2 Ka na karèi si, aku nèngu na, ‘‘A'ari! Lod'o miu parcaya Lamatua Yesus, miu sèmi mere le Roh Lamatua dhu Mola-Mèci, do dhae?’’

Ka ra dhaa, aku rèngu na, ‘‘Dhae! Ji'i se dhae tadèngi mèka, peka na, Ama Lamatua unu Roh dhu sèmi èèna.’’

3 Ka Paulus karèi hari si, aku nèngu na, ‘‘Lod'o miu sarani èèna, miu pake sarani mia ka?’’

Hèia ra dhaa, ‘‘Ra sarani ji'i madhutu j'ara dhu Yohanis sarani dhèu.’’

4 Ka Paulus peka, na, ‘‘Nanene ku laa! Yohanis sarani dhèu, j'aj'i mi tadha, na, dhèu ae eele nèti sasala-sasigo ra. Te ngaa mi sanèd'e, ee! Bèli-bèli èèna, nèngu ka dhu aj'a dhèu Isra'el, peka na, rèngu hud'i parcaya ku Yesus, nuka Dhèu dhu Lamatua pua mai.’’^a

5 Ropa tadèngi rare, hèia ra manèngi sèna ka Paulus sarani si, ho rèngu j'aj'i dhèu unu Lamatua Yesus. 6 Ka ropa Paulus bane ai mi dhèu se'e, aa na manèngi-mangaj'i hia ra, hèia Roh Lamatua dhu Mola-Mèci puru asa dhèu se'e. Ka rèngu mulai padhai lii-lii dhu leko-leo, dhu rèngu tadèngi mèka ciki sa. Aa Lamatua pake si ho peka ngaa dhu èèna na j'aj'i bèli-camèd'a. 7 Rèngu aa'i-aa'i ra dhèu canguru dua.

8 Lod'o Paulus pea ètu kota Epesus, nèngu biasa maso asa d'ara èmu-èmu sabaj'a ho aj'a-nori dhèu lula-nèti paredha Ama Lamatua toke j'ara dhu lutu aamu-aamu. Na padhai lii dhu pa'abhe boe. Na tao sèmi èèna, toke d'ai tèlu hèru. 9 Te ngaa abhu kahèi dhèu cahag'e dhu sèmi rare boe a'aj'a na, ka ra palab'a dènge ne. Rèngu dadugu-rariu dhèu, sèna ka baku madhutu J'ara Mamuri Lamatua Yesus. Nèti èèna ka, Paulus dènge dhèu parcaya sèra tèke eele èmu sabaj'a ne, ka lasi pakaboko ètu èmu sakola. Kapala sakola èèna, ngara na Tiranus. 10 Paulus aj'a ètu era ne'e, d'ai dua tèu, toke d'ai dhèu-dhèu ètu propensi Asia aa'i-aa'i ra tadèngi Lii Lolo Be'a Lamatua Yesus. Dhu nanene se, dhèu-dhèu Yahudi dènge dhèu leo kahèi.

11 Lod'o èèna, Lamatua hia Paulus koasa ho na tao rupa-rupa tadha malaa dhu kapai. 12 Conto sèmi, rèti bèla dhu èki kètu, do bèla dhara hake dhu Paulus pake le, ho sad'i pagoi lèke mi dhèu pèd'a, na èi papèd'a dhèu sèra èle dènge. Sèmi èèna kahèi, dènge nidhu bhelu sèra kalua nèti dhèu.

13-14 Ètu èèna, abhu ama agama dhèu Yahudi èci, dènge ana mone na dhèu pidhu. Dhèu èèna, ngara na Sakewa. Ana na sèra biasa lasi asa mia-mia ho babège eele nidhu nèti dhèu. Rèngu neo pake sèku ngara Yesus ho babège eele nidhu nèti dhèu, dènge peka, ‘‘Èu tadhe Yesus dhu Paulus lole èèna? Ja'a paredha èu, pake kolongara Yesus, ho kalua ka nèti dhèu ne'e!’’

15 Ca tèka, ropa ra neo paredha sèmi èèna, abhu nidhu bhelu èci dhu dhaa, aku nèngu na, ‘‘Ja'a tadhe Yesus. Aa ja'a tadhe Paulus kahèi. Te ngaa miu se, cee?’’ 16 Ka dhèu dhu nidhu tao èèna, nasa bia. Na j'ubhu lai-lere, aa na j'èli-marèu si. Na panu'a si, aa na ciu pamae eele kodho ètu ua ra, toke rèngu rai ele hui nèti èmu èèna, dènge heka mèdha-papake.

