Dhèu parcaya abhu Roh Ama Lamatua
2
1-2 Lèke lod'o babe'a dhèu Yahudi, dhu ra pangare na ‘Lod'o Pantekosta’,a dhèu aa'i-aa'i dhu madhutu Lamatua Yesus pakaboko ètu d'ara èmu cue.b Cag'ag'a laa, ra tadèngi lii dhu mai nèti dedha-liru, sama sèmi bohe. Lii èèna mèdhu titu kèna, ka rèngu bisa boe tadèngi lii dhèu leo dhu ètu sèra. 3 Hèia rèngu ladhe rèdhi sèmi heo ai sa, dhu puru mi dedha rèngu èci-èci. 4 Ka rèngu aa'i-aa'i ra abhu Roh Ama Lamatua. Ka ra padhai lii, pake lii dhèu rai-rai leo, madhutu ngaa dhu Roh hia si peka-padhai. 5 Lod'o èèna, dhèu Yahudi ae titu kèna dhu mai nèti lème rai ètu rai-haha ne, pakaboko ètu Yerusalem. D'ara rèngu neo madhutu Ama Lamatua. 6 Ropa ra tadèngi rare lii èèna, ka ra mai lingu rare era èèna. Ka rèngu ca dhèu-dhèu ka, tadèngi lii dhu ana madhutu Lamatua Yesus sèra padhai, èci èèna ka dènge lii rai rèngu. Nèti èèna ka, dhèu sèra malaa-maloha. 7 Rèngu aa'i-aa'i ra hèb'a nganga-nganga sène, ka ra papeka, aku rèngu na, ‘‘Ira ii! Te dhèu se, dhèu Galilea, sina ma? 8 Tasamia ka, rèngu bisa padhai lii, tao lii èdhi aa'i-aa'i ti? 9 Èdhi se'e, mai nèti propensi Partia, Media, Elam, Mesopotamia, Yudea, Kapadokia, Pontus, Asia, 10-11 Frigia, Pamfilia, Masir, nèti Libia dhu dètu dènge kota Kirene, aa èdhi cahag'e mai nèti kota Roma. Aa cahag'e kahèi mai nèti pulu Kreta, dènge nèti rai Arab. Èdhi cahag'e dhèu Yahudi, cahag'e dhèu rai leo dhu maso agama Yahudi. Te ngaa èdhi aa'i-aa'i ti tadèngi rèngu padhai lii, pake lii èdhi aa'i-aa'i ti, lula-nèti j'ara-j'ara kapai titu kèna, dhu Ama Lamatua tao. Te aa'i-aa'i se pamalaa èdhi, nga!’’
12 Rèngu aa'i-aa'i ra hèb'a nganga-nganga sène, ka ra pakarèi isi aanga ra, aku rèngu na, ‘‘Tasamia ka j'aj'i sèmi ne'e? Sasoa na, ngaa ka ne?’’
13 Te ngaa abhu dhèu leo dhu mari si, peka na, ‘‘Weeh! Baku pusi dènge dhèu sèi! Te ra mahu nèi!’’
Petrus padhai lii ètu madha dhèu ae
14 Ètu era èèna, Petrus dènge dhèu pajuu-paleha Lamatua Yesus dhèu canguru èci leo sèra. Ka nèngu kako la'e asa madha, hèia na mulai padhai lii mi dhèu ae dhu lingu ètu èèna. Na padhai lii mèdhu bia, peka na, ‘‘Ina-ama, a'ari aa'i-aa'i ti! Miu dhèu Yahudi, dènge miu dhu mai nèti mia-mia pea ètu kota Yerusalem! Pasa dhilu paie, ho mi nanene lii padhai lii ja'a ne, te ja'a neo peka j'ara hua iia mi miu aa'i-aa'i mi. 15 Mage mi pangee, na, dhèu se mahu. Sèmi boe èèna! Mad'ae aae era, dhèu mahu boe. Ngaa hari, heka hake ceo kèna. 16 Deo na miu tadèngi, na, dhèu se padhai lii pake lii miu aa'i-aa'i mi. Dhu lèke, sèmi ne'e ka: uru èèna, Ama Lamatua moa tèke le j'ara ne'e re dhèu nèti lii padhai lii Nèngu, ngara na Yoel, peka na:
17 ‘Ama Lamatua peka na, ‘‘Ladhe lod'o rai-haha oe èle,
Ja'a neo hia Roh Ja'a mi dhèu aa'i-aa'i.
Ana ngèru miu sèra, bhèni-mone,
Ja'a ded'e si, j'aj'i dhèu rèti lii padhai Ja'a.
Ana ngèru miu sèra,
bèli-camèd'a ladhe rèdhi ngaa dhu Ja'a neo pad'elo mi rèngu.
Sèmi èèna kahèi, dhèu heka miu sèra,
bèli-camèd'a ra abhu nii, ngaa dhu Ja'a neo pad'elo hia ra rèdhi.
18 Ladhe lod'o rai-haha oe èle,
Ja'a hia Roh Ja'a mi ana pua-paleha Ja'a sèra.
Hia dhèu mone,
aa dhèu bhèni kahèi.
