Paulus si lasi hari asa propensi Makedonia
20
Ropa dhèu sèra maruru heka, kota Epesus j'aj'i be'a hari sèmi uru èèna. Hèia Paulus kaboko nare dhèu parcaya ètu sèra, ka na pa'èra d'ara si. Èle ka, na palangu lii, hèia pakèd'i asa propensi Makedonia. 2 D'ai era ne'e, la'e palème rae-rae, ho pa'èra d'ara dhèu parcaya sèra. Na tao sèmi èèna, toke d'ai kabarai Yunani. 3 Na pea ètu èèna, tèlu hèru. Èle ka, na pa'èra hari neo pakèd'i dènge kapa asa propensi Siria, te ngaa na tadèngi, na, dhèu Yahudi rare lii èci neo pamadhe ne. Ropa na tadèngi nare sèmi èèna, ka d'èi heka la'e taruu asa propensi Siria. Te ngaa la'e re propensi Makedonia.4 Abhu pèri-pèri dhèu dhu madhutu Paulus. Rèngu se nuka: Sopater, ana nèti Pirus, nèti kota Berea; dhèu dua nèti kota Tesalonika, ngara ra, Aristarkus dènge Sekundus; ca dhèu nèti kota Derbe, ngara na Gayus; aa dhèu tèlu nèti propensi Asia, nuka: Timotius, Tikikus, dènge Trofimus.
5-6 Èle èèna ka, ja'a (Lukas, dhu suri sasuri ne), paraga hari dènge Paulus ètu kota Pilipi ètu propensi Makedonia. Ka ana-ana madhutu Paulus lasi uuru asa kota Troas, ho ra mate ji'i dua mi ètu cabèka dhasi nèi. Lod'o èle kalela Paska dhèu Yahudi,a ji'i dua mi ca'e kapa ka pakèd'i asa kota Troas. Lod'o èèna, ji'i lèmi lod'o kateme ètu dedha kapa. Ropa ji'i d'ai Troas, ji'i puru nèti kapa. Hèia ji'i paraga hari dènge anga dhèu leo sèra, ka ji'i pea ètu èèna, ca migu.
Ana mone èci, ngara na Yutikus, manahu nèti jendela ètu kota Troas
7 Lod'o èèna, lèke dènge hari Migu. Paulus pama'ète nare le, peka na, ‘‘A'ari. Bèli ja'a neo laku taruu.’’ De ji'i, dhèu parcaya aa'i-aa'i, pakaboko ho neo nga'a-nginu. Lula Paulus neo pakèd'i, nèti èèna ka, na padhai lii dènge ji'i toke d'ai talora mèdha. 8 Ji'i pakaboko ètu tad'a ka tèlu nèti èmu cue. Mèda èèna, ra paheo labhu ae. 9 Lod'o èèna, ana mone èci, ngara na Yutikus,b dhu madhèdi ètu jendela. Nèngu nanene kahèi lii padhai Paulus. Te ngaa nèbhu-nèbhu ka, ana mone ne musi madha sakaa, hèia na bhèj'i luu. Cag'ag'a laa, na manahu nèti jendela èèna asa rai la'e. Ka madhe mema. 10 Hèia Paulus puru la'e, ka liku nare ana mone ne. Hèia na peka, ‘‘Pa'èra d'ara! Te na mamuri.’’ 11-12 Ji'i aa'i-aa'i mi karej'e, lula ana ne mamuri hari. Ka pakako rèti ne asa èmu na. Hèia ji'i aa'i-aa'i mi ca'e hari asa èmu dedha, ho madhèdi nga'a. Ka Paulus padhai lii hari toke d'ai bèli mad'ae èèna. Ropa lod'o rea, ji'i palangu lii ho pakèd'i.
Nèti kota Troas ji'i la'a asa kota Miletus
13 Èle èèna ka, ji'i ngare lii èci, sèna ka pahag'a ho èèna na paraga hari ètu kota cue, ngara na Asos. Hèia ji'i ca'e kapa la'a asa Asos. Te ngaa Paulus kako haga asa nèi la'e.
