Dhèu Antiokia pua Barnabas dènge Saulus
13
Ètu kota Antiokia, dhèu ae parcaya le Lamatua Yesus. Lamatua pake pèri-pèri dhèu ho j'aj'i dhèu rèti lii padhai Na ètu èèna. Cahag'e hari, Na pake ho aj'a-nori dhèu. Rèngu se, nuka:Barnabas,
Simeon, dhu ra biasa pangare ne, ‘Mone Mèdhi’,a
Lukius, nèti kota Kirene,
Menahem, dhu ra piara sama-sama dènge dhèu aae Herodes nèti ana iiki ka mai,b
aa dènge Saulus.
2 Ca lod'o, rèngu puasa, ka ra pakaboko ho manèngi-mangaj'i mi Ama Lamatua. Hèia Roh Lamatua dhu Mola-Mèci peka dènge ra, ‘‘Sasab'a Ja'a ae titu kèna. De hag'e mere Barnabas dènge Saulus, sèna ka rèngu pakako sasab'a Ja'a.’’
3 Ropa ra puasa dènge sabaj'a èle, hèia ra bane ai mi dedha Barnabas dènge Saulus, ho ra j'aj'i ana pua-paleha Lamatua. Èle èèna ka, ra pua rèngu dua ra ho lasi sab'a sasab'a-la'a Lamatua.
Barnabas dènge Saulus lasi asa pulu Siprus
4-5 Ropa Roh Lamatua dhu Mola-Mèci pua Barnabas dènge Saulus lasi palème rai, ka ra dhuli uru asa kota èci ètu nebhe dhasi, ngara na Seleukia. Yohanis (dhu ngara leo na, Markus) la'e sama-sama dènge si. D'ai nèi ka, rèngu ca'e kapa asa pulu Siprus, ka ra puru ètu kota èci, ngara na Salamis. Ètu èèna, rèngu biasa maso asa d'ara èmu manèngi-mangaj'i dhèu Yahudi, ho aj'a-nori Lii Holo-Nori Ama Lamatua mi dhèu ètu sèra.
6-8 Hèia rèngu lasi dhuli rae-rae, toke ra d'ai kota èci ètu suu haa pulu èèna, ngara na Pafos. Gubernur pea ètu kota èèna. Ngara gubernur èèna, Sergius Paulus. Nèngu ne, dhèu kahadhu mèu. Ropa na tadèngi Barnabas si d'ai d'ara kota, ka na hia dhèu lasi paroa si, te d'ara na neo nanene Lii Holo-Nori Lamatua.
Te ngaa ètu era èèna, abhu dhèu Yahudi èci, ngara na Bar Yesus, (ngara leo na ètu d'ara lii Yunani, ‘Elimas’). Nèngu dhèu suagi. Na tema le kapod'e-kabèli dhèu, peka na, nèngu ne dhèu nèti lii padhai Ama Lamatua. Aa na pa'angalai dènge gubernur. Ka ropa Barnabas si mai, na kakèj'i gubernur, sèna ka baku sèmi nare si. Aa na dadugu gubernur, sèna ka gubernur baku parcaya Yesus.
9 Te ngaa Roh Lamatua dhu Mola-Mèci hia koasa mi dedha Saulus (dhu ra paroa kahèi Paulus), ka na ladhe kaloo dhèu suagi ne, hèia na peka, 10 ‘‘Eeh, Elimas! Èu ne, ana nidhu! Tuka kapod'e-kabèli! Toke d'ai pèri lod'o hari èu kapod'e dhèu? Èu lab'a j'ara-j'ara dhu be'a. Nèti èèna ka, ji'i nge'a, na, èu madhutu dhèu aae nidhu. Tao ia ka sèmi èèna! Bhabhae ia ka j'ara mola Ama Lamatua! 11 De mu nanene! Nèbhu heka, Lamatua huku èu. Èèna na, èu bèdhu pèri-pèri lod'o!’’
