2 Ja'a manèngi sèna ka Ama Lamatua j'aga èu, ho èu baku isi-noso kètu-kabo'o, aa d'ara èu be'a-be'a. 3 Abhu pèri-pèri a'ari dhu mai lolo dènge ja'a, peka na, èu madhutu taruu j'ara mamuri dhu lèke nèti Ama Lamatua. Ropa tadèngi sèmi èèna, d'ara ja'a karej'e titu kèna. 4 Te ja'a karej'e risi eele, ladhe tadèngi ana-ana ja'a mamuri madhutu j'ara dhu lèke.

5 Angalai pasue! Èu pakako le sasab'a Ama Lamatua dènge be'a, ropa èu sèmi more dènge hua iia a'ari dhu kako palème ho pakako sasab'a Kristus. Masi ka èu tadhe mèka si, te ngaa sèmi more si dènge be'a. 6 Dhèu dhu lèpa hari mai, palolo hia juma'at ètu ne'e, peka na, èu sèmi more dènge be'a, aa sue si. Limuri ne, ja'a manèngi ho èu soru-bara taruu dhèu sèmi sèra, te èèna ka dhu pakarej'e d'ara Ama Lamatua. 7 Rèngu loe boe kako palème sèna ka aj'a-nori dhèu nèti j'ara mamuri Yesus Kristus. Te ngaa rèngu sèmi boe bantuan ngaa-ngaa nèti dhèu dhu parcaya boe Kristus. 8 De mema dhu lèke kèna, ladhe èdhi ka dhu soru-bara si. Te dènge j'ara ne, èdhi pakako sasab'a Lamatua sama-sama dènge rèngu.

9 Uru èèna, ja'a pa'adhu le sasuri hia juma'at ètu èèna, te ngaa Diotrefes padedha iisi na nuka sèmi dhèu aae-dhèu kapai. Aa na d'èi boe nanene ja'a. 10 De ladhe ja'a dhiu, èèna na ja'a bhoke paled'a-led'a ngaa dhu nèngu ad'u-ue. Te na padhai lii pod'e-ed'o sèna ka neo pamanahu èdhi. Risi-risi hari, na tule eele dhèu-dhèu unu Lamatua dhu dhiu asa èèna. Hèia na kakèj'i a'ari ètu èèna kahèi, ho baku sèmi rare dhèu sèra.

11 Angalai pasue! Èu hud'i madhutu ku tatao dhèu dhu tao j'ara be'a. Baku madhutu dhèu dhu ad'u-ue bhelu-katub'a. Te dhèu dhu tao j'ara be'a, rèngu sèra dhèu unu Ama Lamatua. Te ngaa dhèu dhu ad'u-ue j'ara bhelu-katub'a, tadhe boe Ama Lamatua.

12 Ladhe sèku Demetrius. Dhèu aa'i-aa'i koa-kad'iri ne lula na madhutu mola-mola j'ara mamuri Lamatua dhu lèke. Ja'a koa ne kahèi, aa èu me'a, na, ja'a monya boe.

13 Abhu j'ara ae-ae era dhu ja'a neo peka dènge èu, te ngaa ja'a suri boe ètu d'ara sasuri. 14 Te ja'a sanao, nèbhu heka èdhi paraga, sèna ka èdhi dua ti bisa padhai lii patoo madha dènge madha.

15 D'ai uuru ku sange ne'e. A'ari ètu ne'e pa'adhu lii maho'o. Mèti ku lii maho'o ja'a hia mi a'ari aa'i-aa'i ètu èèna, ca dhèu-dhèu ka dènge ngara na.