Yohanis mete nita lalai noo raefafo mata feu' a
21
Basa naa ma, au 'ita lalai noo raefafo mata feu' a, huu lalai noo raefafo mbaraa' a mopo hendi se ena. Tasi' o nese ena boe.a 2 Boe ma au 'ita Lamatualain kota meumaren, naeni Yerusalem Feu' a 'onda mia sorga. Kota naa 'ona' lemba-d'od'e ina' fo soru sao na.b 3 Basa de au rena hara monae' esa lao' mia kad'era parenda' a nae,“Mete malolole!
Eni' lele' ia, Lamatualain Umen sia atahori ra talad'a na.
Mia fai' ia, Lamatualain nasod'a na'ab'ue noo atahori na ra.
Ana dad'i sira Lamatualain na.
Ma ara dad'i Eni ana na ra boe.
Dei fo Ana noo se nakandoo 'a,
ma Ana na'ab'ue noo se losa doo ndu'u-d'oo na.c
4 Dei fo Ana seka namad'a' luu-oe na ra,
fo ara nda nggae ei-ei sa ena.
Huu sia naa esa nda namahed'i sa ena.
Ma sia naa o esa nda mate sa ena boe.
Basa saa mana tao sususa-sosona' mia fe'esa'an na, nese ena.
Basa saa mana tao doid'oso' mia fe'esa'an na, mopo ena.”d
5 Boe ma mana 'endo' sia kad'era parenda' a 'ola' nae, “Mete malolole, te Au tao basa' e dad'i feu'.” Basa ma Ana 'ola' fai noo au nae, “Sura' leo! Basa atahori bisa ramahere hara-lii ngga ia, huu basa ia ra, mema' teb'e!”
6 Boe ma Ana nafad'e selu' au fai nae,
“Basa saa fo Au helu-fuli mia ma'ahulun, dad'i ena.
Te Au ia,
Ma'ahulu' losa Ma'ab'uit.
Ma Au ia,
A losa Z,
Basa' e lao' mia Au,
eni' a mia fefeun losa doo ndu'u-d'oo na.
Basa atahori mana ma'amad'a' ra,
dei fo Au fee se rinu mud'a',
mia oe mata' mana nendi masod'a' fo ara rasod'a noo matetu'.e
7 Basa atahori mana ra'atataa' tungga Lamatualain dala masod'a ndoo-tetun,
dei fo ara simbo rala basa papala-b'ab'anggi' ia ra.
Dei fo Au dad'i sira Lamatualain na,
ma ara dad'i ana ngga ra.f
8 Te hambu atahori nenenggari hendi' boe,
risi' tasi ai baleran rala neu, mana mbila nda naloe' sa.
Atahori mana ramatau doid'oso tungga Lamatualain,
atahori mana nasad'ea Yesus,
atahori manggenggeo',
atahori mana hohongge',
mana nisa atahori,
mana songgo-tanggu',
mana suanggi',
noo mana peko-leleko'.
Dei fo basa se nenembia-hendi' risi' tasi ai baleran,
fo atahori roe rae, ‘mamana mamates karuan a.’”
Yohanis mete nita Yerusalem mata feu' a
9 Boe ma au 'ita esa mia ate kahitu' ra mia sorga fo ma'ahulun mana to'u bokor nene'oni' Lamatualain nasa na. Ana nema nandaa noo au, ma 'ola' nae, “'Uma ia dei! Te au 'ae 'utud'u nggo lemba-d'od'e ina' mana nae sao noo Lombo Ana' a.”
