Ama-ama Kristen pakaboko ètu Yerusalem
15
Lod'o èèna, pèri-pèri dhèu Yahudi Kristen mai nèti kaj'èu, nèti propensi Yudea, asa kota Antiokia. D'ai nèi, ra aj'a dhèu unu Lamatua Yesus sèra, peka na, ‘‘Miu parcaya Yesus, èèna be'a le. Te ngaa èèna d'ai mèka. Ladhe miu tare'a-re'a neo abhu mamuri, miu hud'i suna ku madhutu ad'a ji'i dhèu Yahudi, dhu Lamatua papuru le mai re baki Musa.’’a2 Te ngaa Paulus dènge Barnabas lab'a lii padhai lii dhèu sèra. Rèngu palab'a aae. Hèia Paulus si peka, na, ‘‘Miu sala èèna! Dhèu Yahudi boe dhu parcaya Yesus, parluu boe madhutu ad'a suna dhèu Yahudi!’’ Lula ra palab'a sèmi èèna, ka a'abhu rèngu èci dènge èci sama boe, hèia ra tenge lii èci ho pua Paulus dènge Barnabas dènge pèri-pèri dhèu nèti Antiokia, ho rèti lii ne'e asa dhèu pajuu-paleha Lamatua dènge ama-ama Kristen leo sèra ètu Yerusalem.
3 Nèti èèna ka, Paulus si kako haga lasi re propensi Finisia dènge propensi Samaria. Ètu d'ara kakako, rèngu dhuli pèri-pèri èmu dhèu Kristen. Ka ra lole aa'i mèu-mèu, peka na, ‘‘Dhèu Yahudi boe sèra parcaya le Lamatua Yesus!’’ Ra tadèngi rare sèmi èèna, ka aa'i-aa'i ra karej'e.
4 D'ai Yerusalem, ka dhèu madhutu Yesus aa'i-aa'i ètu èèna, sèmi rare Paulus si dènge be'a. Dhèu pajuu-paleha Lamatua dènge ama-ama Kristen sèra, sèmi rare rèngu kahèi. Ka Paulus si lole aa'i mèu-mèu tatao Lamatua mi dedha rèngu, hèia dhèu ae nèti rai leo parcaya Lamatua Yesus. Aa rèngu lolo kahèi, na, rèngu palab'a aae lula j'ara suna ètu Antiokia. 5 Ètu talora dhèu dhu nanene lii padhai lii Paulus, abhu kahèi dhèu Yahudi Kristen nèti partei Parisi. Dhèu se kèd'i titu, ka ra hia lii bia, peka na, ‘‘Nanene paie! Ladhe cee ka dhu dhèu Yahudi boe, dhu neo madhutu Yesus, rèngu hud'i madhutu ku ad'a suna dènge atora ad'a leo èdhi, dhu Ama Lamatua papuru mai re baki Musa.’’
6 Nèti èèna ka, dhèu sarani aa'i-aa'i rare lii èci ho dhèu pajuu-paleha Lamatua dènge ama-ama Kristen sèra pakaboko sèna ka ra pajiko lii langu rèngu èèna. 7 Ka ra padhue la'e-mai. Hèia Petrus kèd'i titu, ka padhai lii, peka na, ‘‘A'ari aa'i-aa'i ti! Miu me'a, na, uru èèna Lamatua paj'uj'u le ja'a nèti talora miu, sèna ka ja'a laku lole Lii Lolo Be'a Yesus mi dhèu Yahudi boe sèra. Lula Lamatua d'èi, sèna ka rèngu parcaya Yesus kahèi.b 8 Lamatua ne'a d'ara èdhi èci-èci. Aa Nèngu ka dhu pala-bagi Roh Na dhu Mola-Mèci hia rèngu, sama sèmi Na hia èdhi kahèi. Dènge j'ara ne'e, sèna ka èdhi te'a, na, Lamatua sèmi nare rèngu kahèi.c 9 Te Lamatua ladhe boe rèhu dhèu. Na tao beda boe rèngu dènge èdhi. Te Lamatua pamèu le d'ara rèngu, lula rèngu parcaya le Yesus kahèi, sama sèmi Na pamèu d'ara èdhi. 10-11 De tasamia? Lamatua sèmi nare le rèngu. Nga tao ka èdhi neo pabia hari rèngu dènge ad'a suna èdhi? Èdhi te'a, na, èdhi dènge bèi-baki èdhi sèra, dui mèke boe atora-atora agama èdhi aa'i-aa'i ra! De hua iia èdhi baku pabia rèngu. Ja'a neo karèi sèmi ne'e: Lamatua hia èdhi mamuri lula èdhi madhutu atora agama, do? Aad'o, sina ma! Na hia èdhi mamuri, lula Lamatua Yesus sue èdhi. De baku bhèlu! Lamatua sue aa pad'elo d'ara hua iia Na mi dhèu rai leo sèmi èèna kahèi.’’