14 Ropa ji'i paraga hari dènge Paulus ètu Asos, hèia Paulus ca'e asa dedha kapa la'e, aa ji'i pakèd'i taruu asa kota Metilene. 15 Nèti Metilene, ji'i pakèd'i taruu dènge kapa. Ka asa bèli èèna, ji'i padètu-dètu dènge pulu èci, ngara na Kios. Asa camèd'a èèna, ji'i patangara dènge pulu Samos. D'ai camèd'a èci èèna, ji'i panahu ètu hèb'a-namo Miletus. 16 Te ngaa Paulus neo d'ai lai-lai Yerusalem, ho na madhutu lod'o kalela Pantekosta ètu nèi. Na neo boe la'e asa kota Epesus, lula nèngu abhu heka tebho.
Paulus peka-padhai dènge kètu juma'at sèra ètu kota Epesus
17 Nèti Miletus, Paulus hia lii la'e asa kètu juma'at sèra ètu Epesus, sèna ka rèngu mai paraga dènge ne. 18 Ropa rèngu d'ai nèi, hèia Paulus peka dènge ra, aku nèngu na, ‘‘A'ari aa'i-aa'i! Miu me'a le j'ara mamuri ja'a, karèi nèti lod'o partama ja'a d'ai propensi Asia, d'ai sange ne'e ne. 19 Miu me'a le kahèi ja'a ne sab'a bia ètu talora aae miu, te ngaa ja'a padedha boe iisi. Ètu d'ara sasab'a-la'a ja'a ne, ja'a pahaa èi madha ae titu kèna, dènge dui j'èra dhu ciki boe. Ja'a abhu j'aj'èra ae nèti ngangee karehe dhèu Yahudi sèra. 20 Lod'o ja'a aj'a-nori miu, ja'a lole aa'i mèu-mèu ngaa dhu be'a dhu ja'a ke'a kèdhi hia miu. Aa ja'a aj'a kahèi miu dhu pahuni boe ètu madha dhèu ae. Ja'a maso-kalua nèti èmu èci asa èmu èci, ho pasanèd'e dhèu sèra lula-nèti dad'èi Lamatua. 21 Ja'a peka kahèi mi dhèu Yahudi dènge dhèu leo sèra, peka na, rèngu loe eele ka nèti sasala-sasigo rèngu, ho madhutu Ama Lamatua. Aa rèngu hud'i parcaya kahèi Kètu èdhi, nuka Lamatua Yesus.
22 De ja'a neo peka sèmi ne'e ka: limuri ne, ja'a neo laku asa Yerusalem, lula Roh Lamatua lere nèti ja'a laku asa nèi. Ja'a ke'a dhoka madhutu di, masi ka ja'a ke'a boe bèli-camèd'a ngaa ka dhu j'aj'i mi dedha ja'a ètu nèi. 23 Te, nèti kota cue asa kota cue, Roh Lamatua dhu Mola-Mèci peka uuru le dènge ja'a, èèna na ra pamaso ja'a asa d'ara bèdho, dènge ja'a pasae j'aj'èra ae ètu nèi. 24 Ka ja'a ke'a mema le, lula Lamatua Yesus ka dhu hia ja'a dui sasab'a ne ètu kabela-kao ja'a, sèna ka ja'a laku lole Lii Lolo Be'a, peka na, Lamatua sue èdhi, aa d'ara Na hua iia kahèi dènge èdhi. Ladhe ja'a madhutu boe dad'èi Na, ho pa'èle sasab'a Na ne'e, ja'a ngee, na, mamuri ja'a guna boe ngaa-ngaa ciki sa.c
25 Limuri ne, ja'a ke'a le, peka na, bèli-camèd'a miu se mèdhi heka rèhu ja'a. Masi ka ja'a dhu nèbhu ae le aj'a-nori miu, sèna ka dènge j'ara tasamia miu j'aj'i dhèu unu Lamatua. 26-28 Nèti èèna ka, miu nanene paie. Ja'a pa'èle le sasab'a-la'a ja'a mi miu. De limuri ne, miu ka dhu pakako taruu sasab'a èèna. Nèti èèna ka, ladhe abhu ètu talora miu, dhu j'aj'i mèka dhèu unu Lamatua, èèna na, miu tago mere. Èèna na, sasala ja'a aad'o heka. Sanèd'e paie! Ja'a peka le dènge miu dad'èi Lamatua aa'i-aa'i. Ja'a pahuni boe èci sa. De miu hud'i laladhe paie mamuri miu, aa j'aga paie-iie dhèu-dhèu dhu Roh Lamatua dhu Mola-Mèci pangèd'u mi miu ho ladhe-leru si. Baku bhèlu, peka na, Lamatua Yesus madhe le ho sui pama'ète dhèu sèra dènge raa Nèngu mesa Na. Nèngu ka dhu paj'uj'u le miu, sèna ka ladhe-leru si, sama sèmi ana madhenga badha dhu lalau-lalo'o kahib'i-kalèbho ra.
