Lod'o èèna, Paulus tèke eele kota Atena, la'e asa kota Korintus. Ètu èèna, na patadha dènge Akila aa Priskila, lula nèngu dhèu tao mèdha nèti ka'uri kahèi. Rèngu pea pa'èci, aa ra sab'a pa'èci kahèi.

4 Ladhe d'ai lod'o ae sasab'a dhèu Yahudi, Paulus la'e asa èmu sabaj'a ètu nèi. Ka na pamako dhèu Yahudi dènge dhèu leo sèra, ho parcaya Lamatua Yesus.

5 Te ngaa ropa Silas dènge Timotius mai nèti propensi Makedonia, Paulus sab'a heka mèdha nèti ka'uri. Mèda-mèu sasab'a nèngu dhoka holo-nori dhèu Yahudi, peka na, ‘‘Dhèu dhu Ama Lamatua neo hia mai èèna, dhu èdhi mate-mate nèti uru ka mai, Nèngu mai le! Nuka Yesus.’’

6 Te ngaa abhu pèri-pèri dhèu Yahudi dhu loe boe palab'a dènge ne. Aa ra padhai lii pamanahu ne. Ka Paulus caro eele ahu nèti mèdha-papake na, sèna ka j'aj'i mi tadha dhu peka na, nèngu pusi-pahae heka dènge dhèu se, lula rèngu ro'o boe sèmi rare Lii Lolo Be'a dhu na peka-padhai dènge ra. Hèia na padhai lii, aku nèngu na, ‘‘Miu se, seli-kolane! Miu pakatele dhilu! Te ngaa, ngaa-ngaa tao boe! Pe èèna na, dui mere pala mi. Nèti doe ne'e ne, ja'a tao heka ai-hèb'a mi miu dhèu Yahudi. Hua iia ja'a laku aj'a-nori suku leo dhu Yahudi boe.’’

7 Padètu dènge èmu sabaj'a èèna, abhu èmu pea èci. Lamatua èmu èèna, ngara na Titius Yustus. Nèngu ne, dhèu Yahudi boe, te ngaa d'ara na d'èi padètu Ama Lamatua. Ropa Paulus tèke eele dhèu Yahudi, na la'e asa d'ara èmu Titius Yustus ne.

8 Nèbhu boe ka, kètu èmu sabaj'a èèna parcaya Lamatua Yesus. Ngara na, Krispus. Isi èmu na aa'i-aa'i, dènge dhèu Korintus dhu leo sèra, parcaya lii dhu Paulus lole dènge ra kahèi. Ka Paulus sarani si aa'i-aa'i ra.

9 Ètu d'ara mèd'a sa, Paulus abhu tanila, ka na tadèngi lii padhai Ama Lamatua, peka na, ‘‘Paulus! Èu baku madha'u, aa mage d'ara èu roe kahèi! Sasab'a èu dhae èle mèka. De èu hud'i aj'a dhèu sèra taruu dènge Lii Lolo Be'a Ja'a. 10 Sanèd'e, ee! Èu sab'a boe mesa mu, te Ja'a tèke eele boe èu. Masi ka dhèu paj'èra èu, te ngaa Ja'a tao taruu madha-dhilu mi èu mèu-mèda. Baku bhèlu! Te ètu d'ara kota ne, dhèu Ja'a ae.’’

11 Ropa tadèngi lii ne, Paulus pea ètu kota Korintus d'ai nèbhu ku, d'ai ca tèu èna hèru. Na aj'a dhèu-dhèu ètu sèra, J'ara Mamuri Lamatua.

12 D'ara tèu èèna, ra ded'e dhèu èci j'aj'i gubernur ètu propensi Akaya. Ngara na, Galio.^a Ka pèri-pèri dhèu Yahudi pare'a lii ho ère rèti Paulus asa madha gubernur, ètu era pama'ète lii langu. 13 Ka ra galaa Paulus, aku rèngu na, ‘‘Dhèu ne'e ne, dadugu dhèu ae ho maso agama hiu, masi ka dhèu paredha Roma mangaku boe agama èèna!’’

14 Te ngaa ropa Paulus neo bhoke hèb'a neo siri iisi na, cag'ag'a laa gubernur kai ne. Gubernur pajèka dènge dhèu Yahudi dhu galaa Paulus, peka na, ‘‘Weh! Miu dhèu Yahudi se, pasa dhilu miu, ee! Ladhe miu mai galaa dhèu dhu tao j'ara bhelu-katub'a, do, dhèu pamadhe dhèu, ja'a hud'i tao ai-hèb'a kèna. 15 Te ngaa lii galaa miu ne, lii langu d'ara èmu miu unu mi! Miu dhoka pasala d'ara, lula-nèti atora agama Yahudi miu unu mi, lula-nèti lii padhai lii, aa lula-nèti ngara-ngara dhèu di.^b De lii langu sèmi sèra, dhèu paredha pama'ète boe!’’

