Au sura' susura ia fee neu basa atahori fo Ama' Lamatualain pili nala' ra, ma sue-lai' ra, ma Yesus Kristus nanea se nakandoo losa Ana bali' nema.^a 2 Au 'o'e fo Lamatualain natud'u rala kasian, ma fee susuen nae-nae neu nggi, fo ama misod'a noo mole-d'ame.

3 Toronoo susue ngga ra, e! Dalahulun, au 'ae sura' fee nggi, basa' e so'al Lamatualain fee masoi-masod'a' neu nggita. Te 'ale' ia hambu ded'e'at, de nda bole sa o, au sura' laen. Lamatualain fee dala masod'a ndoo-tetu' a nema nggita ena. Ana fee dala masod'a' a lao esa' a, ma Ana nda 'ub'a-'ub'a e sa. Ana fee dala masod'a' neu atahori mamahere' ra. De au 'o'e fo ama mi'itataa' ma mimbirii' mihere' fo atahori 'afi' sob'a-sob'a 'ub'a dala masod'a' mana mia Lamatualain naa.

4 Tao-tao te, hambu atahori hira maso' ra'afuni' sia talad'a ma ra ena. Ara nda tungga Lamatualain dala masod'a ndoo-tetun sa, te tungga 'a sira hihii-nanau na ra. Ara rae Lamatualain rala malolen mana soi dala' fo sira sud'i 'a tao leli ta'o naa. Naa 'ombo-koson ena! Sira, atahori mana 'ola' laen, te tao laen! Ara nau fo ata 'afi' rena neu hita Manen ma hita Malanggan Yesus Kristus. Misined'a e, te nenesura' sia Susura Meumare' a 'oi, Lamatualain na'etu' mema' huku-d'oki na ra eni' a dalahulun ena.

5 Hei bub'ulu' dala' hetar ena, te au fee nesenened'a' selu' neu nggi, fo ama musi besa-b'esa.

8 Mae 'ona' naa o, atahori mana sia talad'a ma ra rasod'a tao leli rakandoo 'a. Tao-tao te, ara pake meit na ra dad'i netehuu' fo tao ranggenggeo ao na ra, ma balab'an leli roo atahori mana to'u koasa, ma ra'amuti-ra'amuu koasa malole' mana sia sorga. 9 Te Mikael nda tao tungga se sa. Eni, Lamatualain ate na ra sia sorga, malangga na. Lele' Musa fe'e mate hendi, ma Mikael nareresi noo nitu ra malanggan so'al Musa ao-sisi na. Te Mikael nda fee sala' do na'amuti e sa. 'Aka' ana nafad'e nae, “Dei fo Lamatualain ator nggo, fo tafu nggo.”^d

10 Te atahori ia ra nda ta'o naa sa. Ara ra'amuti ma raneneut basa dala' fo nda rahine' ra sa. Ara tungga 'a sira hihii-nanau mana tao leli na ra, 'ona' banda ra. Huu naa, ara tao ralutu ao na ra.

11 Besa-b'esa! Dei fo ara simbo hahambu na ra. Huu ara tao tungga 'ona' Kaen, mana nisa 'od'i na. Ara hii 'a tao tungga 'ona' Balaam, mana nae tao sud'i 'a saa, sad'i hambu doi'. Ara o tao tungga Kora, mana nambalutu huu ana balab'an noo Lamatualain. Huu tatao de'ulaka' na ra naa ra, de, dei fo atahori ia ra saranggaa mia Lamatualain.^e

12 Mete ma atahori ia ra ra'ab'ue roo nggi fo rasaned'a Lamatualain susuen lele' hei mia-minu mi'ib'ue moo se, ara nda med'a mae roo sira bab'are-na'o na ra sa. Dad'i hei musi besa-b'esa, o. Huu ara 'ona' fatu mbia' sia tasi mana bisa tao nalutu 'ofa'. Ara 'ona' atahori fo ue-tatao na ra mete-se'u atahori laen, te ara mete-se'u 'a ao na ra.^f Ara 'ona' lelee nggeo' nda mahuu' sa de nda 'ud'a mbei sa boe. Ara 'ola' nae' 'a, te nda tao saa malole' sa boe. Ara 'ona' hau huu' mana nda na'ena ngguna saa sa boe. Mete ma fai nab'oa' na, nda nab'oa boa' esa sa boe; naa te nenelea hendi' losa 'okan ena. 13 Ara tao relo-relo dala-d'ala' mana nendi mamaet, de tao nanggenggeo nggita. Ara 'ona' ree monae' po'a hela fure manggenggeo' sia retaan a. Ara o 'ona' nduu' mana lali'-lali' sia lalai, mana nenehuku-d'oki' de Lamatualain tao se sia mamana ma'ahatu kib'u-kib'u', de mopo se sia naa.

14 Henok naa, tititi-nonosi kahitun, reken mia Adam. Ana nafad'e mema' so'al atahori mata' ia ra. Ana nae,

16 Atahori ia ra rala' a unggu-remu rakandoo 'a. Ara 'aka' fua sala' rakandoo 'a neu atahori. Nda taoafi' neu Lamatualain hihii-nanaun sa, te tungga 'a sira hihii-nanau na ra. Ara 'aka' 'ola' rananaru ao na ra. Ara hii 'a sangga rala' roo atahori, fo hambu bala-b'ae' tungga sira hihii-nanau na ra.

17-18 Toronoo susue ngga ra, e! 'Afi' lilii' helu-fuli' fo hita Malanggan Yesus Kristus ded'enu na ra rafad'e mema' neu nggi rae, mete ma raefafo' nae nate'e, mana ma'ae'ei' ra dea rema. Ara hii 'a ra'amuti Lamatualain hihii-nanaun, fo tungga-tungga 'a hihii-nanau mana sora-senggo na ra.^h 19 'Ale' ia atahori naa ra sia ena. Ara mana dunggu-mbau fo tao nggi saranggaa. Ara rasod'a tungga 'a atahori hihii-nanaun, huu Lamatualain Dula-d'ale Meumaren nda sia rala na ra sa.

20 Te toronoo susue' ra, e! Hei musi mifefela masod'a ma ra neu nemehere meumare ma ra huu na. Ma mete ma hei hule-o'e, na, tungga saa fo Dula-d'ale Meumare' a natud'u neu nggi. 21 Misined'a, Lamatualain sue naseli' nggi. De minea ao ma ra ma misined'a susue na. Ma musi mi'itataa' mihani hita Malanggan Yesus Kristus, natud'u rala susuen neu nggi, ma fee nggi misod'a mikindoo moo Lamatualain.

22 Hei musi mitud'u rala susue ma ra neu atahori fo rala na ra mana banggi-b'anggi'. 23 Hei musi tulu-fali basa atahori mana parluu hambu masoi-masod'a', 'ona' hei lea hendi atahori mia ai rala. Hambu atahori laen fai, hei musi mitud'u rala susue ma ra neu se. 'Aka' besa-b'esa, o! Mae hei sue se o, hei musi melumud'u manggenggeo na ra, 'ona' atahori melumud'u bad'u manggengeo'.ⁱ