèngu abhu boe mamadhe ka dua hari.”’^d

Sasuri ne, nèti Ja'a, Yesus. Ja'a ka dhu kèd'u samala rèka dua dhu madèka. Nanene lii padhai Ja'a.

13 Ja'a ke'a mèu le kota Pergamus miu èèna. Te, dhu nèd'u paredha ètu èèna, nuka dhèu aae nidhu. Masi ka sèmi èèna, te ngaa miu kèpe pa'èra kolongara Ja'a, aa parcaya taruu Ja'a. Uru èèna abhu dhèu Ja'a èci ètu èèna, ngara na Antipas. Nèngu aj'a lèke mola-mola j'ara mamuri Ja'a, te ngaa ra pamadhe ne. Masi ka sèmi èèna, te ngaa miu pasili boe Ja'a.

14 Te ngaa Ja'a ladhe, na, miu manahu ètu ca j'ara dua j'ara. Abhu nèti miu pèri-pèri dhèu dhu d'èi madhutu lii aj'a-nori nèti Balaam. Uru èèna Balaam aj'a Balak ho kakèj'i dhèu Isra'el, toke ra sisu dad'èi Lamatua. Balak kakèj'i dhèu Isra'el sèra, ho pae'a dènge ra'a-rinu mèdha sogo-tagu, aa ra tao j'ara makae dènge dhèu dhu j'aj'i boe dhèu èmu-kamali ra.^e 15 Abhu kahèi pèri-pèri dhèu nèti miu dhu madhutu lii aj'a-nori nèti Nikolai.^f 16 De miu hud'i loe ku nèti sasala-sasigo miu sèra. Ladhe aad'o, na, nèbhu heka Ja'a dhiu pad'ui miu dènge lii sakaa dhu nuka sèmi pare dènge samala.

17 Nanene paie-iie, ngaa dhu Roh Lamatua peka dènge juma'at Na. Dhèu cee ka dhu taha madhutu Ja'a toke madhe, pe Ja'a hia ne na'a roti manna nèti sorga dhu tèke paie iie ne. Pe Ja'a pangèd'u ne hèi, hadhu pudhi cue dhu suri tèke ngara hiu na. Dhodhoka nèngu mesa na di dhu ne'a ngara na; dhèu leo re'a boe.”’^g

Sasuri ne nèti Ja'a, Yesus, nuka Ana Ama Lamatua. Musi madha Ja'a heo lo'a-lo'a sèmi ai, aa haga Ja'a mea gèu-gèu sèmi tabaga ètu d'ara ai. Nanene ku lii padhai Ja'a.

19 Ja'a kèdhi le mamuri miu. Miu sue Ja'a tare'a, aa parcaya èra Ja'a kahèi. Miu madhutu taruu lii paredha Ja'a ho lalau-lalo'o dhèu. Masi ka dhèu paj'èra miu, te ngaa miu taha taruu. Ja'a ke'a kahèi, limuri ne miu sab'a bia risi hari hia Ja'a.

20 Te ngaa miu manahu ètu ca j'ara: miu sèmi mere dènge be'a, bhèni dhu ngara na Isabel, dhu padedha iisi peka na, nèngu èèna dhèu nèti lii padhai Lamatua. Ka miu hud'i na sène, aj'a j'ara-j'ara dhu lèke boe mi dhèu Ja'a. Lula lii a'aj'a na dhu kapod'e-kabèli èèna ka, dhèu Ja'a tao j'ara karehe dènge dhèu dhu j'aj'i boe dhèu èmu-kamali ra, aa ra'a nganga'a sogo-tagu. 21 Ja'a dhu kai le bhèni èèna pèri-pèri hari le, sèna ka ele-ho'a nèti sasala na, te ngaa na d'èi boe.

22 De ladhe paie-iie. Te Ja'a pama'ète kore le, ho hia ne lèke papèd'a èci, toke na bisa boe puru nèti era j'unu na. Sèmi èèna kahèi dènge rèngu dhu j'unu pa'èci dènge ne. Ladhe rèngu tèke eele boe bhèni aapa ne, nèbhu boe Ja'a huku si kahèi. 23 Èèna na Ja'a pamadhe aa'i ana-ana nèti bhèni aapa ne. Dènge j'ara ne'e, dhèu-dhèu parcaya sèra re'a, na, Ja'a ne ke'a aa'i d'ara dhèu. Pe Ja'a b'ala miu madhutu tatao dhu miu ad'u-ue.^h

24 Te ngaa miu cahag'e ètu Tiatira sèra, dhu madhutu boe lii a'aj'a bhèni aapa ne. Miu tule eele le a'aj'a dhu pahuni èèna, dhu ra peka na, ‘ilmu maroga nèti dhèu aae nidhu’. Nèti èèna ka, Ja'a parluu heka kai miu, 25 sad'i miu kèpe pa'èra-èra lalèka miu mi dedha Ja'a, toke Ja'a lèpa hari mai. 26-28 Dhèu cee dhu taha madhutu Ja'a toke madhe, pe Ja'a hia ne koasa. Koasa èèna kapai, nuka sèmi koasa dhu Ja'a abhu nèti Ama Ku, ho paredha dhèu ètu rai-haha ne dènge tatea bèsi. Ladhe abhu dhu lab'a ne, pe na ab'o palaho si, nuka sèmi dhèu pamae èru rai.ⁱ Èèna na, Ja'a hia miu hua-hètu dhimu kahèi.

29 Nanene paie-iie, ngaa dhu Roh Lamatua neo peka dènge juma'at Na sèra.”’