Dhèu Yahudi mai tao lii langu dènge Paulus ètu Kaisarea
24
Èle lèmi lod'o, hèia dhèu-dhèu Yahudi dhu neo tao lii langu dènge Paulus, mai d'ai kota Kaisarea. D'ara kaboko rèngu èèna, abhu dhèu èci, ngara na Ananias, dhu j'aj'i kètu kapai risi agama Yahudi. Dhèu kapai dhu leo sèra madhutu kahèi. Rèngu mai dènge dhèu èci, ngara na Tertulus. Dhèu èèna, d'èlu-mèu padhai lii. Nèti èèna ka, ra rare ne j'aj'i tuka padhai lii, ho lab'a Paulus. 2-3 Ropa dhèu sèra aa'i-aa'i ra tesa ètu era parisa lii langu èèna, hèia gubernur pua rèti Paulus asa d'ara mai. Hèia Tertulus kèd'i titu, neo padhai lii pamanahu Paulus. Ka na hia hormat mi gubernur, ka na j'oka padhai lii, aku nèngu na,‘‘Ama gubernur dhu ja'a pakab'ua! Nèbhu nare sèmi ne'e, mulai ama mèd'u paredha ètu ne'e, ama dhu me'a uuru le, ngaa dhu be'a hia ji'i. Aa ama tao babe'a ae le kahèi, toke ji'i dhèu Yahudi bisa mamuri dènge mera-milu, karej'e-karae, aa dènge boe lii langu. Nèti èèna ka, ji'i pake lod'o ne'e, sèna ka manèngi makasi ae-ae mi ama gubernur. Dhèu cee hari ka dhu bisa tao be'a ae ètu mia-mia, sama sèmi ama ne. 4 Te ngaa ja'a padhai lii pamadhera heka, ja'a kore dhoka isi di. De ja'a manèngi ama nanene paie-iie, j'ara-j'ara dhu ja'a neo peka lula-nèti Paulus ne.
5 Sèmi ne'e ku, ama. Madhutu a'abhu ji'i dhèu Yahudi, Paulus ne èci èèna ka dènge èi papèd'a dhu rai nèti era èci asa era èci la'e. Nèngu ne, d'èi palab'a dènge agama ji'i, aa tuka pa'ele iie ad'a ji'i ètu mia-mia. Nèngu la'e asa era mia èèna ka, tatu dhèu Yahudi hud'i tao ku lii langu èci dènge èci. Nèngu ne tuka dadugu-rariu nèti partei agama dhu madhutu ca dhèu nèti Nasaret, dhu ji'i pangare na, ‘partei Nasrani’. Te ngaa dhu rèngu aj'a sèra, pasala kapai dènge agama ji'i. 6 Dhèu ne'e ne, neo pakaj'alu Èmu Kapua Manèngi-Mangaj'i ji'i dhu mola-mèci èèna. Aa nèti dènge dhèu dintiu asa d'ara la'e. Nèti èèna ka, ji'i kèpe ngare ne. [Madhutu dad'èi ji'i, ji'i neo huku ne, pake atora ji'i unu mi. 7 Te ngaa komedhaa Lisias mai ère nare ne nèti kacui-aai ji'i. 8 Hèia na paredha, peka na, ladhe abhu dhèu dhu neo tao lii langu dènge Paulus, hud'i lasi ku asa madha ama gubernur ètu Kaisarea. Madhutu dad'èi na, sèna ka ama gubernur unu mu ka dhu uri lii èèna.]a Ka limuri ne, ji'i mai asa ne'e, sèna ka ama parisa lii ne. Pe èèna na, ama unu mu me'a ngaa dhu ji'i lole ne, mema lèke tare'a-re'a.
D'ai sange èèna ka. Makasi ae.’’
9 Ropa Tertulus padhai lii nare, ka dhèu Yahudi leo sèra, re lii padhai lii na kahèi, aku rèngu na, ‘‘Tare'a, ama! Dhu lèke kèna!’’
Paulus siri iisi na ètu madha gubernur Feliks
10 Hèia gubernur paredha Paulus, aku nèngu na, ‘‘Ne'e ne, ja'a hia èu tebho ho siri iisi èu.’’
Hèia Paulus kèd'i titu, ka na ded'e lii padhai, aku nèngu na, ‘‘Ama gubernur! Ama paredha nèbhu le ètu propensi ji'i ne. De ama dhu me'a le tare'a-re'a, j'ara mamuri ji'i dhèu Yahudi, tasa mera mia. Nèti èèna ka, ja'a madha'u boe siri iisi ètu katanga madha ama. 11 Pe d'ai canguru dua lod'o dhu la'e èèna, ja'a laku asa Yerusalem ho sabaj'a ètu d'ara Èmu Kapua Manèngi-Mangaj'i. Ama bisa karèi sèku dhèu-dhèu dhu sabaj'a sama-sama dènge ja'a lod'o èèna. 12 Ètu d'ara Èmu Kapua Manèngi-Mangaj'i, ja'a pab'ala boe dènge ca dhèu sa. Aa ètu d'ara èmu sabaj'a dhu leo sèra kahèi, ja'a oru kore boe dhèu ho tao maruru. Sèmi èèna kahèi, ètu Yerusalem, ja'a pakaco boe.