12 Ropa tadèngi rare sèmi èèna, rèngu èci sa padhai lii tabha heka.
Èle èèna ka, Paulus dènge Barnabas lolo hari j'ara sèmi mia Lamatua pake rèngu. Ra lole tadha-tadha malaa dènge j'ara kapai dhu Ama Lamatua tao ètu talora dhèu rai leo sèra. 13 Lole rare, ka dhèu èci, ngara na Yakobis kèd'i titu, ka padhai lii, peka na, ‘‘A'ari! Mi nanene ku ja'a! 14 Simon Petrusd heka lolo nare kèna, peka na, Ama Lamatua ded'e nare dhèu Yahudi boe sèra, ho pamaso si j'aj'i dhèu unu Lamatua Yesus. 15 Èèna lèke sèmi ngaa dhu dhèu rèti lii padhai Lamatua peka tèke nèti uru. Ra suri, peka na:
16 ‘Ladhe d'ai lod'o èèna, Ja'a lèpa hari.
Lula Ja'a neo pakèd'i hari paredha dhèu aae Daud,
Ja'a neo pakèd'i hari dènge pa'èra hari,
ana-èpu Daud dhu mae-manyèla sèra.
17-18 Dènge tao sèmi èèna, dhèu rai-rai leo mai ho neo paraga dènge Ja'a kahèi.
Te Ja'a hag'e kore rèngu kahèi, ho j'aj'i dhèu unu Ja'a.
Ama Lamatua padhai lii sèmi èèna, nèti uru ka mai!’e
19-20 Ka madhutu ngangee ja'a, Yakobis, sèmi ne'e: ladhe dhèu Yahudi boe neo madhutu Ama Lamatua, èdhi dhèu Yahudi baku paj'èra si. Èdhi baku pabia rèngu, ho pua si madhutu ad'a suna èdhi. De èdhi hud'i suri tare sasuri èci, ho ti pa'adhu hia rèngu, peka na, rèngu parluu boe madhutu aa'i atora ad'a èdhi dhèu Yahudi. Te ngaa èdhi pasanèd'e rèngu, peka na, bhèni-mone baku tao j'ara karehe dènge dhèu dhu j'aj'i boe dhèu èmu-kamali rèngu. Rèngu baku ra'a nganga'a sogo-tagu. Rèngu baku ra'a raa badha. Aa rèngu baku ra'a sisi badha madhe dhu ra pacèli koko.f 21 De ladhe èdhi tao atora sèra, èèna j'ara hiu boe. Lula dhèu ae re'a le ad'a èdhi dhèu Yahudi sèmi èèna ka. Te èdhi baca atora Musa sèra ètu èmu manèngi-mangaj'i ètu mia-mia, lod'o a'oro sasab'a. Nèti èèna ka, dhèu rai leo sèra re'a le.
D'ai sange èèna ka. Makasi!’’
Sasuri hia dhèu parcaya dhu dhèu Yahudi boe
22 Èle padhue-padhai èèna, ka dhèu pajuu-paleha Lamatua dènge ama-ama Kristen dhu leo sèra, rare lii èci ho ra pua dhèu lasi peka lii dhu ra pama'ète rare èèna asa dhèu sarani ètu mia-mia. Ka ra tenge dhèu dhu juma'at sèra pakab'ua si, dhu lèke dènge sasab'a èèna. Hèia ra pili dhèu dua. Èci ngara na Silas, aa èci hari, ngara na Yudas, (dhu ngara leo na, Barsabas). Ka ra pua dua ra lasi sama-sama Paulus dènge Barnabas. 23 Ka rèngu rèti sasuri hia dhèu sarani dhu Yahudi boe, ètu kota Antiokia ètu propensi Siria d'ai propensi Kilikia nèi. Isi sasuri èèna, sèmi ne'e ka:
‘‘Lii maho'o nèti ji'i, dhèu pajuu-paleha Lamatua Yesus, dènge ama-ama dhu leo ètu kota Yerusalem. Ji'i sue miu sama sèmi a'ari ji'i. Nèti èèna ka, ji'i suri sasuri ne hia miu aa'i-aa'i mi.