Ropa Paulus padhai lii nare sèmi èèna, dhèu èèna bèdhu dènge. Ka na kako kèpe leli, hia dhèu kadhèi ai, ho pakako ne.
12 Ropa gubernur ladhe nèdhi unu na, aa na tadèngi Lii Holo-Nori Yesus nèti Barnabas si, ka na malaa-maloha, aa na parcaya Yesus.
Rèngu rèti Lii Lolo Be'a asa kota Antiokia leo, ètu propensi Pisidia
13 Nèti kota Pafos ètu pulu Siprus, Paulus si ca'e kapa, pakèd'i asa kota Perga ètu propensi Pamfilia. Ropa ra puru nèti dedha kapa, Yohanis Markus tèke eele rèngu, ka lèpa asa Yerusalem. 14 Nèti Perga, rèngu kako haga lasi asa kota Antiokia ètu propensi Pisidia.
Rèngu d'ai era èèna, lèke lod'o a'oro sasab'a dhèu Yahudi. Ka rèngu madhutu sabaj'a ètu èmu manèngi-mangaj'i dhèu Yahudi. 15 Lod'o èèna, ra baca ètu sasuri Musa, dènge sasuri dhèu rèti lii padhai Lamatua dhu leo kahèi. Èle èèna ka, ama-ama èmu sabaj'a èèna, manèngi Paulus si, peka na, ‘‘Ama-ama! Ladhe miu dènge lii haholo ho pa'èra d'ara ji'i, na, ji'i manèngi sèna ka miu peka laa.’’
Paulus padhai lii mi dhèu Yahudi ètu Antiokia
16 Hèia Paulus kako asa madha la'e. Ka na hia tadha dènge kacui-aai na, sèna ka rèngu mau-mau. Èle èèna ka, na padhai lii, peka na, ‘‘A'ari dhèu Isra'el ti! Dènge ina-ama dhèu leo dhu maso agama Yahudi, lula d'ara miu d'èi padètu dènge Ama Lamatua dhèu Isra'el. De ja'a manèngi sèna ka miu nanene paie lii padhai ja'a.
17 Ama Lamatua hag'e nare le bèi-baki èdhi dhèu Isra'el nèti uru ka mai. Lod'o rèngu pea ètu rai Masir, kabarai dhèu, Lamatua hia rèngu mamuri hua iia. Ana-èpu rèngu tabha ae ètu era èèna. Limuri mai, ka Lamatua pake koasa kapai Na, ho Na kalua eele rèngu nèti rai Masir.c 18 Èle èèna ka, rèngu mamuri pidha-pidha ètu d'ara mamoo toke d'ai èpa nguru tèu. Masi ka rèngu kètu hadhu, te ngaa Lamatua lere si dènge d'ara dhu taleo.d 19 Èle èèna ka, Lamatua palaho aa'i pidhu suku ètu rai Kana'an. Ka Na pabagi rai rèngu mi bèi-baki èdhi ho j'aj'i rai pusaka ra.e 20 Bèi-baki èdhi mamuri sèmi èèna toke d'ai 450 (èpa ngasu lèmi nguru) tèu.
Ka Ama Lamatua padhèdi dhèu pama'ète lii langu, sèna ka paj'uj'u j'ara hia si, toke d'ai Na padhèdi hia si dhèu nèti lii padhai Lamatua èci, ngara na Samuel.f 21 Lod'o Samuel j'aj'i dhèu nèti lii padhai Lamatua, bèi-baki èdhi neo abhu dhèu aae. Ka Lamatua padhèdi Saul, ana Kis, nèti suku Benyamin. Saul j'aj'i dhèu aae d'ai èpa nguru tèu.g 22 Èle èèna ka, Lamatua gao eele Saul. Ka Na padhèdi Daud, ana Isai, ho j'aj'i dhèu aae hiu. Lamatua ne'a tare'a d'ara Daud, ka Na peka na, ‘Daud, ana Isai ne, lèke d'ara Ja'a. Limuri mai, tatu nèngu mamuri madhutu dad'èi Ja'a aa'i-aa'i.’h 23 Lod'o èèna, Lamatua moa tèke le, ho Na hag'e nare ana-èpu Daud èci, sèna ka Na patabuli eele dhèu Isra'el nèti koasa sasala-sasigo ra. Ja'a peka mi miu, ana-èpu Daud dhu Lamatua moa tèke èèna, nuka Yesus.’’
