Petrus siri iisi na, lula na sarani dhèu Yahudi boe
11
Petrus dhae lèpa mèka, te ngaa dhèu pajuu-paleha Yesus dènge dhèu parcaya Yesus dhu leo sèra, dhu pea ètu Yerusalem, tadèngi rare le, peka na, dhèu Yahudi boe sèmi rare le Lii Lole Be'a Lamatua. 2 Ropa Petrus d'ai kota Yerusalem, dhèu nèti partei Yahudia dhu parcaya Yesus mai pasala ne, 3 peka na, ‘‘Weh! Èu tao samia kèna? Èu me'a ad'a-tatao èdhi, do aad'o? Èu ne bani titu kèna, maso asa d'ara èmu dhèu leo! Aa èu mu'a-minu dènge rèngu kahèi! Baku tao sèmi èèna, te rèngu madhutu mèka ad'a suna èdhi! Èdhi bisa boe pa'èci dènge rèngu sèra!’’4 Hèia Petrus lole aa'i-aa'i dhu j'aj'i le, peka na, 5 ‘‘Lod'o ja'a ètu kota Yope, ja'a laku sabaj'a, ka ja'a abhu tanila. Ja'a kèdhi liru bhoka, ka hahèla-koi bhèla aae ca bèla, dhu èki re suu-suu èpa na, puru mai asa ja'a. 6 Ropa ja'a patigi asa d'ara hahèla-koi èèna, ja'a kèdhi rupa-rupa badha, nuka badha ai èpa, badha rod'o-kakara, dènge rupa-rupa manu-bhui kahèi. Badha se'e se, dhu èdhi dhèu Yahudi luri. 7 Hèia ja'a tadèngi lii èci pua, peka na, ‘Petrus! Kèd'i ka! Kèj'i badha se, ho mu'a!’
8 Te ngaa ja'a dhaa, peka na, ‘Bisa boe, Ama! Baku sèmi èèna! Te ja'a ku'a kèdhi mèka sisi badha sèmi se'e! Dhèu Yahudi luri sisi badha se'e aa'i-aa'i ra!’
9 Te ngaa lii ne b'ala hari, peka na, ‘Ladhe Ama Lamatua peka mèdha ngaa dhu mèu, èu baku peka na kaj'alu!’
10 Ja'a kèdhi hahèla-koi èèna cèu padhutu tèlu hari, ka ca'e hari asa dedha-liru la'e.
11 Lod'o èèna kahèi, dhèu tèlu d'ai èmu dhu ja'a pea. Rèngu nèti Kaisarea mai tenge ja'a. 12 Hèia Roh Lamatua dhu Mola-Mèci peka dènge ja'a, aku nèngu na, ‘Puru ho lamu ka dènge dhèu sèra. Èu baku mage-mage ia ka. Èu baku madenge dènge rèngu.’ Ka a'ari èdhi dhèu èna palere dènge ja'a kahèi asa Kaisarea. Ètu èèna, ji'i aa'i-aa'i mi maso asa d'ara èmu komedhaa sordad'u Roma. 13 Na lolo, peka na, pèri-pèri lod'o dhu la'e èèna, nèngu nèdhi ana pajuu Lamatua puru nèti sorga, titu ètu d'ara èmu na. Ka na peka, aku nèngu na, ‘Pua dhèu lasi asa kota Yope, ho paroa mèti dhèu èci, ngara na Simon Petrus. 14 Sèna ka dhèu èèna ka dhu pad'elo mi dedha èu dènge isi èmu èu aa'i-aa'i ra, j'ara Lamatua dhu hia miu mamuri, dènge saku eele sasala-sasigo miu sèra.’
15 Nèti èèna ka, ja'a pad'elo J'ara Mamuri Lamatua mi dedha rèngu. Ka rèngu abhu dènge ka Roh Lamatua dhu Mola-Mèci, sama sèmi èdhi abhu ca hari na. 16 Ropa ja'a kèdhi rèngu abhu Roh Lamatua kahèi, ka ja'a sanèd'e lii padhai lii Lamatua Yesus uru èèna, dhu peka na, ‘Yohanis sarani dhèu pake dhoka èi di, te ngaa ladhe miu mate hari pèri-pèri lod'o, èèna na Lamatua neo tao dhu kapai risi eele hia miu. Nuka, Na hia miu Roh Na dhu Mola-Mèci.’b 17 Te Lamatua unu Na ka dhu hia Roh Na mi dedha dhèu leo sèra, sama sèmi Na pala-bagi mi èdhi se. De madhutu dad'èi miu, ja'a hud'i palab'a dènge Ama Lamatua, do tasamia? De ja'a peka ngaa hari?’’
