Loe fo oen mana nendi masod'a' noo hau huu' mana nendi masod'a'
22
Basa naa ma, ate mia sorga naa natud'u au loe esa, fo oe na nendi masod'a'. Oe a meun 'ona' kaca. Ana bub'u mia Lamatualain noo Lombo Ana' a kad'era parenda na.a 2 Boe ma ana nandali nisi' okofoo monae' sia kota naa talad'a na. Sia loe a bob'oan be'e seri', hambu hau huu' mana nendi masod'a'. Hau huu' naa too esa na, nab'oa lao sanahulu rua; fula esa na lao esa. Roon bisa dad'i mod'o fo tao nahai' atahori sia raefafo'.b 3 Te basa saa fo Lamatualain parnaa timba hendi ma ndondoon, ara nese kota naa ena. Hela 'aka' a Lamatualain noo Lombo Ana' mana 'endo' parenda sia kad'era parenda na ra, roo atahori ded'enu na ra mana be'utee neu Se.c4 Basa se bisa rita Lamatualain mata na. Boe ma Lamatualain naran nenesura' sia ree na ra. 5 Sia naa, tetemba' nese. De Lamatualain atahori na ra nda parluu relo do lambu sa, huu Lamatualain mesa' ne mana tao manggarelo kota naa. Dei fo ara to'u parenda sia naa losa doo ndu'u-d'oo na.d
Lamatua' Yesus nate'e helu-fuli na
6 Basa naa ma ate a nafad'e au nae, “Basa saa fo au 'ufad'e neu nggo ia, mema' teb'e. Basa atahori ramahere 'o'ola ngga naa. Ma'ahulun, Lamatualain nafad'e Hara-liin neu mana 'ola-'ola na ra nendi' Dula-d'ale na. Te 'ale' ia, Ana pake Ate na ra mia sorga fo rafad'e ana na ra so'al basa dala' ia ra, fo nda doo' sa te, musi dad'i.”
7 Basa naa ma, Yesus 'ola' nae, “Misined'a, e! Nda doo' sa fai, te Au 'uma ena. Sia susura ia basa' e nenesura' ena, so'al saa fo mana nae dad'i' a. Basa atahori mana tungga susura ia hara-lii na ra, ara 'onton seli.”
8 Mana sura' susura ia, naeni au, Yohanis. Au ia, mana rena ma 'ita basa dala' ia ra. Au rena basa ma, sende' lulu-langga ngga be'utee sia ate mia sorga a ei na. Te Ana mana natud'u basa ia ra reu au. 9 Te ana 'ai au nae, “Wee! 'Afi' tao ta'o naa! Musi be'utee neu 'a Lamatualain. 'Afi' be'utee neu au. Au ia Lamatua' atahori ded'enun 'ona' nggo boe, ma toronoo ma ra mana dad'i mana 'ola-'olan, ma basa atahori mana tao tungga saa fo nenesura' sia susura ia.
10 'Afi' mu'ufuni' susura ia isin mia atahori fea' ra. Te nda doo' sa fai, te basa mana nenesura' sia susura ia, dad'i.
11 Basa atahori mana ranggenggeo, na,
hela se fo ara tao ranggenggeo rakandoo 'a.
Ma basa mana rasod'a noo meumare',
ara musi rasod'a noo meumare' rakandoo 'a.
Basa atahori mana tao de'ulaka' ra,
hela fo ara tao de'ulaka' rakandoo 'a.
Te basa mana tao malole' ra,
ara musi tao malole' rakandoo 'a.”e
12 Basa naa ma, Yesus 'ola' selu' fai nae, “Musuned'a malolole! Nda doo' sa fai, te Au 'uma ena. Dei fo Au bala-b'ae basa atahori, tungga tatao-nono'i na ra.f
13 Au ia,
Ma'ahulu' losa Ma'ab'uit.
Au ia,
A losa Z.
Basa' e lao' mia Au e,
eni' a mia fefeun losa bab'asa na.g
14 Atahori mana safe ramemeu bua-b'a'u na ra, 'onton.
Huu dei fo ara hambu hak rala reu tungga kota naa lelesu ine na.
Atahori-atahori mana masod'a meumare' ra, 'onton.
Huu dei fo ara hambu 'isin raa boa' mana tao atahori rasod'a rakandoo 'a.h
15 Te atahori fea' ra, nda bole risi' naa sa.
Nda Lamatualain atahorin sa, nda bole leo sia naa sa.
Naeni, atahori nda mana ramahere Lamatualain sa,i
mana hohongge, mana songgo-tanggu,
mana nisa atahori, mana suanggi',
ma mana pepeko-leleko'.
Basa se, nda bole maso' sa.
Basa se, hela se sia 'a dea'.
16 Au ia, Yesus. Au mana haitua ate ngga mia sorga fo nakambembela basa ia ra, fo hei mii mifad'e hehelu-fufuli ngga ia neu jama'at kahitu' naa ra.
Au ia, mane Daud tititi-nonosi na.
Au ia, mane mana to'u parenda'.
Au ronda ngga manggarelon seli,
'Ona' Nduu Fefetu'.
Au ronda ngga maheren seli,
'Ona' Nduu Fefetu Ana'.”j
17 Lamatualain Dula-d'alen no'e nae, “'Uma ia leo!”
Ina nenelemba-d'od'e' o no'e nae, “'Uma leo!”
Naa fo basa mana rena' ra tungga rae, “'Uma leo!”
Hela fo basa mana ma'amad'a' ra, rema rinu leo!
Hela fo basa mana rae rinu oe mana nendi masod'a' a,
rema ha'i leo!
Atahori bole ha'i oe naa
noo mud'a' a.
Atahori bole rinu oe naa
nda pake bae sa.k
Yohanis hehelu-fufuli matete'en
18 Au, Yohanis, fee nesenened'a' neu basa atahori mana dei fo rena saa fo Lamatualain nakambembela mema' fee au sia susura ia, ta'o ia: mete ma hambu atahori nae tao nalena' saa sia susura ia rala, na, dei fo Lamatualain hukun tamba e noo calaka hitu mana nenembori raefafo' nema' naa. 19 Mete ma hambu atahori ra'akukura' saa-saa sia susura ia, dei fo Lamatualain lea hendi hak na fo ana 'afi' nisi' kota meumare' rala neu, ma 'afi' naa boa' mana tao fee atahori rasod'a rakandoo 'a.l
20 Yesus mesa' ne mana nakambembela fee basa ia ra. Ana helu-fuli nae, “Naa teb'e! Nda doo' sa fai, te Au 'uma ena.”
De Lamatua' Yesus, 'uma leo!
21 Au 'o'e fo Lamatua' Yesus natud'u rala malolen neu basa atahori na ra. Amin!
Mia au,
Yohanis