Ananias dènge Safira madhe, lula rèngu neo cob'a Roh Lamatua
5
Te ngaa lod'o èèna, abhu kahèi dhèu èci, ngara na Ananias, dènge dhèu èmu na, Safira. Rèngu dua ra pahie rai ra ca kasib'i kahèi. 2 Te ngaa dua ra pare'a ho huni kab'ua rai èèna cahag'e. Pahie rare, ka Ananias la'e peka dènge dhèu pajuu-paleha Yesus sèra, aku nèngu na, ‘‘Ji'i heka pahie ngare rai ji'i ca kasib'i kèna. De ji'i neo hia kab'ua na asa Ama Lamatua.’’ 3 Te ngaa Petrus tao dènge ne, peka na, ‘‘Ananias! Nga tao ka èu huni doi kab'ua rai èèna cahag'e? D'ara èu mema karehe, lula èu madhutu dad'èi dhèu aae nidhu. Èu bani kapod'e-kabèli Roh Ama Lamatua dhu Mola-Mèci! 4 Sèmi ne'e! Rai na unu èu. De èu neo pahia, do aad'o, èèna na madhutu dad'èi èu. Ladhe èu pahia le, èu neo hia doi kab'ua na aa'i-aa'i, do aad'o, èèna na madhutu dad'èi èu kahèi. Te ngaa tasamia ka èu bisa tao sèmi ne'e? Èu neo pagoa ji'i dhèu rai-haha, te ngaa abhu boe dhèu dhu bisa leko-monya Lamatua!’’
5 Ropa na tadèngi Petrus padhai lii sèmi èèna, cag'ag'a laa Ananias bèbhe, ka madhe dènge. Nèti èèna ka, dhèu dhu tadèngi lii ne'e, madha'u titu kèna. 6 Hèia ana ngèru dhèu pèri mai, ka ra pahutu ngi'u Ananias, ka nedhe rèti lasi padhane.
7 Pe d'ai tèlu jam sa, dhèu èmu Ananias mai. Te ngaa na ne'a boe ngaa dhu j'aj'i deo na. 8 Hèia Petrus karèi ne, peka na, ‘‘Tasamia, ina? Miu pahie le rai èèna, kab'ua sange ne'e ka, do?’’
Ka na dhaa, peka na, ‘‘Tare'a, ama. Kab'ua nèngu sange èèna ka.’’
9 Hèia Petrus tao dènge ne, peka na, ‘‘Tasamia ka èu dènge dhèu èmu mu pame'a ho neo cob'a Roh Lamatua? Mu ladhe, ee! Dhèu dhu heka padhane dhèu èmu èu sèra, lèpa hari mai le. Ciki ood'e hari na, rèngu nedhe rèti hari ngi'u èu, ho lasi padhane ètu karasa dhèu èmu èu.’’
10 Ropa tadèngi nare lii padhai lii Petrus, cag'ag'a laa dhèu bhèni ne bèbhe, ka madhe dènge ètu era èèna. Ropa ana-ana ngèru sèra maso hari asa d'ara èmu, ladhe rèdhi bhèni ne madhe le. Ka j'èru rèti ka ngi'u bhèni ne, lasi padhane ètu karasa dhèu èmu na.
11 Èle èèna ka, dhèu parcaya Yesus sèra madha'u. Dhèu-dhèu leo dhu tadèngi lii lolo nèti mamadhe Ananias dènge Safira, madha'u kahèi.
Petrus si puri-pa'èle dhèu ae
12 Lod'o èèna, dhèu pajuu-paleha Yesus sèra tao ae tadha-tadha malaa. Ka dhèu ae sèra ladhe rèdhi. Dhèu pajuu-paleha sèra biasa lasi asa d'ara Èmu Kapua Manèngi-Mangaj'i Lamatua. Rèngu aa'i-aa'i ra pakaboko dènge d'ara èci ètu d'ara Èmu Taleo Dhèu Aae Soleman. 13 Lod'o èèna, dhèu ae ka dhu koa dhèu unu Lamatua Yesus sèra. Te ngaa dhèu leo cahag'e bani boe maso pakaboko dènge rèngu ètu èmu èèna.
14 Te dhèu dhu parcaya Yesus, bhèni-mone, asa tabha ae. 15 Lula tadha malaa ae dhu j'aj'i èèna, ka dhèu ae rèti dhèu pèd'a lasi ho ra pamadhèdi mi dedha dhèpi ètu sebhe j'ara. Te ra pangee, peka na, ‘‘Ladhe Petrus dènge Yohanis kako re era ne'e, sad'i mamaho ra lèke rèngu di, dhèu pèd'a se èle dènge nèti papèd'a rèngu.’’ 16 Lod'o èèna, dhèu ae mai taruu nèti rae-rae ètu sebhe kota Yerusalem. Rèti dènge dhèu-dhèu pèd'a, ka dhèu pajuu-paleha Lamatua se puri-pa'èle si aa'i-aa'i ra. Rèngu rèti dhèu-dhèu dhu nidhu tao kahèi, ka dhèu pajuu-paleha Lamatua se babège eele aa'i nidhu-nidhu sèra.