10 Boe ma Lamatualain Dula-d'alen dai au, de ate esa mia sorga so'u au 'isi' lete' esa ata, nanarun seli. Sia naa, ana natud'u au kota Yerusalem, naeni Lamatualain kota meumare na. Kota naa 'onda mia Lamatualain sia sorga.g 11 Kota naa meulaun seli! Hambu ronda' na'atutute' mia Lamatualain mandete-masa'an, 'ona' fatu poemata makahahad'ok e. Losa basa kota a dad'i manggarelo'. 12 Hambu lutu nened'ama naru monae' rereo' kota naa, noo lelesu ine' sanahulu rua. Ate sanahulu rua mia sorga ranea lelesu ra. Sia lelesu kasanahulu rua' naa ra nenesura' leo Isra'el kasanahulu rua' ra nara na ra.h 13 Lelesu ine' telu mbali rulu, telu mbali muri, telu mbali dii ma telu mbali 'ona.i 14 Lutu nened'ama' a nambarii' sia fatu netehuu monae' sanahulu rua. Sia fatu netehuu' ra nenesura' nara-nara' mia Lombo Ana' a ded'enu kasanahulu rua na ra, mana tao mata' neu E sia raefafo'.
15 Basa naa ma, ate mana 'ola' noo au a, to'u tetea uuku' esa mia lilo, fo nae uku kota a noo lelesu ine na ra noo tembok na.j 16 Ana uku na'ahulu' kota a lutu nened'ama fala haa na. Nanarun, loloan, ma nanarun ata neu 'ona esa', naeni kilo rifon rua natun rua rua nulu (2.220).k 17 Basa de ana uku lutu nened'ama' a fafaun, meter nee nulu lima, tungga atahori uuku na.l 18 Lutu nened'ama' a, ara tao mia fatu manggad'ila' naran Yaspis. Basa mana sia kota naa, ara tao mia lilo isi' meun 'ona' kaca e.
19 Fatu netehuu' kasanahulu rua' ra, ara tao mia fatu mafelit mata'-mata'. Kaesan, pake fatu yaspis naronda dula mod'o'. Karuan, fatu nilam naronda dula nggeo-manggarelo'. Katelun, fatu mirah naronda dula mbilas. kahaan fatu samrud naronda dula mod'o'. 20 Kaliman, pake fatu 'unam mamafafau' dula coklat noo muti'. Kaneen, pake fatu sardius dula mbilas. Kahitun, pake fatu ratna cempaka, dula huni lilo'. Kafalun, pake fatu beril, dula nggeo-manggarelo mod'o'. Kasion, pake fatu krisolit, dula huni-huni'. Kasanahulun, pake fatu krisopras, dula mod'o-ma'anure'. Kasanahulu esan, pake fatu lasuardi dula mod'o tasi oe'. Ma kasanahulu ruan, pake fatu ndondoa' dula mbilas-maranggeo'. 21 Ma lelesu ine kasanahulu rua' ra, tao mia mutiara deke' sanahulu rua. Lelesu esa, na, tao mia mutiara deke' esa. Ma nusa' naa okofoon, ara tao mia lilo isi makahahad'ok 'ona' kaca.m
22 Te au 'ita ume hule-o'e' nese kota naa. Huu Lamatualain mana koasa noo Lombo Ana' sia naa rakandoo 'a. Naa de atahori reu be'utee mbali Se. 23 Nusa' naa nda parluu relo ma fulan fo raronda neu e sa. Huu Lamatualain rondan mana tao manggarelo' sia naa. Ma Lombo Ana' dad'i 'ona' lambu manambila' ena.n 24 Atahori mia basa bangsa sia raefafo' dei fo rema lao' sia manggarelo' naa. Mane-mane' sia raefafo' o dei fo rendi hata-heto manaseli na ra risi' naa reu.o 25 Sia naa nda hambu tetemba' sa, naa de ara nda parluu 'ena lelesu mana maso' kota neu sa. 26 Dei fo ara o rendi basa malole' noo basa had'at mia basa nusa' sia raefafo' nisi' kota naa.p 27 Te basa de'ulaka', 'ona' mana songgo-tanggu', mana hohongge', ma mana peko-leleko' ra nda bole maso' sa. Mana bole maso', naeni 'aka' atahori fo nara na ra nenesura' sia Lombo Ana' susuran, mana sura' atahori, fo mana rasod'a rakandoo roo Lamatualain, nara na ra.q