Sèna ka ra peka-padhai ngaa dhu Ja'a peka le dènge rèngu.
19-21 Bèli-camèd'a, d'ai Lod'o Lamatua. Masi ka Lod'o èèna dhae d'ai mèka,
te ngaa Ja'a tao uru tadha-tadha malaa ètu dedha-liru.
Tadha malaa sèmi madha lod'o j'aj'i maroga kiu-kiu,
dènge hèru mea sèmi raa sa kahèi.
Ja'a neo tao j'ara-j'ara kapai seli eele kahèi, ètu dedha-rai.
J'ara sèra sa, sama sèmi raa, ai, dènge sèb'u poka-poka ca'e la'e asa dedha.
Ladhe d'ai Lod'o Lamatua dhu kapai seli èèna, dhèu cee dhu manèngi Ama Lamatua soru-bara ne,
nèngu èèna ka dhu abhu mamuri.’’’c
Sèmi èèna ka, dhu uru èèna, Yoel suri le.
22 A'ari dhèu Isra'el aa'i-aa'i ti! Mai pasa dhilu miu, ho nanene paie ngaa dhu ja'a neo padhai lii dènge miu. Ama Lamatua paj'uj'u nare le Yesus, dhèu Nasaret. Ji'i nge'a le j'ara èèna j'aj'i tare'a, lula ji'i ka dhu ladhe ngèdhi unu mi, na, Ama Lamatua pake Yesus ho tao tadha malaa dènge tatao kapai seli eele. Miu me'a le j'ara ne'e kahèi, lula Yesus tao le tadha malaa sèra ètu talora miu. 23 Te ngaa miu pamadhe Ne, dènge j'ara miu dadugu-rariu dhèu bhelu-katub'a, ho paku Ne ètu aj'u palolo-palèbha. Aa te ngaa, sèra sa pamèci dènge naneo Ama Lamatua nèti uru ka mai.d 24 Lula tatao miu, ka Nèngu madhe tare'a. Te ngaa Ama Lamatua d'èi boe ho Yesus madhe taruu. Nèti èèna ka, Lamatua patalale eele Nèngu nèti koasa mamadhe, ka pamamuri hari Ne. Te koasa mamadhe bisa boe segi Ne.e
25 Nèti uru ka mai, dhèu aae Daud suri tèke le lula-nèti Yesus ne, peka na:
‘Ja'a ke'a, na, Lamatua sama-sama taruu dènge ja'a.
Nèti èèna ka, ngaa èci sa bisa boe pamanahu ja'a,
lula Ama Lamatua ètu baboa ja'a taruu.
26 Nèti èèna ka, d'ara ja'a karej'e,
ka ja'a koa-kio Ne taruu,
aa ja'a mate Lamatua dènge d'ara mera-milu.
27 Te Nèngu soro tèke boe samanga ja'a pea taruu ètu era dhèu madhe sèra.
Aa Ama Lamatua tèke eele boe ngi'u aae Dhèu Nèngu dhu D'ara Mola-Mèci, ele iie ètu d'ara rai.
28 Lamatua pad'elo le ja'a j'ara mamuri dhu mola.
Nèti èèna ka d'ara ja'a karej'e d'ai seli,
lula Lamatua bera-bera dènge ja'a.’f
Ne'e ne ka dhu dhèu aae Daud suri tèke nèti uru ka mai.
29 A'ari aa'i-aa'i! Miu mata ku ho ja'a lole paie ku dènge miu lula-nèti dhèu aae Daud. Na peka sèmi èèna, te ngaa na lole boe ngi'u nèngu. Èdhi te'a, lula nèngu madhe le, aa ra padhane ne. Ro'a na abhu ètu talora èdhi toke d'ai sange ne'e. 30 Dhèu aae Daud ne j'aj'i dhèu nèti lii padhai Ama Lamatua. Aa na ne'a, na, Ama Lamatua dhu moa le pake lii subha, ho limuri mai èci nèti ana-èpu Daud nèd'u paredha. Nèngu èèna ka dhu Lamatua paj'uj'u mema nèti uru ka mai.g 31 Lod'o èèna, Daud pangee madhera. Aa na peka uuru lula-nèti Dhèu dhu Lamatua paj'uj'u tèke le. Èena na Dhèu èèna madhe, te ngaa mamuri hari kahèi. Aa Daud peka kahèi, na, Dhèu èèna pea taruu boe ètu era dhèu madhe, aa ngi'u Na ele iie boe kahèi.