Dhèu pajuu-paleha Lamatua Yesus abhu j'aj'èra
17 Lula tatao dhèu pajuu-paleha Lamatua Yesus sèra, nèti èèna ka kètu kapai risi agama Yahudi, dènge angalai nèngu nèti partei Saduki sèra, tèka d'ara. 18 Nèti èèna ka, ra kèpa dhèu pajuu-paleha Yesus sèra, ka ra pamaso si asa d'ara bèdho.a
19 Te ngaa mèda èèna kahèi, ana pajuu Lamatua èci mai nèti sorga asa d'ara bèdho èèna, ka na bhoke eele babèdho. Hèia na lere nèti si asa li'u. Ka na peka, aku nèngu na, 20 ‘‘Lami dènge ka asa d'ara Èmu Kapua Manèngi-Mangaj'i. Lami peka aa'i dènge dhèu-dhèu ètu nèi, sèna ka ra madhutu J'ara Mamuri dhu hiu nèti Lamatua Yesus.’’
21 Bèli mad'ae èèna, ako maroga era, rèngu madhutu ka lii paredha nèti ana pajuu Lamatua nèti sorga deo na. Ka ra maso asa d'ara madha Èmu Kapua Manèngi-Mangaj'i, hèia ra aj'a-nori dhèu-dhèu ètu sèra.
Nèbhu boe, hèia kètu kapai risi agama Yahudi dènge angalai na sèra mai palere dènge dhèu kapai dènge dhèu heka-dhèu heka ad'a Isra'el. Rèngu pakaboko ho parisa lii langu nèti dhèu pajuu-paleha Lamatua Yesus sèra. Hèia ra pua dhèu lasi rare Petrus si nèti d'ara bèdho, ho ra parisa lii langu ra.
22 Te ngaa ropa rèngu d'ai èmu bèdho, Petrus si aad'o heka ètu d'ara. Ka ana j'aga sèra lèpa hari lasi peka dènge dhèu kapai sèra. 23 Ra peka na, ‘‘Ama-ama si, baku nasa. Ropa ji'i d'ai èmu bèdho, ji'i ladhe, na, babèdho dhu patèke. Aa dhèu j'aga sèra titu ètu era èèna. Te ngaa ropa ji'i pua ra goe babèdho ho ji'i la'a asa d'ara, ji'i ngèdhi boe dhèu èci sa ètu d'ara.’’
24 Ropa tadèngi rare, hèia kètu agama Yahudi sèra, dènge kapala j'aga Èmu Kapua Manèngi-Mangaj'i, aa'i-aa'i ra j'aj'i malaa, aa sèmi dhèu dhu ele ngangee sa.
25 Nèbhu boe, hèia dhèu èci mai peka, aku nèngu na, ‘‘Ama-ama si, nanene ku laa! Dhèu dhu miu bèdho sèra, ètu li'u si, ra titu ho aj'a-nori dhèu ètu d'ara Èmu Kapua Manèngi-Mangaj'i ne!’’
26 Ropa tadèngi rare, ka kapala j'aga Èmu Kapua Manèngi-Mangaj'i èèna paroa dhèu j'aga pèri-pèri ho lasi kèpe hari Petrus dènge angalai na sèra. Te ngaa dhèu j'aga sèra madha'u, lula dhèu dhu nanene lii padhai-padhue Petrus sèra, ae seli. Ra pajiko, na, mage dhoka dhèu ae sèra patao-palaha, ho ra pèci si. Nèti èèna ka, ropa rèngu kèpe hari Petrus si, ra bani boe pake j'ara sakaa.
27 Èle èèna ka, ra lere rèti Petrus si asa era pama'ète lii langu. Ka kètu kapai risi agama mulai karèi si, 28 peka na, ‘‘Ji'i kai le miu, sèna ka aj'a ia ka dhèu lula-nèti Dhèu dhu neo tao j'ara mamuri hiu èèna, sina ma! Te ngaa miu palab'a! Miu pusi-pahae boe dènge lii paredha ji'i, te ngaa miu tao madhutu dad'èi miu di! Miu lami aj'a-nori palème dhèu ètu kota Yerusalem ne. Èèna sama dènge miu core sasala mi dedha ji'i, peka na, ji'i se ka dhu pua dhèu lasi pamadhe Yesus.’’b
29 Hèia Petrus kèd'i titu j'aj'i dhèu dhu padhai lii nèti angalai na sèra. Ka na dhaa, peka na,
‘‘Ama-ama! Ladhe abhu paredha nèti dhèu rai-haha dhu palab'a dènge dad'èi Ama Lamatua, ji'i ngo'o boe madhutu. Te ngaa ji'i madhutu dhoka paredha Ama Lamatua di! 30 Dhèu dhu bhoke j'ara mamuri hiu èèna, nuka Yesus. Nèngu èèna ka dhu miu paku pamadhe ètu dedha aj'u palolo-palèbha. Nèti uru ka mai, bèi-baki èdhi manèngi-mangaj'i mi Ama Lamatua. Ama Lamatua èèna ka dhu pamamuri hari Yesus nèti mamadhe Na!
