Ja'a suri ètu d'ara sasuri ne'e, ngaa dhu j'aj'i bèli-camèd'a. Ja'a ke'a j'ara se'e se, sèmi ne'e ka: Ama Lamatua mesa Na ka dhu peka tèke mi Yesus Kristus. Hèia Ama Lamatua pua Yesus ho lole mi dhèu unu Na sèra. Èle èèna ka, Yesus pua ana pajuu Na ca dhèu nèti sorga, mai bhoke pad'elo j'ara se'e aa'i-aa'i mi ja'a, sèna ka ja'a suri mema. Te nèbhu heka j'ara aa'i-aa'i se, tatu j'aj'i. De nanene paie-iie Lii Holo-Nori Ama Lamatua dhu Yesus peka ne.

3 Dhèu aa'i-aa'i dhu baca sasuri ne'e toke dhèu bisa nanene, na, rèngu oto titu kèna. Aa dhèu dhu nanene isi na, aa tao madhutu sèmi dhu na moa, rèngu oto kahèi. Te lod'o mamai na dètu ae le.

4 Lii maho'o nèti ja'a, hia mi pidhu juma'at ètu propensi Asia.

Ja'a manèngi sèna ka Ama Lamatua pad'elo d'ara hua iia Na hia miu, ho miu mamuri padame dènge mera-milu. Te Ama Lamatua abhu mema le, karèi nèti uru ka. Nèngu dhu deo ne'e, bèli-camèd'a, toke d'ai mia-mia. Ja'a manèngi kahèi sèna ka Roh Na dhu Mola-Mèci pad'elo d'ara hua iia Na hia miu, ho miu mamuri padame dènge mera-milu. Ja'a ladhe kèdhi Roh Mola-Mèci ne, nuka sèmi abhu pidhu roh sa dhu patangara dènge kadera paredha Ama Lamatua.^{a b} 5 Ja'a manèngi kahèi ho Yesus Kristus pad'elo d'ara hua iia Na hia miu, sèna ka miu mamuri padame dènge mera-milu. Nèngu ne loe boe padhai lii paled'a j'ara-j'ara dhu Ama Lamatua peka dènge Ne. Uru èèna Na madhe, te ngaa Ama Lamatua pamamuri hari Ne, ka Na j'aj'i dhèu uru tèka, dhu mamuri hari nèti mamadhe. Pe Nèngu ka dhu paredha dhèu aae aa'i-aa'i ètu rai-haha ne.

Lula Yesus sue èdhi, nèti èèna ka Na pasuti raa Na hia mi èdhi. Nèti mamadhe Na, Na bhoke j'ara sèna ka patabuli èdhi nèti koasa sasala-sasigo èdhi.^c 6 Ka Na ded'e nare èdhi, j'aj'i ana kabarai Na, sèna ka èdhi sab'a hia Ama Na, Ama Lamatua. Yesus Kristus ne, kapai titu kèna, lula koasa Na èle boe. Lèke sèmi èèna!^d

7 De bhoke musi madha ho ladhe paie-iie! Yesus dènge Ama Na, limuri ne ètu sorga nèi. Te ngaa nèbhu heka Na puru mai d'ara ra'i-liru. Dhèu aa'i-aa'i ètu rai-haha, èèna na ladhe rèdhi Ne, sèmi èèna kahèi dènge rèngu dhu uru na kèj'i Ne. Bèli-camèd'a dhèu aa'i-aa'i nèti mia-mia ètu rai-haha ne manyasa, aa tangi d'ara pèd'a, lula tadhe Ne. Se'e se, mema tare'a-re'a j'aj'i. Lèke tare'a sèmi èèna.^e