13 Te ngaa limuri ne, dhèu se neo pamanahu ja'a. Ngaa dhu ra padhai lii deo sa, lèke boe, lula dènge boe bukti. 14 Sèmi ne'e ka, ama gubernur. Ja'a hud'i mangaku ku mi ama, ngaa èci. Ja'a dhu madhutu partei hiu èci, dhu dhèu pangare na ‘J'ara Mamuri Lamatua Yesus’. Ja'a sabaj'a mi Ama Lamatua, sama sèmi bèi-baki ja'a sèra sabaj'a mi Nèngu. Ja'a madhutu kahèi atora aa'i-aa'i nèti baki Musa, dènge parcaya tare'a-re'a ngaa dhu dhèu rèti lii padhai Ama Lamatua uru-uru sèra, suri tèke hia ji'i. 15 Ja'a sanao-maena mi Ama Lamatua, sama sèmi rèngu dhu titu ètu se'e se, ho ra lab'a ja'a ne. Ji'i se parcaya, na, bèli-camèd'a Ama Lamatua pamamuri hari dhèu madhe: dhèu be'a, do bhelu-katub'a, èci èèna ka. 16 Nèti èèna ka, ja'a ma'ète boe tenge j'ara, sèna ka ja'a bisa mamuri dènge d'ara mola ètu katanga madha Ama Lamatua, aa dhèu rai-haha kahèi. Dènge sèmi èèna ka, dhèu èci sa bisa boe pamanahu ja'a.
17 Ja'a sab'a pèri-pèri tèu kèna, ètu li'u rai Isra'el, ka ja'a heka lèpa asa Yerusalem kèna. Lod'o ja'a mai èèna, ja'a kèti doi dhu dhèu pakaboko sèna ka bantu dhèu-dhèu ji'i dhu mamuri j'èra. Èle ka, ja'a laku asa Èmu Kapua Manèngi-Mangaj'i ho neo sabaj'a, aa hia korban rupa-rupa mi Ama Lamatua ètu èèna. 18 Ropa ja'a pamèu iisi ètu d'ara Èmu Kapua Manèngi-Mangaj'i madhutu j'ara ad'a ji'i, ka rèngu mai ho neo kèpe ja'a. Te ngaa lod'o èèna, dhèu ae boe ètu sèra, aa èci sa dhu tao pakaco boe ngaa-ngaa!b 19 Dhu ètu èèna, dhoka pèri-pèri dhèu Yahudi nèti propensi Asia, dhu mai neo sabaj'a ètu èèna kahèi. De ladhe rèngu sèi dhu neo tao lii langu dènge ja'a, rèngu sèra ka dhu hud'i mai tao lii langu dènge ja'a ku ètu ne'e. Ama se'e se, aad'o! 20 Te ngaa dhèu sèi cèu boe. De ama karèi ku si, sasala ja'a ngaa? Uru èèna, lod'o rèngu parisa lii ja'a ètu era parisa lii langu agama èèna, rèngu abhu boe sasala ja'a èci sa hèi. De ama ku karèi sèku rèngu! 21 Dhoka ele boe ca j'ara di, dhu tao ngangee rèngu kaco, aa ra d'èi boe ja'a. Ropa ja'a padhai lii dènge lii aae, peka na, ‘Miu neo huku ja'a, lula ja'a parcaya, na, Ama Lamatua bisa pamamuri hari dhèu madhe!’’’c
22 Paulus padhai lii sèmi èèna, te ngaa, lula gubernur Feliks tadèngi ae le kahèi lula-nèti ‘J'ara Mamuri Lamatua Yesus’, ka na katange eele sidang èèna, ka na peka, aku nèngu na, ‘‘Sèmi ne'e ka! Ja'a neo paroa komedhaa Lisias, ho nanene uuru ku lii lolo nèngu. Ladhe ja'a padhai lii kore ku dènge nèngu, heka ja'a pama'ète lii ne'e kèna.’’ 23 Ka na pua ama sordad'u ca dhèu la'e taha Paulus. Te ngaa na paredha, sèna ka ako hia ne bebas ciki, aa baku kai mone-aanga angalai na sèra mai lalau ne.
Paulus padhai lii dènge gubernur Feliks, dènge dhèu èmu na Dorsila
24 Dhèu èmu gubernur Feliks, dhèu Yahudi, ngara na Dorsila. Pèri-pèri lod'o dhu la'e èèna, gubernur tenge lod'o dhu hua iia, sèna ka nèngu dènge dhèu èmu na neo padhai lii dènge Paulus. Ka na pua sèna ka dhèu rèti ne mai asa madha rèngu dua ra. Hèia Paulus lole dènge ra, j'ara tasamia sèna ka dhèu bisa parcaya Yesus Kristus, Dhèu dhu Lamatua moa nèti uru ka mai. 25 Na peka kahèi j'ara tasamia ho dhèu bisa muri mola, aa tasamia ho dhèu bisa j'aga ngi'u, sèna ka baku tao sala. Na lole kahèi, bèli-camèd'a Ama Lamatua pama'ète lii langu mi dhèu aa'i-aa'i ra, peka na, lèke, do sala.
Ropa Feliks tadèngi nare sèmi èèna, ka na madha'u. Hèia na peka, aku nèngu na, ‘‘Paulus! D'ai sange èèna ka laa! Ladhe abhu lod'o taleo, na, ja'a paroa hari èu.’’ 26 Lod'o èèna, gubernur Feliks tenge-tenge j'ara, sèna ka Paulus palèke ne doi, ho na patabuli eele ne. Nèti èèna ka, na paroa taruu Paulus, ho padhai lii dènge ne.
27 Te ngaa re j'ara leo, gubernur Feliks neo ère d'ara kètu agama Yahudi sèra kahèi. Nèti èèna ka, na pama'ète boe lai-lai lii Paulus ne'e. Na soro tèke lii ne'e sène, toke d'ai dua tèu. Èle èèna ka, abhu dhèu hiu dhu gati eele gubernur Feliks. Ngara na Porkius Festus. Te ngaa rèngu taha taruu Paulus.