31 Limuri ne, Ama Lamatua ded'e le Yesus j'aj'i ai g'ana Na. Ka Yesus nèd'u le paredha sama sèmi dhèu aae kapai. Nèngu bhoke le j'ara, sèna ka Lamatua patabuli eele dhèu nèti koasa sasala-sasigo ra. Na neo hia j'ara mi èdhi dhèu Isra'el se'e, sèna ka èdhi ae eele nèti sasala èdhi aa'i-aa'i ti. Dènge j'ara sèmi èèna, d'ara Ama Lamatua pacuhi, ho Na ige heka sasala èdhi dhèu Isra'el. 32 Te èdhi tèdhi le dènge musi madha èdhi, Yesus mema madhe tare'a, te ngaa Na mamuri hari kahèi. Limuri ne Roh Ama Lamatua dhu Mola-Mèci peka le dènge dhèu dhu madhutu J'ara Mamuri Yesus.’’
33 Tadèngi rare lii padhai lii Petrus sèmi èèna, ka dhèu dhu madhèdi ètu era pama'ète lii langu èèna nasa titu kèna, ka ra neo pamadhe dhèu pajuu-paleha Lamatua sèra. 34 Te ngaa ètu talora rèngu, abhu kahèi dhèu èci dhu madhèdi parisa lii, ngara na Gamaliel. Dhèu ae pakab'ua ne, lula nèngu ne mese dhu d'èlu-mèu nèti partei agama Parisi. Ropa Petrus padhai lii nare, ka dhèu sèra neo pamadhe ne, hèia Gamaliel kèd'i titu, ka na pua dhèu ho lere taha Petrus si asa li'u. 35 Ropa Petrus si d'ai li'u, ka Gamaliel padhai lii dènge ama-ama ètu sèra, aku nèngu na,
‘‘A'ari ti! Èdhi hud'i pajiko paie ku! Mage dhoka èdhi malai ae tao bhabhelu mi dedha dhèu se'e. Èdhi hud'i pangee madhera. 36 Ele boe miu sanèd'e era, dhèu dhu ngara na Teudas. Nèngu madhe nèbhu le, te ngaa lod'o na mamuri era, na ded'e ngi'u na j'aj'i dhèu kapai, pe d'ai dhèu èpa ngasu sa madhutu nèngu. Te ngaa ropa ra pamadhe ne, ana-ana madhutu na paj'ala asa haa asa dhimu. Toke d'ai sange ne'e, dhèu rèdhi heka rèngu. Ra rai aa'i mèu-mèu le!
37 Aa miu sanèd'e hari ku lii lole èci. Uru èèna, lèke lod'o dhèu paredha ige dhèu ètu d'ara kabarai. Abhu dhèu èci, ngara na Yudas, nèti propensi Galilea. Dhèu ae madhutu nèngu kahèi. Te ngaa ra pamadhe ne kahèi. Hèia ana-ana madhutu na rai paj'ala kahèi, ka d'ai sange ne'e tèdhi heka dhèu èci sa.
38 De a'ari! Madhutu ngangee ja'a, baku pamadhe dhèu se'e. Hud'i rèngu sène. Te a'aj'a dènge kakako rèngu, ladhe mai nèti dhèu rai-haha, na, nèbhu boe, ele unu na. 39 Te ngaa ladhe a'aj'a rèngu tare'a-re'a nèti Ama Lamatua, miu taha mere boe. Nèti èèna ka, miu pajiko paie ku. Mage dhoka miu palab'a dènge Ama Lamatua.’’
Tadèngi rare sèmi èèna, rèngu aa'i-aa'i ra lèka, ka ra madhutu lii Gamaliel. 40 Èle èèna ka, ra paroa hari dhèu pajuu-paleha Lamatua sèra, ka ra pua dhèu ho hake si. Hèia ra kai si, ho baku ale-ale ia ka kolongara Yesus. Ka ra patabuli si.
41 Hèia dhèu pajuu-paleha Lamatua se tèke eele era pama'ète lii langu èèna. Ra pangee, na, masi ka kolongara rèngu ele iie lula madhutu Lamatua Yesus, te ngaa rèngu karej'e kahèi, lula rèngu hud'i abhu j'aj'èra sèmi èèna. Nèti èèna ka, d'ara rèngu karej'e titu kèna. 42 Bèli-bèli èèna, rèngu lasi aj'a-nori dhèu, peka na, ‘‘Dhèu dhu Ama Lamatua paj'uj'u nare nèti uru ka mai, nuka Yesus di.’’ Ka ra peka padhue taruu, nèti ca èmu d'ai ca èmu, sèmi èèna kahèi ètu d'ara Èmu Kapua Manèngi-Mangaj'i.