16 Èle, hèia gubernur babèga eele si nèti era pama'ète lii langu èèna. 17 Ka dhèu-dhèu Yunani ètu èèna kèpe dhèu èci, ngara na Sostenes. Nèngu ne, kapala èmu manèngi-mangaj'i dhèu Yahudi. Ka nuni rèti, hèia ra game ne ètu madha gubernur. Te ngaa gubernur pusi-pahae boe si kahèi.

18-19 Èle èèna ka, Paulus pea taruu ètu Korintus. Te ngaa nèbhu-nèbhu, ka na palangu lii dènge dhèu parcaya ètu èèna. Hèia la'e asa kota èci, ngara na Kengkrea, palere dènge Priskila dènge Akila, ho ra mate kapa. Ètu èèna, Paulus lusu pakahoni kètu na, sèna ka j'aj'i mi tadha, peka na, ngaa dhu nèngu pajaji le uru èèna dènge Lamatua, limuri ne nèngu tao nare le.^c Ka ra ca'e kapa pakèd'i lasi asa kota Epesus. D'ai nèi, rèngu puru. Hèia Paulus tèke eele angalai na dhèu dua sèra, ka na maso asa d'ara èmu sabaj'a dhèu Yahudi. Ètu èèna, na padhue-padhai dènge dhèu Yahudi sèra. 20 Ètu d'ara padhue-padhai ne, dhèu Yahudi ae dhu d'èi nanene, ka ra manèngi ho Paulus pea dènge si ako nèbhu ciki. Te ngaa na dhaa boe. 21 Hèia na palangu lii, aku nèngu na, ‘‘A'ari, mage miu d'ara kura! Ladhe Lamatua bhoke j'ara, bèli-camèd'a ja'a lèpa hari mai paraga dènge miu.’’ Padhai lii nare, hèia la'e dènge ka tèke eele Epesus.^d

22 Ka la'e taruu dènge kapa asa kota Kaisarea. D'ai nèi, Paulus puru, ka la'e asa Yerusalem, la'e paraga dènge dhèu-dhèu parcaya ètu èèna. Èle èèna ka, na lèpa hari asa kota Antiokia. 23 Na pea ètu nèi ako nèbhu, hèia na kako palème propensi Galati dènge propensi Frigia. Ètu d'ara kakako nèngu ne, Paulus pa'èra d'ara dhèu parcaya sèra.

24 Lod'o èèna, abhu dhèu Yahudi èci nèti kota Aleksandria ètu propensi Masir. Ngara na, Apolos. Nèngu ne, dhèu dhu mèu padhai lii, aa ne'a isi Sasuri Ama Lamatua kahèi. Nèngu heka nare kota Epesus kèna. 25 Nèngu tadèngi le lii lole nèti Lamatua Yesus, te ngaa mamèu na d'ai iia mèka. Aa na d'èi kahèi lolo hari dènge dhèu leo. Na lole dènge d'ara kateme, aa ngaa dhu na peka-padhai sèra, lèke tare'a. Nane'a nèngu dhoka Yohanis sarani dhèu, ladhe ra loe eele ka nèti tao sasala-sasigo rèngu. 26 Ca tèka, ka na padhai lii dènge d'ara bani dhu pahuni boe ètu d'ara èmu manèngi-mangaj'i dhèu Yahudi. Priskila dènge Akila ètu èèna kahèi, aa tadèngi na padhai lii. Ropa èle manèngi-mangaj'i, hèia dua ra gale Apolos ho dhuli èmu rèngu. D'ai èmu, ka dua ra heka lole lutu sela mi Apolos lula-nèti J'ara Mamuri Lamatua Yesus.

27 Èle èèna ka, Apolos pama'ète ho la'e asa propensi Akaya. Dhèu parcaya ètu Epesus d'ara èci kahèi dènge nèngu. Hèia rèngu tao sasuri èci, pa'adhu hia a'ari rèngu ètu Akaya sèra, sèna ka ra sèmi rare Apolos dènge be'a. Ropa na sèmi nare sasuri èèna, ka pakèd'i dènge. D'ai Akaya, nèngu soru-bara tare'a-re'a dhèu-dhèu parcaya ètu sèi. 28 Ètu èèna kahèi, nèngu padhue-padhai aa pakarèi dènge dhèu Yahudi sèra ètu madha dhèu ae, te ngaa ra segi boe ne. Na pake isi Sasuri Mola-Mèci Ama Lamatua ho aj'a dhèu sèra, peka na, ‘‘Dhèu dhu Ama Lamatua moa tèke le neo hia mai, dhu èdhi tatae nèbhu nare sange ne'e, nuka Yesus!’’