Paulus peka na, Yesus èèna, Dhèu dhu Lamatua pajaji le
24 Paulus tuhu hari lii padhai na, peka na, ‘‘Lod'o Lamatua Yesus pakako mèka sab'a Na, abhu dhèu èci ngara na Yohanis, dhu la'e lole dènge dhèu Isra'el, sèna ka rèngu ele-ho'a nèti sasala-sasigo rèngu. Na peka kahèi, na, rèngu hud'i sarani ku, ho j'aj'i mi tadha, na, rèngu pabe'a le dènge Lamatua.i 25 Te ngaa lod'o sasab'a Yohanis oe èle, na peka mi dhèu ae, aku nèngu na, ‘Baku pangee, na, ja'a ne Dhèu dhu Lamatua moa nèti uru ka mai. Ngee paie! Miu hud'i mate hari ku dhèu èci, dhu mai limuri. Nèngu kapai risi nèti ja'a. Ja'a haha d'ai seli. De j'aj'i ana pua-paleha nèngu kahèi, ja'a nia boe.’j
26 A'ari aa'i-aa'i ti! Miu dhu ana-èpu Abraham, aa miu dhèu leo, dhu neo padètu dènge Lamatua. Mi nanene ku ja'a! Ama Lamatua peka le j'ara ne dènge èdhi, sèna ka èdhi te'a j'ara mamuri Na. Nèngu patabuli èdhi nèti koasa sasala-sasigo èdhi. 27 Nèti uru ka mai, Ama Lamatua pake le dhèu rèti lii padhai Na, ho suri lula-nèti Dhèu dhu Lamatua moa neo hia mai. Te ama-ama agama èdhi, dènge dhèu leo ètu Yerusalem sèra baca pahari-pahari le, ngaa dhu dhèu rèti lii padhai Lamatua suri tèke sèra. D'ai lod'o a'oro sasab'a, ra maso asa d'ara èmu manèngi-mangaj'i, ho ra baca ètu d'ara sasuri Lamatua. Te ngaa rèngu re'a boe Dhèu dhu Lamatua paj'uj'u mema èèna, nuka Yesus. Ka ra tenge j'ara ho pamadhe Ne. Te ngaa tatao rèngu sèra kahèi, lèke nuka sèmi dhu dhèu rèti lii padhai Lamatua sèra suri tèke le. 28 Ra tenge j'ara, neo pamanahu Yesus. Te ngaa rèngu abhu boe sasala Na. Masi ka sèmi èèna, te ngaa rèngu kakèj'i gubernur Pilatus ho pamadhe Ne.k 29 Ka gubernur sèmi nare lii rèngu, hèia ra paku pamadhe Ne ètu aj'u palolo-palèbha. Te ngaa tatao rèngu sèra kahèi, lèke sèmi dhu dhèu rèti lii padhai Lamatua sèra suri tèke le. Hèia ra papuru ngi'u aae Yesus nèti aj'u palolo-palèbha, ka nedhe rèti tao asa d'ara ro'a.l 30 Te ngaa Ama Lamatua pake koasa Na, ka pamamuri hari Yesus.
