Kètu agama Yahudi paroa Petrus dènge Yohanis
4
Lod'o èèna, ropa Petrus dènge Yohanis padhai lii era dènge dhèu ètu sèra, dhèu kapai canau mai. Rèngu sèra, kètu agama Yahudi, dhèu nèti partei Saduki, dènge komedhaa j'aga Èmu Kapua Manèngi-Mangaj'i. Rèngu mai neo patao dènge Petrus dènge Yohanis. 2 Dhèu sèra nasa, lula rèngu dua ra d'èi peka dènge dhèu ae, peka na, ‘‘Yesus mamuri hari le nèti mamadhe Na. Dènge j'ara èèna, Nèngu bhoke j'ara hia dhèu madhe sèna ka bisa mamuri hari.’’a 3 Ka ra paredha dhèu rèngu lasi kèpe dua ra. Te ngaa, lula lod'o oe cèna kèna, ka ra pamaso taha si asa d'ara bèdho. Ho bèli èèna, heka ra neo parisa si kèna. 4 Te ngaa ètu talora dhèu dhu d'èi nanene dhèu pajuu-paleha Lamatua Yesus sèra, ae ka dhu mangaku, na, lii aj'a-nori rèngu sèra lèke tare'a. Nèti èèna ka dhèu parcaya asa tabha ae, pe d'ai lèmi riho dhèu sa. 5 Asa bèli èèna, dhèu kapai Yahudi sèra pakaboko ètu kota Yerusalem, nuka dhèu paredha, dhèu heka-dhèu heka ad'a Yahudi, dènge mese agama Yahudi sèra. 6 Kètu kapai risi agama Yahudi, dhu ngara na Hanas, ètu èèna kahèi. Dhèu kapai leo, sèmi Kayafas, Yohanis, Aleksander, dènge a'ari leo sèra nèti kètu kapai risi agama Yahudi ètu èèna kahèi. 7 Ropa ra tesa aa'i, ka ra paredha dhèu lasi rare Petrus dènge Yohanis, ho rèti mai asa madha ama-ama dhèu kapai se'e. Ropa rèngu mai, ka ra karèi si, peka na, ‘‘Tasamia ka miu bisa puri-pa'èle dhèu karuku? Miu pake koasa nèti cee? Aa cee ka dhu pua miu ka miu bani tao j'ara èèna?’’
8 Hèia Roh Ama Lamatua pa'èra d'ara Petrus, ka na dhaa, aku nèngu na,
‘‘Ama-ama! Miu ka dhèu kapai, dènge dhèu heka kabarai Isra'el! Baku nasa ladhe ji'i ako malaa ciki. 9 Ji'i ladhe, na, ama-ama si neo tao lii langu, lula ji'i puri-pa'èle dhèu karuku èci. Aa miu neo me'a ji'i pake koasa nèti cee? 10 De ja'a neo peka sèmi ne'e: tatu ama si sanèd'e era dhèu Nasaret, dhu ngara Na Yesus. Nèngu èèna, Kristus, dhu Ama Lamatua paj'uj'u mema nèti uru ka mai. Te ngaa miu paku pamadhe Ne ètu aj'u palolo-palèbha. Masi ka sèmi èèna, te ngaa Ama Lamatua pamamuri hari Ne. De ja'a d'èi sèna ka ama si dènge dhèu Isra'el aa'i-aa'i mi me'a, na, ji'i puri-pa'èle dhèu karuku èèna, pake dhodhoka koasa Yesus. 11 Yesus ne'e ka dhu ra suri tèke le ètu d'ara Sasuri Mola-Mèci Ama Lamatua, peka na,
‘Abhu hadhu cue dhu tuka core eele;
Te ngaa limuri mai, hadhu èèna j'aj'i hadhu padhèdi.’b
12 Ètu palème rai-haha ne, Ama Lamatua bhoke boe j'ara leo dhu bisa patabuli èdhi nèti koasa sasala-sasigo èdhi. Dhodhoka j'ara èci di, nuka Yesus. Abhu boe dhèu leo èci sa dhu bisa hia mamuri mi èdhi.’’