24 Ji'i tao sasuri ne, lula ji'i tadèngi, na, pèri-pèri dhèu nèti Yerusalem dhiu paraga dènge miu. Ka ra aj'a lèke boe, hèia paj'èra dènge pab'ingu miu. De sad'i miu me'a, ji'i pua boe dhèu sèra. 25 Ropa ji'i tadèngi dhèu dhiu paj'èra miu, ka ji'i pakaboko ètu ne'e, ho pajiko lii langu ne'e. De ji'i pama'ète ngare le. Nèti èèna ka, ji'i pua dhèu dhiu peka dènge miu, ngaa dhu ji'i pama'ète ngare le. Ra dhiu sama-sama dènge Barnabas dènge Paulus, dhèu pasue ji'i. 26 Dhèu dua se, dui j'aj'èra le oe d'ai madhe. Rèngu dui j'aj'èra, lula rèngu madhutu Kètu èdhi, Yesus Kristus. 27 De ji'i pua Yudas dènge Silas, sèna ka dua ra lole hia miu isi sasuri ne'e.
28 Roh Lamatua dhu Mola-Mèci peka le dènge ji'i. Aa ji'i aa'i-aa'i mi ngare lii èci kahèi, sèna ka miu parluu boe madhutu aa'i ad'a Yahudi ji'i, sèmi ad'a suna èèna. Te ad'a ji'i èèna, pabia miu. Te ngaa abhu èci do dua j'ara dhu miu parluu sanèd'e, nuka:
29 Miu bhèni-mone baku tao j'ara makae dènge dhèu dhu j'aj'i boe dhèu èmu-kamali miu.
Baku mi'a nganga'a sogo-tagu.
Baku mi'a raa badha.
Aa baku mi'a sisi badha dhu roro boe.
Ladhe miu pakaj'èu iisi miu nèti j'ara-j'ara sèra, na, miu bisa pa'èci dènge mera-milu dènge a'ari dhèu Yahudi Kristen sèra.
D'ai sange ne'e ka, sasuri ji'i. Saloom.’’
30 Ropa sèmi rare sasuri èèna, ka ra palangu dènge ka. Hèia ra lasi asa kota Antiokia. D'ai nèi, ka rèngu pakaboko dhèu sarani aa'i-aa'i sèra, ka ra hia sasuri èèna la'a. 31 Ropa baca rare sasuri èèna, rèngu aa'i-aa'i ra karej'e, lula isi sasuri èèna pa'èra d'ara rèngu.
32 Lamatua pake Yudas dènge Silas kahèi j'aj'i dhèu nèti lii padhai Na. Dua ra padhai lii ae dènge dhèu parcaya ètu kota èèna. Dua ra lole lii holo-nori dènge pa'èra d'ara dhèu sèra. 33 Silas dènge Yudas pea ètu èèna ako nèbhu ciki. Èle èèna ka, heka dhèu sarani ètu Antiokia sèra, hia si lèpa hari asa ama-ama dhu pua rèngu sèra mai. Ra hia si lasi dènge d'ara karej'e-karae. 34 [Te ngaa Silas neo pea taruu ètu Antiokia.]g
35 Paulus dènge Barnabas pea pèri-pèri lod'o ètu Antiokia. Rèngu soru-bara dhèu leo dhu aj'a dhèu dhu padhai lii lula-nèti J'ara Mamuri Lamatua Yesus kahèi.
Paulus pacèri dènge Barnabas
36 Rèngu pea ako nèbhu ètu Antiokia. Ca lod'o, ka Paulus peka dènge Barnabas, aku nèngu na, ‘‘Be'a risi èdhi lèpa hari asa era-era dhu èdhi dhuli uru èèna, ho lati ladhe sèku mamuri a'ari èdhi sèra. Mamuri rèngu tasamia le. Te rèngu parcaya Lamatua Yesus nèbhu mèka. Uru èèna, èdhi ka dhu nori si. Mai lati ladhe si!’’ 37 Ropa Barnabas tadèngi lii manèngi Paulus, nèngu d'èi kahèi. Barnabas neo nèti dènge Yohanis (dhu ngara leo na, Markus), la'e dènge rèngu. 38 Te ngaa Paulus sèmi boe, lula uru èèna ètu propensi Pamfilia, Markus rai eele rèngu.h 39 Paulus dènge Barnabas palab'a aae, ka ra pacèri. Barnabas nèti Markus, ka ra ca'e kapa lasi asa pulu Siprus.
40 Te ngaa Paulus nèti Silas. Lod'o rèngu neo pakèd'i, dhèu parcaya ètu Antiokia sèra manèngi Lamatua j'aga rèngu, dènge pad'elo babe'a Na mi dedha rèngu. Sabaj'a rare, ka dua ra pakèd'i. 41 Hèia Paulus dènge Silas lasi palème propensi Siria dènge propensi Kilikia. Ètu mia-mia, rèngu pa'èra d'ara dhèu parcaya sèra.