Ra pamadhe Yakobis; ra pamaso Petrus asa d'ara bèdho; aa dhèu parcaya Lamatua Yesus sabaj'a
12
Lod'o èèna, dhèu aae Herodesa mulai paj'èra dhèu unu Lamatua Yesus cahag'e. 2 Nèngu paredha dhèu lasi pare pamadhe Yakobis pake samala. Yakobis ne, a'a Yohanis. 3 Ropa Herodes ne'a, na, d'ara dhèu kapai Yahudi sèra karej'e nèti mamadhe Yakobis, ka asa na hino. Lèke lod'o hua iia dhèu Yahudi dhu ra pangare na, Pesta Roti dhu Pake Boe Ragi,b ka na pua dhèu lasi kèpe Petrus. 4 Kèpe rare ne, ka ra pamaso asa d'ara bèdho. Ka ra pua sordad'u èpa kaboko ho j'aga Petrus pagati-gati mèu-mèda. Ca kaboko sordad'u èèna, dhèu èpa. Ladhe èle lod'o hua iia, heka Herodes neo pama'ète lii Petrus ètu madha dhèu ae. 5 Lod'o ra pamaso Petrus asa d'ara bèdho, dhèu unu Lamatua Yesus sèra sabaj'a ma'ète boe manèngi ho Lamatua ladhe-leru Petrus.cLamatua pakalua Petrus nèti d'ara bèdho
6 Bèli èèna, Herodes neo pama'ète lii langu Petrus ètu madha dhèu ae. Te ngaa mèda èèna, ra èki Petrus pake rate dua ètu d'ara èmu bèdho. Na j'unu ètu talora sordad'u dhèu dua. Aa sordad'u leo sèra j'aga ètu hèb'a babèdho.
7 Cag'ag'a laa, ana pajuu Lamatua nèti sorga, mai titu ètu èèna. Ka d'ara kama na saraa bia. Hèia ana pajuu èèna parèi Petrus, peka na, ‘‘Petrus! Kèd'i mèri!’’ Kaca'a laa, rate bèsi sèra bhoke eele unu na nèti kacui-aai Petrus. 8 Ka ana pajuu èèna pua ne, peka na, ‘‘Pake kodho dènge salapa èu!’’ Pake nare, ka ana pajuu èèna peka hari, aku nèngu na, ‘‘Pake kodho li'u èu, ho mai madhutu ja'a!’’
9 Hèia Petrus madhutu ana pajuu ne lasi asa li'u. Petrus ngee, na, nèngu nii di. Te ngaa mema j'aj'i tare'a. 10 Ropa rèngu seli eele era j'aga partama dènge ka dua, hèia rèngu d'ai hèb'a babèdho bèsi. Babèdho èèna bhoke unu na, ka dua ra kalua madhutu ka j'ara asa d'ara kota. Cag'ag'a laa, ana pajuu Lamatua ne ele, ka tèke eele Petrus mesa na ètu era èèna.
11 Ropa ana pajuu ne ele, hèia Petrus heka mase'a kèna. Ka na ngee, aku nèngu na, ‘‘Mema tare'a! Ja'a heka ke'a kèna. Lamatua pua ana pajuu Na mai, ho patalale eele ja'a nèti kacui-aai Herodes. Lamatua tao j'ara ne'e, sèna ka kahadhu karehe dhèu Yahudi sèra, lèke boe ja'a.’’
12 Èle èèna ka, Petrus la'e asa èmu Maria. Maria ne, ina Yohanis. Ngara leo Yohanis ne, Markus. Ètu èmu èèna, dhèu ae pakaboko ho sabaj'a manèngi Ama Lamatua ladhe-leru Petrus ètu d'ara lii langu èèna. 13 Ropa Petrus d'ai madha hèb'a oka èmu èèna, ka na paroa dènge d'eu hèb'a oka. Ka ana bhèni sab'a èci, ngara na Rode, neo ne'a dhèu cee ka dhu mai. 14 Ropa na tadèngi lii Petrus, na tadhe dènge. Na karej'e bia. Ka rai asa d'ara èmu la'e, peka dènge dhèu ètu sèra, aku nèngu na, ‘‘Nanene ku! Petrus nuka li'u!’’ Te ngaa lula nèngu bingu, ka na bhèlu eele bhoke hèb'a oka hia Petrus.