18 Ropa tadèngi rare, Petrus siri iisi na sèmi èèna, ka rèngu pasala heka ne. Hèia ra koa-kio Ama Lamatua, peka na, ‘‘Ira ii! Nia kahèi, nga! Lamatua bhoke le j'ara hia dhèu leo ho ra tèke eele j'ara mamuri rèngu dhu sala, ho Lamatua saku eele sasala-sasigo rèngu. Sèna ka rèngu abhu mamuri taruu dènge Ne.’’
Dhèu unu Lamatua Yesus paj'ala asa mia-mia. Cahag'e pakaboko hari ètu kota Antiokia
19 Uru èèna, lod'o ra pamadhe rare Stefanus, ka ra paj'èra dhèu unu Yesus. Nèti èèna ka, dhèu se'e rai paj'ala asa mia-mia. Cahag'e rai asa propensi Finisia. Cahag'e rai asa pulu Siprus, aa cahag'e hari rai d'ai kota Antiokia ètu propensi Siria. Dhèu dhu rai sèra, lole taruu Lii Lolo Be'a Lamatua Yesus asa mia-mia. Te ngaa ra lole dhoka dènge dhèu Yahudi rèngu sèra. Ra lole boe dènge dhèu leo.c
20 Te ngaa abhu kahèi dhèu unu Lamatua dhu mai nèti pulu Siprus dènge kota Kirene. Rèngu cahag'e rai taruu lasi asa kota Antiokia ètu propensi Siria. Rèngu se'e ka dhu lole Lii Lolo Be'a Lamatua Yesus hia dhèu Yahudi boe ètu era èèna. 21 Lamatua hia si koasa Na, nèti èèna ka, dhèu ae titu kèna parcaya Lamatua Yesus.
22-24 Lod'o èèna, dhèu unu Lamatua Yesus ètu Yerusalem tadèngi, na, dhèu leo ètu kota Antiokia parcaya Yesus kahèi. Ka ra pua Barnabas la'e ladhe si ètu nèi. Barnabas ne, dhèu d'ara be'a, aa parcaya tare'a-re'a Ama Lamatua. Aa Roh Lamatua dènge nèngu kahèi.
Ropa nèngu d'ai nèi, na nèdhi tare'a Ama Lamatua sab'a ètu d'ara mamuri dhèu leo sèra. Ka d'ara nèngu karej'e. Ka na pa'èra d'ara rèngu, sèna ka rèngu madhutu taruu J'ara Mamuri Lamatua dènge tare'a-re'a. Dènge j'ara ne'e, dhèu unu Lamatua ètu èèna asa tabha ae.
25 Èle èèna ka, Barnabas la'e tenge Saulus asa kota Tarsus. 26 Lod'o paraga dènge ne, ka na pamako Saulus ho lasi pea ètu Antiokia. Ka dua ra pea ètu nèi ca tèu, pa'èci dènge dhèu unu Lamatua sèra. Bèli-bèli èèna, rèngu dua ra aj'a-nori J'ara Mamuri Lamatua Yesus mi dhèu ae. (Ètu kota Antiokia ne'e ka, dhèu mulai pangare dhèu parcaya Lamatua Yesus, ‘dhèu Kristen’).d
27 Lod'o rèngu dua ra pea ètu Antiokia era, pèri-pèri dhèu mai nèti Yerusalem. Ama Lamatua tema le pake dhèu se'e ho rèti lii padhai Na. 28 Nèti rèngu se, dhèu èci, ngara na Agabus. Roh Lamatua peka dènge ne, aku nèngu na, ‘‘Bèli-camèd'a abhu lod'o manganga-mad'èu lèke palème toke d'ai suu-suu rai-haha.’’ Hèia la'e peka hari dènge dhèu-dhèu. (Lii dhu na padhai na, mema j'aj'i tare'a, lod'o dhèu aae kapai risi ètu Roma, ngara na Klaudius, nèd'u paredha. Ra paroa dhèu aae kapai risi ne, Keser.)e 29 Ropa tadèngi rare lii Agabus ne, dhèu unu Lamatua Yesus ètu Antiokia sèra, rare lii èci ho pa'oru doi, sèna ka ra hia mi a'ari dhu parcaya Lamatua Yesus, dhu abhu j'aj'èra ètu propensi Yudea. Èci-èci hia madhutu a'abhu ra. 30 Ropa ra pa'oru rare, ka ra pua Barnabas dènge Saulus rèti doi sèra asa dhèu j'èra sèi.