Paulus dènge Barnabas ètu kota Ikonium
14
Lod'o Paulus dènge Barnabas d'ai kota Ikonium, ka lasi asa d'ara èmu manèngi-mangaj'i dhèu Yahudi. Ètu èèna, dua ra lole aa'i mèu-mèu Lii Holo-Nori Ama Lamatua. Ka dhèu Yahudi dènge dhèu rai leo, ae ka dhu parcaya Lamatua Yesus. 2 Te ngaa ètu èèna, abhu kahèi pèri-pèri dhèu Yahudi dhu kèpe pa'èra atora agama rèngu. Ka rèngu sèmi rare boe lii padhai lii Paulus si. Rèngu kakèj'i dhèu leo, sèna ka ra d'èi boe dènge dhèu dhu parcaya Yesus sèra. 3 Te ngaa Paulus si madha'u boe. Dua ra peka-padhai taruu Lii Lolo Be'a Lamatua Yesus, mi dhèu aa'i-aa'i ra. Ra peka, aku rèngu na, ‘‘Lamatua Yesus sue dhèu aa'i-aa'i.’’ Lamatua hia Paulus si koasa kahèi, ho ra tao tadha-tadha malaa, sèna ka dhèu ae re'a Lamatua ka dhu pua rèngu.Lod'o èèna, Paulus si pea nèbhu ètu d'ara kota èèna. 4 Ètu èèna, abhu dua kaboko dhèu. Cahag'e madhutu dhèu Yahudi dhu kèpe pa'èra atora agama rèngu. Aa cahag'e hari madhutu dhèu pajuu-paleha Lamatua. Ka ra patao-palaha.
5 Hèia dhèu Yahudi dhu kèpe pa'èra atora agama rèngu pare'a lii dènge dhèu leo dènge ama-ama rèngu, ho neo paj'èra dhèu pajuu-paleha Lamatua. Aa rèngu neo tabhie Paulus si. 6 Te ngaa dhèu peka dènge Paulus si, aku rèngu na, ‘‘Dhèu neo tao aapa mi miu.’’ Nèti èèna ka, Paulus si rai lasi palu'u iisi asa propensi Likonia, ètu kota Listra, dènge kota Derbe, dènge rae-rae dhu padètu ètu kota sèra. 7 Ètu era-era se'e, rèngu lole Lii Lolo Be'a Lamatua Yesus.
Paulus si ètu kota Listra dènge kota Derbe
8 D'ai kota Listra, Paulus dènge Barnabas paraga dènge mone èci, dhu karuku nèti ina na nara iisi ne. Dhèu ne'e, kako nèdhi mèka. 9 Nèngu madhèdi nanene lii lole Paulus. Ka Paulus ladhe patae ne, ka pangee, na, ‘‘Parcaya nèngu mi Ama Lamatua ka dhu bisa pa'èle papèd'a na!’’ 10 Ka Paulus lii dènge ne, peka na, ‘‘Kèd'i titu ka!’’ Ropa na tadèngi, hèia dhèu ne kèd'i titu dènge, ka kako la'e-mai.
11 Ropa dhèu sèra rèdhi Paulus tao sèmi èèna, ka rèngu malaa-maloha. Ka ra padhai lii dènge lii Likonia, peka na, ‘‘Mi nanene ku laa! Dhèu dua se, dhèu dedha-liru, te ngaa puru mai dènge rupa dhèu rai-haha!’’ 12 Rèngu peka sèmi èèna, lula rèngu ngee, na, Barnabas èèna nuka dhèu dedha-liru rèngu, ngara na Seus. Aa Paulus, dhu tuka padhai lii, nuka dhèu dedha-liru rèngu, ngara na Hermes.a 13 Ètu hèb'a tedhe li'u kota, abhu èmu era sogo-tagu Seus. Ropa rèdhi Paulus si, ka tuka j'aga èmu sogo-tagu Seus èci nèti bunga dènge sapi mone aae, ho mai sogo-tagu Paulus dènge Barnabas. Dhèu ae mai kahèi ho neo sogo-tagu dhèu pajuu-paleha Lamatua Yesus sèra.