31 Lod'o Yesus mamuri hari, Na pad'elo iisi Na pèri-pèri hari mi dhèu ae. Dhèu sèra nuka dhu mai sama-sama dènge Ne nèti propensi Galilea asa kota Yerusalem. Rèngu se ka lèpa limuri na, j'aj'i sakasii mi dhèu Isra'el.’’m
Paulus peka na, Lamatua pake dhèu nèti lii padhai Na ho suri mema lula-nèti Yesus
32-33 Paulus tuhu hari lii padhai na, peka na, ‘‘De sèmi ne'e! Ji'i dua mi dènge Barnabas, mai nèti era kaj'èu ho lole dènge miu, sèna ka miu me'a ngaa dhu Lamatua moa mi bèi-baki èdhi sèra, limuri ne j'aj'i aa'i le. Lamatua pamamuri hari le Yesus nèti mamadhe Na. Ètu sasuri Lii Sod'a Koa-kio nomer dua, Lamatua pake dhèu ho suri lula-nèti Yesus, Dhèu dhu Na moa tèke ho Na mai. Na suri, peka na:
‘Èu ne'e, Ana Ja'a,
Doe ne'e, Ja'a ded'e Èu ho mèd'u paredha.’n
34 Nèti uru èèna ka, Ama Lamatua moa le, peka na, Nèngu neo pamamuri hari Dhèu dhu Na moa tèke ho Na mai. Aa Dhèu èèna, madhe heka. Nèti èèna ka, Lamatua pake le dhèu nèti lii padhai Na ho na suri, peka na,
‘Nèti uru ka mai, Ja'a èki lii padhadha dènge dhèu aae Daud, sèna ka Ja'a hia ne berkat.
De limuri ne, Ja'a neo pa'èki dènge èu, lii padhadha èèna kahèi, lula èu ne, ana-èpu Daud.’o
35 Aa Lii Sod'a Koa-kio leo, peka na,
‘Lamatua, Èu tèke eele boe ngi'u aae Dhèu Mola-Mèci Èu,
ho ele iie ètu d'ara ro'a Na!’p
36-37 Dhu lèke sèmi ne'e ka: Lii Sod'a Koa-kio ne'e, peka boe dhoka Daud di! Èdhi te'a sèmi èèna, lula dhèu aae Daud tao le j'ara be'a ae hia kabarai na, toke na madhe. Ropa na madhe, ka ra padhane ne. Ngi'u aae na ele iie le. De èdhi te'a, na, Lii Sod'a Koa-kio èèna, peka boe dhoka Daud di, te ngaa dhèu leo kahèi. Ladhe èèna na Dhèu dhu Na paj'uj'u èèna madhe, pe Ama Lamatua pamamuri hari Ne. Nèti èèna ka, ngi'u aae Na ele iie boe ciki sa.
38-39 De a'ari, nanene paie! Dhèu èèna, nuka Yesus! Ladhe èdhi parcaya Ne, heka Na dui sasala-sasigo èdhi sèra, dhu madhutu iia-iia na, èdhi ka dhu dui. Dènge j'ara ne'e, Ama Lamatua saku eele sasala-sasigo èdhi. Te ngaa èdhi te'a le, masi ka èdhi madhutu atora ad'a Musa aa'i-aa'i ra, èèna d'ai mèka ho pamola èdhi ètu madha Lamatua. 40-41 Nèti èèna ka, miu hud'i pangee paie. Mage dhoka ngaa dhu dhèu nèti lii padhai Lamatua peka uru sèra, lèka miu. Ra suri le, peka na,
‘Tuka lalangu dhèu, mate unu miu!
Lula Ja'a, Ama Lamatua, tao j'ara-j'ara dhu pamalaa dhèu.
Te ngaa limuri mai, mate unu miu! Èèna na, miu madhe aapa!
Ja'a tao j'ara èci,
te ngaa miu sèmi mere boe.
Masi ka dhèu pasaraa le,
te ngaa miu me'a boe.
Be'a risi miu ngee paie, sèna ka miu bisa malaa kahèi tatao Lamatua!’q
De a'ari sèra! Pangee paie ngaa dhu ja'a lole ne. Baku core eele ngaa dhu miu tadèngi le. Miu baku sama sèmi tuka lalangu dhèu. D'ai sange ne'e ka, lii padhai ja'a. Makasi!’’