13 Dhèu dhu madhèdi ètu sèra sa re'a, na, Petrus dènge Yohanis se, dhoka dhèu biasa di, èci èèna ka dènge dhèu dhu re'a boe baca-suri. Te ngaa dhèu sèra malaa dènge babani dua ra, lula rèngu padhai lii dhu dènge boe pahuni-pahuni. Tabha hari, ra re'a, na, dhèu dua se, dhèu pa'èci nèti Yesus. 14 Nèti èèna ka, hèb'a dhèu se kutu mèno, toke ra padhai lii heka ae-ae, lula dhèu dhu èle nèti karuku èèna, titu dhii-dhii patoo madha dènge madha. 15 Èle èèna ka, ra pua dhèu pajuu-paleha Yesus dhèu dua sèra, aku rèngu na, ‘‘Dua mi lami ku asa li'u ciki.’’ Ka ra padhue ho neo tenge j'ara aapa. 16 Ka ra padhue-padhai, peka na, ‘‘A'ari aa'i-aa'i ti! Èdhi hud'i tao dhèu dua se samia? Te dhèu Yerusalem aa'i-aa'i ra re'a le, na, rèngu dua se ka dhu tao tadha malaa deo na. Èdhi pasili tare heka, lula bukti nèngu abhu le! 17 De hua iia èdhi tenge j'ara, sèna ka lii ne'e baku ra lolo palème asa mia-mia la'e. Be'a risi èdhi pamadha'u si, sèna ka ra baku aj'a ia ka J'ara Mamuri Yesus. Ladhe ra nanene boe, na, re'a mema!’’
18 Hèia ra paroa dua ra maso hari asa d'ara, ka ra peka dènge si, aku rèngu na, ‘‘Miu ladhe unu mi, ee! Miu bisa heka lolo, do, aj'a-nori dhèu leo lula-nèti Yesus!’’
19 Te ngaa Petrus dènge Yohanis b'ala, peka na, ‘‘Cob'a ama-ama si pajiko ku laa. Mia dhu be'a risi? Madhutu paredha ama si, do, madhutu paredha Ama Lamatua? 20 Te ji'i ngèdhi le dènge musi madha ji'i, aa tadèngi le dènge ro'a dhilu ji'i madha j'ara ae. De tasamia ji'i kutu hèb'a, ho baku lolo dènge dhèu leo!’’
21 Dhèu dhu madhèdi pama'ète lii langu èèna, kai hari rèngu. Ka ra patalale eele dua si, lula ra re'a heka j'ara ho huku si. Rèngu madha'u kahèi, mage dhoka dhèu ae ètu li'u sèi pagama. Te dhèu ae sèra koa-kio kolongara Ama Lamatua, lula dhèu karuku èèna èle le. 22 (Dhèu èèna karuku èpa nguru risi tèu le, ka heka bisa kako kèna.)
Dhèu unu Lamatua Yesus sabaj'a manèngi d'ara bani
23 Ropa ra patabuli eele Petrus dènge Yohanis, dua ra lèpa lasi asa angalai rèngu. Hèia dua ra lole aa'i-aa'i ngaa dhu kètu agama Yahudi dènge dhèu kapai leo sèra kai rèngu ho baku palolo. 24 Ropa ra tadèngi rare lii lolo èèna, ka angalai rèngu aa'i-aa'i sèra pakaboko dènge d'ara èci, ho ra manèngi-mangaj'i, peka na, ‘‘Ama Lamatua dhu Koasa Kapai Risi Eele. Ama dhu paj'aj'i dedha-liru dènge rai-haha, dènge isi ra aa'i-aa'i.c 25 Uru-uru sèra, Roh Ama Lamatua dhu Mola-Mèci pake le baki Daud ho j'aj'i dhèu nèti lii padhai Na, sèna ka suri mema lula-nèti dhèu lab'a Yesus, peka na,
‘Dhèu nèti rai leo sèra nasa lula lii lai-ngèlu;
Dhèu se'e tao lèke boe, ho tao lii langu dhu dènge boe kolo-kapua.