32 Dhèu dhu Daud peka-padhai ne, nuka Yesus! Ama Lamatua pamamuri hari Ne nèti mamadhe Na. Ka ji'i aa'i-aa'i mi ngèdhi le dènge musi madha ji'i! 33 Ka limuri ne, Ama Lamatua ded'e le Yesus, ho nèd'u paredha dhu dedha risi eele. Aa Na madhèdi ètu baboa g'ana Ama Lamatua, ètu era dhu Lamatua sadia tèke le. Aa Ama Na hia le Roh Na dhu Mola-Mèci, sama sèmi dhu Na moa tèke nèti uru ka. Aa Na moa neo hia Roh Mola-Mèci Na mi èdhi kahèi. Èèna ka dhu miu tadèngi dènge laladhe mèdhi deo na, nuka Ama Lamatua hia Roh Na. 34 Daud mesa na ca'e boe la'e asa sorga, te ngaa na suri, peka na,
‘Ama Lamatua padhai lii dènge Lamatua ja'a, peka na,
‘‘Madhèdi mi sebhe g'ana Ja'a, ètu era dhu Ja'a sadia mema,
35 toke Ja'a tao musu Èu sèra, pahaha iisi mi Èu.’’’h
36 Nèti èèna ka dhèu Isra'el aa'i-aa'i ra hud'i re'a ku tare'a-re'a, lula-nèti Yesus dhu miu paku pamadhe ètu aj'u palolo-palèbha. Nèngu, nuka Kristus dhu Ama Lamatua hag'e nare le. Aa Nèngu ne'e ka dhu j'aj'i Kètu èdhi.’’
37 Ropa tadèngi rare lii Petrus ne, d'ara dhèu sèra roe. Ka ra karèi Petrus dènge dhèu pajuu-paleha leo sèra, peka na, ‘‘A'ari! Ji'i hud'i tao tasamia ku?’’
38 Hèia Petrus dhaa, peka na, ‘‘Miu èci-èci hud'i ele-ho'a ku, aa tèke eele ku sasala-sasigo miu aa'i-aa'i mi, ho miu lèpa hari madhutu Lamatua. Hèia soro iisi mi ho sarani, sèna ka j'aj'i mi tadha, peka na, miu lèpa hari le madhutu J'ara Mamuri Yesus Kristus. Aa èèna j'aj'i tadha kahèi, peka na, Lamatua saku eele le sasala-sasigo miu. Èle èèna, miu sèmi mere Roh Ama Lamatua dhu Mola-Mèci.
39 Te Ama Lamatua moa le hia Roh Na mi dhèu aa'i-aa'i dhu j'aj'i le dhèu unu Na. Dènge j'ara ne'e, lii mamoa lula-nèti Roh Na, j'aj'i hia miu dènge ana-èpu miu kahèi. Na moa hia mi dhèu leo kahèi.’’
40 Aa Petrus padhai lii ae hari mi rèngu, aku nèngu na, ‘‘Limuri ne, dhèu ae sero le nèti j'ara mamuri dhu mola. De miu mage-mage, sèna ka miu baku madhutu tatao dhèu bhelu sèra. Te ngaa miu hud'i madhutu dhoka j'ara mola nèti Ama Lamatua di. Dènge j'ara èèna, miu abhu mamuri taa-taa dènge Ne.’’
41 Èle èèna ka, dhèu ae sèra sèmi rare lii padhai lii Petrus èèna dènge d'ara kateme. Ka ra madhutu J'ara Mamuri Yesus, hèia ra soro iisi ra sèna ka abhu sarani. Lod'o èèna, pe d'ai tèlu riho dhèu mai pa'èci dènge dhèu-dhèu unu Yesus sèra. 42 Rèngu d'èi pa'èci dènge dhèu-dhèu leo dhu madhutu Yesus. Aa rèngu mamuri mera-milu èci dènge èci. Bèli-bèli èèna, rèngu maj'èni nanene lii holo-nori nèti dhèu pajuu-paleha Lamatua Yesus. Rèngu d'èi manèngi-mangaj'i sama-sama kahèi. Aa rèngu d'èi ra'a-rinu mei èci.
J'ara-j'ara mamuri dhèu parcaya
43 Lod'o èèna, dhèu pajuu-paleha Lamatua sèra tao tadha malaa ae-ae, ka dhèu dhu ètu sèra sa malaa dènge madha'u. 44 Dhèu-dhèu dhu madhutu J'ara Mamuri Lamatua Yesus, aa'i-aa'i ra mamuri pakaboko dènge d'ara èci, ka ngaa dhu unu dhèu èci, j'aj'i unu rèngu aa'i-aa'i ra, ho ra pake sama-sama.i 45 Abhu cahag'e pahia mèdha-panyau ra, ho ra pala-bagi doi kab'ua na mi dhèu parcaya sèra, madhutu èci-èci dhu parluu. 46 Bèli-bèli èèna, rèngu pa'èci ètu d'ara Èmu Kapua Manèngi-Mangaj'i. Rèngu ra'a-rinu boko-boko mue-mue dènge d'ara karej'e-karae, nèti èmu èci asa èmu èci, dènge boe ka'uu-kamuki. Rèngu aa'i-aa'i ra mamuri èci tulu èci, dènge boe kire-kome. 47 Bèli-bèli èèna, rèngu aa'i-aa'i ra ma'ète boe koa-kio kolongara Ama Lamatua dènge d'ara kateme. Dhèu leo sèra d'èi rèngu titu kèna. Nèti ca lod'o asa ca lod'o Ama Lamatua hia mamuri mi dhèu sèra, ho ra pa'èci dènge dhèu-dhèu unu Lamatua Yesus. Ka rèngu asa ka ae.