Ra hag'e rare dhèu pidhu, ho lalau nganga'a bhèni balu ana-lalu
6
Lod'o èèna, dhèu dhu parcaya Yesus asa tabha ae. Te ngaa rèngu pake dua lii. Dhèu Yahudi cahag'e, pake lii Aram. Aa cahag'e hari, pake lii Yunani. Nèbhu boe ka, j'aj'i lii langu ètu talora dua kaboko dhèu se'e. Dhèu dhu pake lii Yunani, d'ara be'a boe dènge dhèu dhu pake lii Aram. Ra peka na, ‘‘Ne'e ne, lèke boe! Ladhe miu papala nganga'a bèli-bèli, miu bia cabèka. Bhèni balu ji'i abhu boe nganga'a.’’2 Lula èèna ka, dhèu pajuu-paleha Lamatua dhèu canguru dua, pakaboko dhèu dhu parcaya Lamatua Yesus aa'i-aa'i ra. Ka ra peka, aku rèngu na, ‘‘A'ari aa'i-aa'i ti! Ladhe ji'i ae eele nèti sasab'a ji'i, ho lalau dhoka nganga'a-nginu miu di, bisa kahèi, te ngaa, lèke boe! Lula ji'i se hud'i aj'a-nori taruu Lii Holo-Nori Lamatua. 3 De madhutu ngangee ji'i, sèmi ne'e ka. Be'a risi, hag'e mere dhèu pidhu nèti talora miu. Tenge dhèu dhu kolongara be'a, dhu d'èlu-mèu, aa Roh Lamatua ator mamuri na. Ladhe mi pili mere dhèu sèmi sèra, pe ji'i ded'e si, ho ra lalau nganga'a-nginu. 4 Ladhe sèmi èèna, ji'i abhu tebho ae ho manèngi-mangaj'i aa aj'a Lii Holo-Nori Lamatua.’’
5 Hèia dhèu se'e sèmi rare kahèi lii padhai lii Petrus si. Ka hag'e rare dhèu pidhu, nuka:
dhèu èci, ngara na Stefanus. Nèngu ne parcaya tare'a-re'a Lamatua Yesus, dènge Roh Lamatua dhu Mola-Mèci pake nèngu. Aa angalai nèngu na, nuka:
Pelipus,
Prokorus,
Nikanor,
Timon,
Permenas,
dènge Nikolas, nèti kota Antiokia. Nèngu dhèu Yahudi boe, te ngaa na maso agama Yahudi.
6 Hèia lere rèti dhèu pidhu dhu ra pili rare sèra, asa madha dhèu pajuu-paleha Lamatua. Ka ra bane ai dènge manèngi-mangaj'i hia si, ho ded'e si j'aj'i dhèu ladhe-leru bhèni balu ana-lalu, sèna ka aa'i-aa'i ra abhu pala dhu pamera.
7 Èèna ka, dhèu tadèngi Lii Holo-Nori Lamatua ètu mia-mia. Hèia dhèu-dhèu dhu madhutu J'ara Mamuri Lamatua Yesus, asa tabha ae ètu kota Yerusalem. Aa ama agama Yahudi sèra, ae kahèi dhu j'aj'i dhèu unu Lamatua Yesus.
Ra kèpe Stefanus
8 Lod'o èèna, Ama Lamatua hia berkat ae mi Stefanus. Na hia Stefanus koasa kahèi, ho na tao tadha-tadha malaa dènge j'ara-j'ara kapai, sèna ka dhèu ae rèdhi unu ra. 9 Ètu era èèna, abhu pèri-pèri dhèu Yahudi dhu mai nèti rai-rai kaj'èu, nuka: kota Kirene, kota Aleksandria, propensi Kilikia, dènge propensi Asia. Uru èèna, rèngu j'aj'i ènu dhèu leo, te ngaa nèbhu-nèbhu ka lamatua rèngu patabuli si. Èle èèna ka, dhèu se'e pakaboko ètu Yerusalem. Rèngu tema le lasi asa èmu manèngi-mangaj'i dhu ra patitu unu ra. Èmu manèngi-mangaj'i èèna, ra pangare ne, ‘J'aj'i Heka Ènu’. Ropa ra tadèngi lii padhai lii Stefanus, dhèu se d'èi boe, ka ra pab'ala dènge ne. 10 Stefanus ne, dhèu d'èlu-mèu, lula nèngu padhai lii pake koasa Roh Lamatua dhu Mola-Mèci. Nèti èèna ka, dhèu se'e segi boe nèngu. 11 Ka ra tenge j'ara aapa mi dedha Stefanus. Ra lasi b'ae dhèu ho j'aj'i sakasii leko-monya, peka na, ‘‘Ji'i tadèngi, na, dhèu ne'e padhai lii pahaha Musa dènge Ama Lamatua!’’
12 Rèngu dadugu dhèu, toke d'ai dhèu heka ad'a Yahudi dènge mese agama sèra tadèngi kahèi. Ka ra nasa. Nèti èèna ka, lasi kèpe rare Stefanus, hèia ra nuni ne asa era pama'ète lii langu agama. 13 Sakasii leko-monya rèngu sèra, ue lii langu ho pamanahu Stefanus, peka na, ‘‘Dhèu ne loe boe padhai lii pakarehe Èmu Kapua Manèngi-Mangaj'i. Aa na peka pa'ele iie lii paredha Ama Lamatua, dhu Musa papuru mi èdhi. 14 Ji'i tadèngi kahèi, na peka, na, Yesus, dhèu Nasaret, neo sag'e eele Èmu Kapua Manèngi-Mangaj'i ne. Aa nèngu ne neo pa'ele iie atora ad'a dhu baki Musa tao tèka hia èdhi.’’
15 Èle èèna ka, dhèu aa'i-aa'i dhu madhèdi ètu era pama'ète lii langu agama èèna ladhe kaloo Stefanus, lula rèhu na sama sèmi rèhu ana pajuu Lamatua nèti sorga.