Petrus puri-pa'èle dhèu karuku èci
3
Ca lod'o, pe d'ara hake tèlu nihia sa, Petrus dènge Yohanis lasi asa d'ara Èmu Kapua Manèngi-Mangaj'i, ho neo sabaj'a dènge dhèu leo sèra. 2 Rèngu neo maso re hèb'a oka, dhu ngara na ‘Hèb'a Saraga’. Ètu èèna, rèngu rèdhi dhèu mone karuku èci, dhu karuku nèti ina na nara iisi ne. Bèli-bèli mai, na, dhèu nedhe rèti ne asa era èèna, ho na kanata kacui-aai manèngi ngaa-ngaa nèti dhèu cee dhu neo maso asa d'ara Èmu Kapua Manèngi-Mangaj'i re èèna. 3 Ropa na ladhe nèdhi Petrus dènge Yohanis oe maso asa d'ara, ka na kanata kacui-aai, manèngi, peka na, ‘‘Ama-ama, ee! Sue ku ja'a laa. Hia ku ja'a ngaa, do?’’ 4 Ka dua ra ladhe kaloo ka dhèu ne'e, hèia Petrus dhaa, aku nèngu na, ‘‘Ladhe ku mai!’’
5 Hèia nèngu boti kètu na, ladhe asa rèngu dua ra, ka na pangee, na, ‘‘Waa! Ele boe dua ra neo hia ja'a ngaa-ngaa ne.’’
6 Te ngaa Petrus peka, aku nèngu na, ‘‘Ja'a dènge boe doi hualaa ho hia mi èu! Te, ngaa dhu ja'a unu, èèna ka dhu ja'a neo hia mi èu. De nanene paie-iie! Dènge koasa Yesus Kristus, dhèu Nasaret, ja'a pua èu kèd'i titu, ho kako!’’
7 Hèia Petrus kèpe ai g'ana dhèu karuku èèna, ka na pakèd'i patitu ne. Kaca'a laa, haga dhèu ne'e be'a dènge ka, ètu d'ara ciki ood'e èèna kahèi. 8 Cag'ag'a laa, na pasoka titu, hèia na kako la'e-mai neo ne'a, haga nèngu be'a le, do dhae. Èle èèna ka, na la'e palere dènge rèngu dua ra asa d'ara Èmu Manèngi-Mangaj'i. Na kako pasoa-pasoka dènge koa-kio Ama Lamatua. 9 Dhèu aa'i-aa'i sèra ladhe rèdhi dhèu ne'e kako la'e-mai, aa koa-kio kolongara Ama Lamatua.
10 Ropa dhèu ae sèra tadhe ne, ka ra malaa, hèia peka, aku rèngu na, ‘‘Nèngu ne'e ka dhèu karuku dhu madhèdi ètu Hèb'a Saraga, ho manèngi ngaa-ngaa èèna, sina ma? Tasamia ka na j'aj'i sèmi ne'e?’’
Petrus padhai lii ètu d'ara Èmu Kapua Manèngi-Mangaj'i
11 Èle èèna ka, dhèu dhu èle nèti karuku èèna, madhutu Petrus dènge Yohanis. Ka tèlu ra lasi d'ai èmu taleo cue, ngara na ‘Èmu Taleo Dhèu Aae Soleman’. Ètu èèna, dhèu aa'i-aa'i dhu mai lingu rare rèngu malaa titu kèna. 12 Ropa Petrus nèdhi rèngu, ka na padhai lii, peka na, ‘‘Dhèu Isra'el aa'i-aa'i mi! Nga tao ka miu malaa, lula j'ara ne'e ne? Nga tao ka miu ladhe kaloo ji'i? Miu ngee, na, dhèu ne kako lula ji'i pake na'i, do, lula ji'i maj'èni madhutu Ama Lamatua? Do, tasamia? 13 Ja'a neo peka dènge miu sèmi ne'e: bèi-baki èdhi Abraham, Isak dènge Yakob manèngi-mangaj'i mi Ama Lamatua. Lamatua èèna ka dhu ded'e padedha-dedha Dhèu Nèngu dhu Na pili nare, nuka Yesus. Yesus èèna ka dhu miu tule eele Ne, ka saraka Ne asa gubernur Pilatus. Ka gubernur neo patabuli Ne, te ngaa miu ka dhu palab'a, sèna ka na baku patabuli eele Yesus.a 14 Te ngaa Yesus, Dhèu dhu sala boe. D'ara Nèngu be'a. Gubernur neo patabuli eele Dhèu dhu sala boe ne, te ngaa miu aa'i-aa'i mi lab'a ne. Aa dhu bhelu risi hari ka, miu dadugu-rariu ne, sèna ka na patabuli hia miu dhèu bhelu-katub'a èci dhu pamadhe nèdhi dhèu.b 15 Miu ka dhu pamadhe Yesus! Aa te ngaa Nèngu ka dhu hia èdhi mamuri. Mema tare'a Nèngu madhe le, te ngaa Ama Lamatua pamamuri hari Ne. Nèngu ka dhu ji'i ladhe ngèdhi le dènge musi madha ji'i.