14 Ropa Paulus si re'a, na, dhèu sèra mai ho neo sogo-tagu rèngu, ka ra kai si. Ka dua ra rai lasi asa talora dhèu ae sèra, hèia ra ciu mae kodho ètu ngi'u ra. Tatao èèna j'aj'i tadha, na, rèngu dua ra d'èi boe dhèu sogo-tagu rèngu. Hèia dua ra kai si, peka na, 15 ‘‘Weh! Nga tao ka miu tao sèmi ne'e? Baku pangee na, ji'i se dhèu dedha-liru. Ji'i dhèu rai-haha èci èèna ka dènge miu. Ji'i mai ho neo lole dènge miu, lii lole be'a èci. Miu hud'i tèke eele ku, dhèu dedha-liru miu dhu lèke boe sèra. Aa miu hud'i mai madhutu ku Ama Lamatua dhu mamuri tare'a-re'a. Nèngu ka dhu paj'aj'i dedha-liru, rai-haha dènge isi ra aa'i-aa'i.b 16 Nèti uru ka mai, dhèu ètu rai mia-mia mamuri madhutu dad'èi d'ara rèngu. Aa Ama Lamatua soro tèke si mamuri sèmi èèna. 17 Te ngaa Lamatua bhèlu boe hia si tadha-tadha, sèna ka re'a, na, Lamatua èèna be'a. Nèngu ka dhu papuru èj'i mai. Nèngu ka dhu hia oka-tedhe èdhi hua-hela. Nèngu ka dhu hia èdhi nganga'a-nginu. Aa Nèngu ka dhu pakarej'e d'ara èdhi.’’
18 Masi ka Paulus dènge Barnabas kai si, te ngaa dhèu sèra pakaseti hia mèdha sogo-tagu sèra mi rèngu.
19 Lod'o èèna, abhu pèri-pèri dhèu Yahudi dhu mai nèti kota Antiokia dènge kota Ikonium, lasi asa kota Listra. Rèngu dadugu dhèu ae ho pa'èci dènge rèngu ho lab'a dhèu pajuu-paleha Lamatua Yesus sèra. Ka ra tabhie Paulus dènge hadhu. Ra ngee na madhe le, ka ra ère rèti lasi core eele ne asa li'u kota.
20 Te ngaa ropa dhèu parcaya Yesus sèra, titu-reo Paulus, ka na kèd'i hari. Èle èèna ka, na maso hari asa d'ara kota. Asa bèli èèna, Paulus dènge Barnabas lasi hari asa kota leo, ngara na Derbe.
Paulus dènge Barnabas lèpa hari asa kota Antiokia ètu propensi Siria
21 Ètu kota Derbe, Paulus dènge Barnabas lole Lii Lolo Be'a Lamatua Yesus. Ka dhèu ae parcaya Yesus. Hèia dua ra lèpa hari asa kota Listra. Nèti Listra, rèngu lasi hari asa kota Ikonium. Nèti Ikonium, rèngu taruu asa Antiokia ètu propensi Pisidia. 22 Ètu Antiokia, ra padhai lii pa'èra d'ara dhèu dhu madhutu Yesus sèra. Ra pasanèd'e si, peka na, ‘‘A'ari aa'i-aa'i ti! Ladhe èdhi j'aj'i dhèu unu Ama Lamatua, baku ngee, na, èdhi abhu heka j'aj'èra. Masi ka abhu j'aj'èra, te ngaa èdhi hud'i taha ho madhutu taruu Lamatua Yesus.’’ Dua ra aj'a sèmi èèna mi dhèu unu Lamatua Yesus ètu kota èèna.
23 Èle èèna ka, Paulus dènge Barnabas tenge dhèu ho ra neo paj'uj'u j'aj'i kètu juma'atc sèra. Ka ra manèngi-mangaj'i dènge puasa neo re'a dad'èi Lamatua. Dhèu dhu Lamatua paj'uj'u, rèngu sabaj'a dènge bane ai mi dedha na, ho ded'e ne j'aj'i kètu juma'at.
24 Èle èèna ka, Paulus dènge Barnabas tèke eele propensi Pisidia, lasi asa propensi Pamfilia. 25 Ka rèngu maso asa kota Perga. Ètu èèna, ra lole Lii Lolo Be'a Lamatua. Èle èèna ka, lasi asa kota Atalia, dhu kaj'èu boe nèti Perga. 26 D'ai nèi, ka ra ca'e balu lèpa hari asa kota Antiokia ètu propensi Siria. Ca hari ni, dhèu parcaya Yesus ètu Antiokia ka dhu pangèd'u dua ra asa Lamatua sèna ka Na ladhe-leru si, aa rèngu ka dhu pua dua ra lasi kahèi. Nèti èèna ka, Paulus si lasi ho neo lole mi juma'at Antiokia, peka na, rèngu tao rare le sasab'a dhu juma'at pua rèngu sab'a.
27 D'ai kota Antiokia, ka Paulus si pakaboko aa'i dhèu parcaya Lamatua ètu èèna. Ka ra lolo aa'i-aa'i tatao Lamatua mi dedha rèngu. Ra lole kahèi, peka na, Lamatua bhoke le j'ara hia dhèu Yahudi boe ho parcaya Lamatua Yesus kahèi. 28 Èle èèna ka, Paulus dènge Barnabas pea nèbhu dènge dhèu parcaya Lamatua Yesus sèra ètu èèna.