29 De limuri ne, ja'a neo tèke eele miu kèna. Te ngaa sanèd'e! Bèli-camèd'a dhèu mai rèti lii holo-nori dhu leko-leo asa talora aae miu. Rèngu maso mai nuka sèmi busa hui dhu maso asa d'ara oka kahib'i-kalèbho. 30 Abhu dhèu dhu kapod'e-kabèli sèmi èèna, dhu mai nèti li'u. De sanèd'e! Abhu kahèi dhu cèu nèti talora aae miu. Ho ra aj'a miu lèke-lèke boe. Ra d'èi sèna ka dhèu madhutu rèngu. Nèti èèna ka, ra tenge j'ara ho nuni rèti dhèu, sèna ka baku madhutu ia ka Yesus. 31 Nèti èèna ka, miu hud'i j'aga paie mamuri miu. Baku bhèlu, te ja'a pa'èci le dènge miu tèlu tèu kèna. Ja'a holo le miu mèda-mèu, dènge pangee boe j'aj'èra ja'a. Èi madha ja'a suti ae le, lula miu.
32 D'ai le lod'o èdhi pacèri kèna. De ja'a pangèd'u miu asa adhe-aai Lamatua, sèna ka Na ladhe-leru miu. De miu hud'i kèpe pa'èra ku aa'i-aa'i dhu nèti uru èèna ja'a peka le dènge miu, nèti babe'a d'ara Lamatua. Lamatua dènge koasa ho pa'èra d'ara miu. Na moa le kahèi, ho hia mamèngi mi dedha dhèu unu Na. De ladhe miu madhutu taruu Nèngu dènge d'ara mera-milu, tatu miu abhu mamèngi Na kahèi.
33 Lod'o ja'a sab'a ètu talora aae miu, ja'a neo boe unu mèdha-panyau miu èci sa. Ja'a manèngi boe mèdha hualaa miu, do, doi iia miu, do, mèdha-papake miu, do, ngaa èci sa. 34 Miu me'a kahèi, lod'o ja'a pea dènge miu, ja'a sab'a d'ai madhe, sèna ka ja'a bisa mamuri. Hia boe ja'a mesa ku, te ngaa rèngu dhu madhutu ja'a sèra abhu pala kahèi. 35 De dènge j'ara aa'i-aa'i se, ja'a pad'elo le j'ara, sèna ka miu kahèi madhutu soru-bara dhèu dhu unu aad'o sèra. Sanèd'e paie lii padhai Lamatua Yesus, dhu peka na, ‘Be'a risi, èdhi hia, nèti èdhi sèmi tare.’’’
36 Ropa Paulus padhai lii nare sèmi èèna, hèia na patitu kètu urutuu, ka na manèngi-mangaj'i dènge rèngu, aa na manèngi, sèna ka Lamatua ladhe-leru rèngu aa'i-aa'i ra. 37-38 Ka d'ara rèngu aa'i-aa'i ra pèd'a titu kèna lula Paulus peka, na, bèli-camèd'a rèngu paraga heka dènge ne. Ka d'ai lod'o ho ra pacèri, dhèu se liku rare Paulus ka uu ne, dènge lii tangi aa d'ara pèd'a. Èle èèna ka, ra lere ji'id asa dedha kapa.