17 Hèia lii lolo ne pale-lème nèti hèb'a èci asa hèb'a èci, toke dhèu Epesus sèra tadèngi aa'i. Dhèu Yahudi dènge dhèu Yahudi boe tadèngi kahèi. Sad'i cee èèna ka dhu tadèngi lii lolo ne, aa'i-aa'i ra malaa. Nèti èèna ka, ra koa-kio kolongara Lamatua Yesus, lula Na hia le koasa kapai mi Paulus. 18 Hèia dhèu dhu parcaya hiu sèra, mai asa a'ari dhu parcaya nèti uru sèra, ho bhoke d'ara rèngu, sèna ka ra mangaku sasala-sasigo ra. 19 Nèti rèngu se, abhu dhu pake na'i kahèi. Ka ra pakaboko aa'i sasuri ajima rèngu sèra, ho ra tunu eela si. Ladhe ige kab'ua buku-buku sèra, lèmi nguru riho doi iia.^b

20 Èle èèna ka, dhèu parcaya sèra palolo Lii Lolo Be'a Lamatua mèda-mèu palème era. Nèti èèna ka, dhèu-dhèu parcaya asa tabha ae, lula Lii Holo-Nori Ama Lamatua ne, tao paie mamuri dhèu ètu mia-mia.

21 Èle èèna ka, Paulus pama'ète ho lèpa asa Yerusalem. Te ngaa d'ara nèngu d'èi risi la'e uuru asa propensi Makedonia dènge propensi Akaya, heka na kako taruu asa kota Yerusalem kèna. Nèngu dhu pangee le ètu d'ara nèngu, peka na, ‘‘Be'a risi ja'a pa'èle aa'i uuru ku sasab'a ja'a ètu era se'e. Te tasamia èèna ka, ja'a d'ai kota Roma kahèi.’’ 22 Nèti èèna ka, na pua angalai dhèu dua, nuka Timotius dènge Erastus, ho lasi uuru asa Makedonia. Te ngaa nèngu pea ako nèbhu era ètu propensi Asia.

23 Lod'o èèna, ètu kota Epesus, j'aj'i lii langu kapai lula-nèti J'ara Mamuri Yesus. 24 Lii langu èèna, j'aj'aj'i na sèmi ne'e ka: ètu Epesus, abhu tuku èci, ngara na Demetrius. Nèngu biasa pasilu doi iia ho tao èmu sogo-tagu dhu ana iiki hia mi dewi èci, ngara na Artemis. Lula sasab'a ne nèti a'oto ae, ka na pake dhèu sab'a ae titu kèna. Nèti èèna ka, na abhu doi-dhari ae. 25 Ca lod'o, hèia Demetrius pakaboko aa'i tuka-tuka na, dènge tuka-tuka dhu leo sèra, ka na peka dènge si, aku nèngu na, ‘‘Ama-ama dènge a'ari! Miu me'a, na, mamuri èdhi be'a sèmi ne'e ne, lula sasab'a ne'e hia èdhi doi ae. 26 Te ngaa limuri ne, èdhi tèdhi le dènge musi madha, aa tadèngi le dènge ro'a dhilu, tatao nèti lii padhai lii Paulus. Nèngu ka tuka dadugu dhèu ae, peka na, mèdha dhu èdhi tuku se gaguna na aad'o. Madhutu nèngu, patung dhu èdhi tao se, dhoka dewa-dewi leko-monya di. Mesa boe dhèu ètu kota Epesus di dhu lèka lii padhai lii na, te ngaa dhèu ètu propensi Asia kahèi. 27 De mi nanene paie! Bèli-camèd'a, èdhi se j'aj'i hari ngaa era, ladhe dhèu ae-ae lasi madhutu Paulus si? Tatu dhèu ro'o heka hèli mèdha sasab'a èdhi! Sanèd'e, ee! Limuri ne, dhèu ae sogo-tagu bhèni iia dedha-liru, Artemis. Pale-lème propensi Asia, toke d'ai ro'a aae-ro'a iiki ètu rai-haha ne, dhèu aa'i-aa'i ra mai koa-kio ne, ètu èmu kapua sogo-tagu na ètu kota Epesus ne. Mage dhoka dènge j'ara sèmi èèna, dhèu mai heka sogo-tagu ne, ka rèngu mai heka asa ne'e kahèi!’’