16 Miu tadhe dhèu karuku ne. Nèngu èra le, te ngaa ji'i boe ka dhu puri-pa'èle ne. Ji'i se dènge boe koasa ngaa-ngaa. Koasa èèna mai nèti Yesus. Dhèu ne'e ne èra, lula nèngu parcaya Lamatua Yesus. Yesus ka dhu pa'èle ne, ètu katanga madha miu aa'i-aa'i mi.
17 A'ari aa'i-aa'i ti! Limuri ne, ja'a ke'a le, miu dènge dhèu aae-dhèu kapai miu, tao bhelu mi dedha Yesus, te ngaa miu me'a boe ngaa dhu j'aj'i lèpa limuri. 18 Te ngaa Ama Lamatua peka mema nèti uru ka mai, pake dhèu nèti lii padhai Nèngu, peka na, Kristus, nuka Dhèu dhu Na hag'e nare èèna, hud'i d'ui ku j'aj'èra. Ka j'aj'i le, sèmi èèna ka! 19 Nèti èèna ka, miu hud'i ele-ho'a, tèke eele sasala-sasigo miu, hèia lèpa asa Ama Lamatua, ho Na saku eele aa baku ngee ia ka sasala miu sèra. 20 Pe Ama Lamatua pa'èra d'ara miu. Ka Na neo pua Kristus dhu Na hag'e nare èèna, mai hari asa miu. Kristus èèna, nuka Yesus, dhu Na pua le mai asa miu. 21 Nèti uru ka mai, Lamatua padhai lii re dhèu nèti lii padhai Na, peka na, ‘Bèli-camèd'a, Ama Lamatua pamola j'ara aa'i-aa'i, sèna ka j'aj'i hiu.’ Yesus hud'i mate ku ètu Era Mola-Mèci toke d'ai lod'o Nèngu mai hari, ho Na pahiu ngaa-ngaa aa'i-aa'i ra.
22 Uru èèna, baki Musa peka le dènge dhèu Isra'el, aku nèngu na,
‘Lamatua miu, nuka Ama Lamatua, bèli-camèd'a Na pua Dhèu èci nèti talora miu, ho j'aj'i dhèu nèti lii padhai Na, sama sèmi Na pake ja'a, ho j'aj'i dhèu kèti lii padhai Na. De miu hud'i pasa dhilu, sèna ka mi nanene paie, ngaa-ngaa dhu Na neo peka mi miu.c 23 Te ngaa dhèu cee dhu ro'o boe nanene paie, lii padhai lii Dhèu èèna, èèna na cèri eele nèti dhèu unu Lamatua sèra. Dènge heka hak ètu talora rèngu.’d
24 Mesa boe baki Musa di dhu peka sèmi èèna. Te Lamatua pake dhèu leo kahèi, j'aj'i dhèu nèti lii padhai Na. Rèngu peka sèmi èèna kahèi. Sama sèmi uru èèna, Lamatua pake baki Samuel, ho lolo j'ara-j'ara dhu limuri ne èdhi tèdhi dènge musi madha èdhi. 25 Ama Lamatua moa tèke le, mi baki Abraham, peka na,
‘Bèli-camèd'a, re ana-èpu èu èci, Ja'a hia mèngi-nale mi dedha suku aa'i-aa'i ètu rai-haha ne.’e
Lii moa dhu Ama Lamatua peka le mi dhèu rèti lii padhai Na, limuri ne, j'aj'i le mi dedha miu, nuka a'ari ja'a dhèu Isra'el sèra. 26 Ama Lamatua pua Ana Na dhu Na hag'e nare èèna, ho paj'uj'u j'ara, sèna ka miu tèke eele sasala-sasigo miu. Dènge sèmi èèna, Na pad'elo d'ara hua iia Na mi miu. Lamatua pua uuru Ana Na mai asa miu, èle èèna, heka Na pua Ne asa suku leo sèra. Èèna ka dhu j'aj'i mèngi-nale mi èdhi aa'i-aa'i ti.’’