Lamatualain aten pa'a mengge-b'uta noo rante besi losa too rifon esa
20
Basa ma, au 'ita ate esa mia sorga 'onda mia lalai nema. Ana to'u rante monae' esa, ma ndola doid'oso nda ma'iko' a sa, nggoe na. 2 Ana neu humu mengge-b'uta, naeni nitu ra malangga na, fo ara ro'e rae, ‘Iblis’. Ana 'e'ed'ik atahori eni' a doo na. De ate a futu mengge-b'uta nendi' rante, fo 'ena e neu ndola' rala losa too rifon esa.a 3 Boe ma ate a ndundu' hendi mengge-b'uta a nisi' ndola doid'oso' a rala. De ana nggoe nisa ndola' a lelesun, fo 'ena mengge a neu naa, losa too rifon esa. Noo ta'o naa, mengge a nda peko-leleko' nusa-nusa' sia raefafo' losa too rifon esa sa. Basa fo, fe'e mbo'i e ena, te losa 'a.4 Boe ma au o 'ita kad'era parenda' hetar, ma hambu atahori ra 'endo' sia ata. Lamatualain so'u se fo ra'etu' ded'eat. Sira ia, ma'ahulun reu dui-b'engga so'al Yesus Hara-lii Malolen ma Lamatualain Dud'ui-'o'olan, losa atahori risa se. Sira ia, nda songgo banda de'ulaka' noo paton na sa. Ara o nda nau simbo banda naa cap na sia ree na ra noo lima na ra sa boe. Ara risa se, te Lamatualain tao nasod'a bali' se, fo ara to'u parenda' roo Kristus losa too rifon esa.b 5-6 Noo ta'o naa ara dad'i Lamatualain atahori fefeun fo mana rasod'a bali' mia mamates. De sira ia, 'onton seli, huu ara dad'i Lamatualain atahori na. Sira nda nenenggari' risi' mamana doid'oso' sa, de nda ramed'a rita mamates karuan sa. Te ara dad'i 'ona' malangga agama mana mete-se'u Lamatualain noo Kristus. Ma ara o to'u parenda' ra'ab'ue roo Kristus losa too rifon esa boe.
Te atahori mates laen ra, musi rahani losa too rifon esa, dei fo Lamatualain tao nasod'a bali' se.
Ara nggari nitu ra malanggan nisi' tasi ai rala neu
7 Lele' too rifon esa naa basa, dei fo Lamatualain denu mbo'i mengge-b'uta naa mia ndola doid'oso nda ma'iko' a sa. 8 Boe ma ana neu peko-leleko' nusa-nusa' mia sud'i 'a bee sia raefafo'. Nusa' naa ra, nara na ra Gog noo Magog. Matete'en ana na'ab'ue nala atahori na ra fo reu ratati. Ded'esi na ra 'ona' sara'ae' sia tasi suu na.c 9 Basa de, sold'ad'u Gog noo Magog, nonggo-nonggo rema mia basa raefafo' suu-suun, de reu heo ndule Lamatua' kota susuen, noo atahori na ra. Te Lamatualain na'onda' ai mia lalai fo lalangge basa sold'ad'u naa ra. 10 Boe ma Lamatualain atahori na ra to'u rala nitu ra malanggan mana peko-leleko' atahori nae', naeni Iblis. De ara mbia hendi e nisi' tasi ai baleran, mana mbila nda naloe' sa. Dei fo ana nenerongga' sia naa na'ab'ue noo banda de'ulaka' nenetati' a, ma mana 'ola-'olan mana pepeko-leleko' a. Sia naa, ara ue-hemba noo tao doid'oso se hatu'-rerelon nakandoo, losa doo ndu'u-d'oon neu.
Lamatualain na'etu' basa atahori ded'ea na
11 Basa naa ma, au 'ita kad'era parenda muti monae' esa. Ma Lamatualain 'endo' sia ata. 'Aib'oi' ma, raefafo' noo lalai rela mopo reu' ena, huu nda ra'atataa' Lamatualain koasan noo mandela-masa'a na sa.
12 Boe ma au 'ita atahori mana mate' ra. Basa se anak-moko rambarii' mbali kad'era parenda' a. Boe ma ate mia sorga ra rema rakambembela susura mana sura' atahori tatao-nono'i na ra. Basa ma ara rakambembela susura esa fai, naeni susura mana sura' nara-nara' fo mana rasod'a roo Lamatualain losa doo ndu'u-d'oo na. Basa de Lamatualain na'etu' atahori mates ra ded'ea na, tungga tatao-nono'i na ra 'ona' nenesura' sia susura naa ra rala.d 13 Boe ma basa atahori mates ra rema rambarii' mbali kad'era parenda' a. Sira, atahori mana mate sia mad'a' ata ma tasi' rala. Lamatualain na'etu' esa-esa' ded'ean, tungga tatao-nono'i na ra. 14 Basa naa de, Lamatualain mbia hendi Mamates nisi' tasi ai mana mbila nda naloe' sa. Ana o mbia hendi Mamana Atahori Mates a boe, nisi' tasi ai rala neu. Tasi ai naa, naeni mamana mamates karuan a. 15 Atahori bee naran nda nenesura' sia susura naa rala sa, na, ara o nenembia' tasi ai rala reu boe. Huu susura naa sura' atahori, mana masod'a rakandoo roo Lamatualain, nara na ra.