8 Ama Lamatua peka na,

9 Lula èdhi aa'i-aa'i ti parcaya, na, Yesus ne Dhèu Aae èdhi, nèti èèna ka èdhi pa'a'ari. Abhu dhèu leo dhu nasa kahèi lula èdhi madhutu Yesus, ka rèngu paj'èra èdhi aa'i-aa'i ti. Te ngaa Yesus pa'èra d'ara èdhi, ka bisa taha taruu. Lula ja'a aj'a-nori le dhèu lula-nèti Lii Holo-Nori Ama Lamatua aa lole j'ara-j'ara lula-nèti Yesus, ka abhu dhèu dhu tèka d'ara. Nèti èèna ka, limuri ne ra kèpe rare ja'a, ka hue eele asa pulu Patmos ne'e. 10 Ka d'ara ca lod'o, lèke dènge lod'o manèngi-mangaj'i, ja'a abhu Roh Ama Lamatua. Kaca'a laa, ja'a tadèngi lii rodhe nèti kabodho. Lii èèna nuka sèmi lii tiu tèbhe sa. 11 Lii ne, pua ja'a, peka na, “Yohanis! Ja'a neo bhoke j'ara èci, ho pad'elo dènge èu. Aa'i-aa'i dhu èu ladhe mèdhi se, èu hud'i suri more ku. Èle èèna, èu hud'i pa'adhu hia pidhu juma'at, nuka ètu kota Epesus, kota Smirna, kota Pergamus, kota Tiatira, kota Sardis, kota Piladelfia, dènge kota Laodikia.”

12 Ropa tadèngi kore lii ne'e, ja'a kabib'a asa kabodho, neo ke'a cee ka dhu lii deo na. Te ngaa ja'a kèdhi labhu èi mènyi pidhu bua dhu pamadhèdi ètu dedha tatèka labhu, dhu tao nèti hualaa. 13 Abhu Dhèu èci dhu titu ètu talora aae labhu se'e. Rèhu Na nuka sèmi Dhèu Rai-haha Tare'a-re'a. Na pake kodho èci dhu robho d'ai rai, aa dhu cape dènge saledha hualaa ca bèla ètu kakara Na.^g 14 Rèu kètu Na pudhi lao-lao nuka sèmi rèu kahib'i-kalèbho pudhi.^h Musi madha Na heo lo'a-lo'a sèmi ai.ⁱ 15 Haga Na mea gèu-gèu sèmi tabaga dhu tunu ètu d'ara ai karoo. Lii Na kadèru sèmi lii bèbhe naha dhasi kapai.^j 16 Ètu ai g'ana, Na kèpe dènge hua-hètu pidhu bua. Nèti hèb'a Na, bhodho samala èci dhu dua rèka dhu madèka. Rèhu Na cèb'a-cèb'a nuka sèmi madha lod'o dhu re mèu rai.

17 Ropa ja'a ladhe kèdhi Dhèu ne'e, hèia ja'a bèbhe dènge ka sèmi dhèu dhu madhe ètu haga Na. Te ngaa Na gai ja'a dènge ai g'ana Na, hèia Na lii peka na, “Ana, ee! Baku madha'u! Te aa'i-aa'i se kapua ra nèti Ja'a, karèi nèti uru toke d'ai èle.^k 18 Uru èèna, mema Ja'a madhe, te ngaa limuri ne, èu ladhe ku laa! Ja'a mamuri hari le, aa èèna na mamuri taa-taa. Aa Ja'a ka dhu kèd'u gagoe dhu bisa bhoke era pea dhèu madhe, sèna ka pamamuri hari si. 19 Èu hud'i suri more aa'i ku dhu ladhe mèdhi se, aa suri kahèi ngaa dhu j'aj'i bèli-camèd'a. 20 Ja'a peka uuru ku sasoa na: labhu hualaa pidhu bua se, nuka pidhu juma'at. Aa pidhu hua-hètu dhu èu mèdhi ètu ai g'ana Ja'a ne, nuka ana pajuu dhèu pidhu nèti sorga dhu rèti lii Ama Lamatua hia mi pidhu juma'at sèra.”