28 Ropa dhèu ae se tadèngi rare ne'e, ka d'ara ra pana-mag'oro. Hèia ra pa'oo-parodha, peka na, ‘‘Mamuri Artemis! Artemis dhu hua iia! Èdhi dhèu Epesus koa-kio kolongara Artemis!’’ 29 Tadèngi lii dhèu pa'oo-parodha sèmi èèna, hèia dhèu mulai rai lasi nèti mia-mia, pakaboko asa era èèna, toke dhèu pènu sèmi tao cèci sa ètu d'ara kota èèna. Te ngaa dhèu ae se malaa. Ka ra maruru palème j'ara oka-hoo toke d'ai tana lapa taleo aae.^c Ra kèpe dhèu dua, ka ra rèti asa era èèna. Dhèu dua sèra, èci ngara na Gayus, aa èci hari, Aristarkus. Ra kèpe dhèu dua se, lula rèngu dua ra ana madhutu Paulus nèti Makedonia. 30 Ropa tadèngi lii ne'e, ka Paulus neo la'e asa talora aae dhèu dhu maruru sèra, te ngaa dhèu parcaya ètu sèra magee ne, ro'o boe hia la'e. 31 Abhu pèri-pèri dhèu kapai nèti propensi Asia, dhu patadha be'a dènge Paulus. Rèngu pua dhèu lasi peka sèna ka Paulus baku la'e asa talora dhèu ae dhu maruru sèra.

32 Hèia ètu d'ara tana lapa èèna, dhèu pakarèi j'aj'aj'i lii langu èèna. Cahag'e pa'oo iia d'ara, aku rèngu na, ‘‘Sèmi ne'e!’’ Aa cahag'e hari rodhe, peka na, ‘‘Sèmi èèna!’’ Te ngaa ae ka nèti rèngu dhu re'a boe j'aj'aj'i lii langu ne, tasamia. Rèngu sèra, dhoka madhutu rarame di. 33 Ètu èèna, abhu kahèi dhèu Yahudi dhu mulai madha'u, lula ra pangee, mage dhoka dhèu ae sèra peka na, dhèu Yahudi se'e ka dhu dadugu-rariu dhèu sèna ka tao maruru èèna. Nèti èèna ka, rèngu tule ca dhèu asa madha ho j'aj'i tuka padhai lii rèngu. Dhèu èèna, ngara na Aleksander. Ra manèngi sèna ka Aleksander bhiri rèngu, peka na, lii langu ne nèti boe dhèu Yahudi. Ka na j'oke kacui-aai na, ho kai dhèu ae se baku maruru. Hèia na mulai bhoke lii padhai lii na, bhiri dhèu Yahudi sèra. 34 Te ngaa ropa re'a rare nèngu èèna dhèu Yahudi, ka dhèu se pa'oo asa tabha mèdhu, peka na, ‘‘Mamuri Artemis! Artemis dhu hua iia! Èdhi dhèu Epesus koa-kio kolongara Artemis di!’’ Rèngu pa'oo-parodha sèmi èèna, nare d'ai dua jam sa.

35-36 Èle èèna ka, ama kètu paredha ètu kota Epesus kèd'i titu, ka na padhai lii ho na pamau si, peka na, ‘‘A'ari dhèu Epesus! Dhèu aa'i-aa'i re'a le, na, dewi Artemis dhu raropa asli na, bèbhe nèti dedha-liru, mai asa èdhi. De èdhi dhèu Epesus ne ka dhu ladhe-leru paie ne. Abhu boe ca dhèu sa dhu bisa pasisu rare hak èdhi ho madhenge ne, te èèna dhu j'aj'i le lii palolo-papeka nèti uru dhu dhèu aa'i-aa'i re'a le. De, nga tao ka miu pa'oo-parodha sèmi ne'e? Hud'i rèngu sène, ra leko-monya madhutu dad'èi ra, te ngaa miu baku tao leli! 37 Miu nuni mèti dhèu dua sèra asa ne'e mai, nuka sèmi dhèu bhelu sa. Te ngaa rèngu se mana'u boe ngaa-ngaa nèti d'ara èmu kapua sogo-tagu Artemis. Aa ra padhai lii pakarehe boe kolongara be'a dewi Artemis. De miu neo pasala si tasamia? 38 Sanèd'e paie-iie! Èdhi dènge era parisa lii. Aa dhèu dhu pama'ète lii nuka mate sèi. De ladhe Demetrius si neo tao lii langu, na, hud'i madhutu ku j'ara-j'ara na, ho rèti asa era pa'uri lii langu. 39 De ladhe abhu j'ara leo dhu rèngu neo galaa, na, hud'i laa rèngu lasi pajiko dènge dhèu heka sèra. 40 Mage dhoka dhèu paredha Roma pèci sasala èèna mi dedha èdhi, lula maruru ne'e. Ladhe ra neo tenge j'aj'aj'i lii langu ne'e, èdhi dhaa peka na ngaa? Te lii langu ne, dènge boe kolo-kapua!’’ 41 Ropa na padhai lii nare, hèia ama kètu paredha èèna, pua si lèpa. Ka ra lèpa dènge ka.