26 Dhèu aae rai-haha sèra pakaboko ho neo pamusu lab'a Ama Lamatua;
sèmi èèna kahèi, dhèu kapai sèra rare lii èci neo lasi lab'a Ama Lamatua dènge Kristus,
nuka Dhèu dhu Lamatua paj'uj'u mema karèi nèti uru ka mai.’d
27 Ka ngaa dhu baki Daud suri na, limuri ne j'aj'i le. Aa sasoa na led'a le. Ètu kota ne'e, dhèu aae Herodes, gubernur Pontius Pilatus, dhèu heka-dhèu heka ad'a Isra'el, dènge dhèu kapai suku leo sèra, pakaboko le. Rèngu pare'a lii ho lab'a Yesus, dhu Ama Lamatua hag'e nare le.e 28 Te ngaa limuri ne, èdhi te'a aa'i le j'ara sèra lèke mola-mola dènge dad'èi Lamatua, madhutu ngaa dhu Lamatua peka tèke nèti uru ka. 29 Lamatua, Èu me'a rèngu dhoka padhai lii neo pamadha'u ji'i di. De ji'i manèngi ho Lamatua hia ji'i d'ara bani. Sèna ka ladhe ji'i la'a padhue-padhai asa dhèu ètu mia-mia Lii Lolo Be'a Lamatua lula-nèti Yesus, d'ara ji'i madha'u boe. 30 Ji'i manèngi Lamatua hia ji'i koasa kahèi, sèna ka ji'i bisa puri-pa'èle dhèu pèd'a. Ji'i manèngi kahèi koasa ho tao rupa-rupa tadha malaa, sèna ka dhèu re'a, koasa èèna mai nèti Dhèu Mola-Mèci dhu Lamatua pua mai, nuka Yesus. Lamatua, d'ai sange èèna ka lii sabaj'a ji'i.’’
31 Ropa ra manèngi-mangaj'i rare, ka èmu dhu rèngu sabaj'a na gaged'o. Hèia rèngu aa'i-aa'i ra abhu Roh Lamatua dhu Mola-Mèci. Èle èèna ka, rèngu kalua, lasi lole Lii Lolo Be'a Ama Lamatua, dènge d'ara bani.
Dhèu parcaya sèra mamuri sama-sama pasae j'aj'èra dènge karej'e
32 Èle èèna, dhèu aa'i-aa'i dhu parcaya Yesus sèra, mamuri d'ara èci, aa mamuri pasue èci dènge èci. Abhu boe dhèu èci sa dhu mèu-moke, aa rèngu biasa pahia-paj'ola. Dhèu dhu dènge mèdha-panyau, na uri ho ra pake sama-sama.f 33 Ka Lamatua hia koasa mi dhèu pajuu-paleha Na, ho ra lole mi dhèu, peka na, Lamatua Yesus mamuri hari nèti mamadhe Na. Aa rèngu ka dhu rèdhi dènge musi madha unu ra. Ka Lamatua udhu-bhori berkat hia rèngu. 34-35 Nèti rèngu se, abhu kahèi dhu pahia rai, do èmu ra. Ho kab'ua na, ra hia mi dhèu pajuu-paleha Lamatua sèra. Ra pake ho hia mi dhèu dhu parluu. Nèti èèna ka, rèngu kura boe ngaa-ngaa.
36-37 Conto sèmi Yusuf. Nèngu ne, ana-èpu Lewi, nèti pulu Siprus. Dhèu pajuu-paleha Lamatua se pangare na ‘Barnabas’, dhu sasoa na, ‘dhèu dhu d'èi pa'èra d'ara dhèu leo’. La'e pahie rai na ca kasib'i. Ka nèti mai kab'ua na hia dhèu pajuu-paleha Lamatua sèra.