42 Padhai lii nare, hèia Paulus dènge Barnabas kèd'i titu neo kalua nèti èmu manèngi-mangaj'i èèna. Ka dhèu ètu sèra manèngi rèngu lèpa migu mai nèi, ho lole pamèu ngaa dhu ra lole deo na. 43 Ropa ra kalua nèti d'ara èmu manèngi-mangaj'i èèna, dhèu ae ètu èèna lasi madhutu Paulus dènge Barnabas. Ka dua ra holo si, peka na, ‘‘Èdhi te'a, na, Lamatua d'ara be'a d'ai seli mi dedha èdhi. De miu hud'i madhutu taruu Ne.’’
Ama-ama dhèu Yahudi tule eele Paulus si
44 D'ara migu mai nèi, lèke lod'o a'oro sasab'a dhèu Yahudi, dhèu nèti d'ara kota èèna oe mai aa'i ho ra neo nanene Lii Holo-Nori Lamatua. 45 Te ngaa ropa ama-ama dhèu Yahudi re'a, na, dhèu ae mai nanene lii padhai lii Paulus si, ka rèngu tèka d'ara. Hèia ropa Paulus padhai lii, rèngu pahaka-palab'a dènge padhai lii pamanahu ne.
46 Te ngaa Paulus si hari boe, aa ra padhai lii pa'abhe heka, peka na, ‘‘Mema tare'a Ama Lamatua bhoke uru j'ara hia èdhi dhèu Yahudi, aa Na pangèd'u èdhi Lii Lolo Be'a. Èèna na lèke! Te ngaa miu sèmi mere boe. Nèti èèna ka, miu nia boe abhu mamuri taruu dènge Ama Lamatua. De limuri ne, ji'i neo ngèti Lii Lolo Be'a ne asa dhèu rai-rai leo sèra, lula miu dhèu Yahudi tule eele ne. 47 Te Lamatua pua le ji'i, sama sèmi dhu Yesaya suri tèke, peka na,
‘Ja'a ded'e le miu ho j'aj'i sama sèmi labhu, ho mèti saraa mi dedha dhèu rai-rai leo sèra, dhu dhèu Yahudi boe,
sena ka miu tao paheo j'ara dhu mai asa Ja'a,
ho Ja'a patalale si nèti koasa sasala-sasigo rèngu.
De miu hud'i pad'elo j'ara èèna ètu rai-haha ne, nèti suu èci toke d'ai suu leo la'e!’’’r
48 Ropa dhèu leo dhu dhèu Yahudi boe sèra tadèngi lii ne'e, rèngu karej'e titu kèna. Hèia ra koa-kio Ama Lamatua, peka na, ‘‘Koa-kio kolongara Lamatua! Lii Holo-Nori Lamatua be'a d'ai seli!’’ Aa ètu èèna, abhu dhèu dhu Ama Lamatua pili nare le ho ra mamuri taruu dènge Ne. Ka ra parcaya aa'i-aa'i ra mi Lamatua Yesus.
49 Ka dhèu palolo lème Lii Holo-Nori Ama Lamatua ne asa rai aa'i-aa'i.
50 Ètu d'ara kota èèna, abhu dhèu kapai, bhèni-mone. Cahag'e d'èi padètu Lamatua. Te ngaa ama-ama dhèu Yahudi sèra mai dadugu-rariu dhèu kapai sèra. Hèia rèngu babège eele Paulus dènge Barnabas nèti rai rèngu. 51 Lod'o dua ra kalua nèti d'ara kota èèna, ka ra caro eele ahu nèti haga ra, ho j'aj'i mi tadha, peka na, dhèu-dhèu ètu d'ara kota èèna ro'o boe nanene rèngu dua ra. Èle èèna ka, dua ra kabèli kabodho ho tèke eele kota èèna, lasi asa kota Ikonium.s
52 Te ngaa dhèu parcaya Lamatua Yesus ètu kota Antiokia sèra, d'ara ra karej'e, lula Roh Lamatua dhu Mola-Mèci pa'èra d'ara rèngu.