15 Te ngaa dhèu ae sèra dhaa, peka na, ‘‘Aad'o, sina ma! Baku paleko!’’
Te ngaa bhèni ne peka hari, aku nèngu na, ‘‘Tare'a! Èèna lii Petrus! Nuka li'u nèi.’’
Ka dhèu se'e lèka boe, aku rèngu na, ‘‘Ele boe, dhèu nèi ana pajuu Lamatua nèti sorga, dhu mai madhenge Petrus.’’
16 Rèngu patule-pajuku taruu, te ngaa Petrus loe boe paroa, toke lasi bhoke hèb'a oka hia ne. Ropa ra bhoke rare, ka rèngu malaa, lula Petrus tare'a-re'a di. 17 Hèia na hia tadha dènge kacui-aai na, sèna ka rèngu mau-mau. Ka na lole tasa mera mia Ama Lamatua kalua eele nèngu nèti d'ara èmu bèdho. Hèia na pua si, aku nèngu na, ‘‘Lami lole lii ne'e aa'i-aa'i mi Yakobis dènge dhèu pajuu-paleha Lamatua leo sèra.’’ Èle èèna ka, Petrus la'e asa era leo.
18 Asa bèli mad'ae aae èèna, ropa sordad'u j'aga sèra ladhe, na, Petrus aad'o heka, ka rèngu ele ngangee dènge madha'u titu kèna, lula rèngu re'a boe ngaa dhu j'aj'i mi dedha rèngu. 19 Ropa Herodes tadèngi lii ne'e, ka na paredha si lasi tenge Petrus. Te ngaa rèdhi boe ne. Ka Herodes hia paredha ho parisa sordad'u j'aga sèra. Parisa rare, ka Herodes pua pamadhe aa'i sordad'u j'aga sèra.
Èle èèna ka, Herodes pakèd'i nèti propensi Yudea, ka la'e pea ètu kota Kaisarea.
Mamadhe Herodes Agripa
20 Lod'o èèna, dhèu-dhèu nèti dua kota, èci ngara na Tirus, aa èci ngara na Sidon, biasa hèli nganga'a nèti rai dhèu aae Herodes. Te ngaa nèbhu aae le, dhèu aae musu dènge rèngu. Hèia ra padhue ho tenge j'ara padame dènge ne. Ka ra pili dhèu canau ho lasi paraga dènge Herodes. D'ai kota Kaisarea, rèngu pa'angalai dènge dhèu Herodes èci, ngara na Blastus. Nèngu ne, dhèu kapai ètu d'ara èmu dhèu aae. Rèngu pare'a dènge Blastus ho nèngu bhoke j'ara sèna ka rèngu paraga dènge dhèu aae Herodes.
21 Hèia Herodes dhaa kahèi ho sèmi rare rèngu. Ka ra pare'a lod'o paraga. Lod'o èèna, rèngu tao tatao kapai. Herodes pake mèdha-papake dhèu aae, ka na madhèdi ètu kadera paredha na. Hèia na padhai lii dènge rèngu. 22 Ropa rèngu tadèngi lii na, hèia dhèu se'e koa ne, peka na, ‘‘Nanene ku lii na laa! Ne'e lii boe nèti dhèu rai-haha, te ngaa lii nèti dhèu dedha-liru!’’ 23 Kaca'a laa, ana pajuu Ama Lamatua ca dhèu nèti sorga hia èi-papèd'a èci mi Herodes, lula nèngu sèmi lii koa rèngu, aa na seti eele Ama Lamatua. Ka kalati ra'e aa'i ngi'u Herodes, ka na madhe aapa.
24 Dènge j'ara dhu j'aj'i sèra, dhèu palolo Lii Lolo Be'a Ama Lamatua d'ai asa mia-mia. Aa dhèu dhu madhutu J'ara Mamuri Lamatua Yesus tabha ae kahèi.
25 Ropa Barnabas dènge Saulus hia rare doi pa'oru nèti dhèu Antiokia mi dhèu Yerusalem, ka ra lèpa hari asa Antiokia. Rèngu gale rèti dènge ana ngèru èci, ngara na Yohanis. Ngara leo na, Markus.