Manasod'a bub'ue monae' esa sod'a sia sorga
19
Ate naa 'ola' basa, ma au rena hara makandesi' 'ona' manasod'a bub'ue monae' esa sod'a sia surga. Ara sod'a rae,“Haleloya! Haleloya!
Ata koa-kio hita Lamatualain na,
huu Eni manaseli'.
Haleloya! Haleloya!
Ata koa-kio hita Lamatualain na,
huu Eni koasan manaseli'.
Lamatualain mana fee nggita masoi-masod'a',
mia sala ta ra,
Lamatualain mana tao natetu nggita,
mia dala sala-singgo ta ra.
2 Ata koa-kio Lamatualain,
huu eni mana na'etu' ded'eat noo matetu'.
Ata koa-kio Lamatualain,
huu eni mana na'onda' huku-d'oki' tungga dala na.
Lamatualain na'etu' huku-d'oki' fee ina dala' a,
huu ana 'aka' kokoe atahori sia raefafo',
fo tungga hohongge roo e,
ma tungga de'ulaka na.
Lamatualain bala-b'ae ina de'ulaka' naa,
huu ana 'aka' tao nisa
Lamatua' atahori ded'enu na ra.”a
3 Basa naa ma, ara sod'a sosod'at laen sia sorga rae,
“Haleloya! Koa-kio Lamatualain!
Haleloya! Minanaru Lamatualain naran!
Huu masu' mia ai mana naa ina' a ao-sisin,
hene nakandoo nda naloe' sa.
Noo masu' mia ai mana naa kota manaseli' naa,
hene nakandoo nda basa-b'asa sa.”b
4 Basa naa ma, malangga karua nulu haa' ra roo banda kahaa manaseli' ra, sende' lulu-langga na ra mbali Lamatualain kad'era parenda na. Ara fee had'a-hormat neu E rae,
“Teb'e! 'Ima fo ata koa-kio Lamatualain!
Haleloya! 'Ima fo ata tananaru naran!”
Lombo Ana' a fefeta kab'in na
5 Basa ma, au rena hara' esa fai nema mia kad'era parenda' nae,
“Wei, Lamatualain atahori ded'enu na ra!
Wei, Lamatualain ana na ra!
'Ima fo ata so'u tananaru Lamatualain nara na.
Basa anak-moko, 'ima koa-kio E.”c
6 Au rena 'ona' atahori hetar 'ola-'ola'. Hara na ra monae' 'ona' oe mandali', ma 'ona' ndelas nakaruruluk natute-nanato. Ara 'ola' rae,
“Haleloya! Hai koa-kio Lamatualain.
Haleloya! Hai so'u minanaru na ra na.
Huu Eni mana koasa manaseli'.
Ma Eni mana parenda basa' e.d
7 Ia naa, hai rala ma ra ramaho'o ena.
Ia naa, hai rala ma ra buna-b'una.
Hai koa-kio E,
huu Lombo Ana' fai kakab'in na losa ena.
Hai so'u minanaru naran,
huu Lombo Ana' a lemba-d'od'en nenesad'ia' ena.
8 Lamatualain fee ne bua lemba-d'od'e' mia teme banggana'us.
Lamatualain fee ne bua muti makahahad'ok.”
(Bua muti makahahad'ok naa, naeni Lamatualain atahori na ra tatao malole na ra.)
9 Boe ma ate mia sorga naa nafad'e au nae, “Yohanis! Ho musi sura' ta'o ia:
‘Basa atahori mana hambu nerolot rema risi' Lombo Ana' fefeta kab'in na, dei fo ara 'onton teb'e-teb'e'!’”
Basa ma, ate naa tute 'o'olan nae, “Lamatualain Ded'ea-'o'olan ia, mema' teb'e!”e
10 Boe ma au be'utee sende' lulu-langga ngga neu ate a. Te ana 'ai au 'oi, “'Afi' be'utee neu au ta'o naa! Au ia Lamatua' atahori ded'enun 'ona' nggo, moo toronoo ma ra mana dui-b'engga atahori so'al Yesus boe. Mana 'ola-'ola' mana dui-b'engga Lamatualain hara-liin, basa se dud'u neu Yesus, naa fo atahori be'utee neu E. Te Lamatualain dula-dalen hihiin 'ona' naa. Dad'i 'afi' be'utee neu au, te be'utee neu 'a Lamatualain!”
Lamatua' Yesus nema sae ndara muti
11 Basa naa ma, au boti' mata ngga, ma 'ita sorga nenesoi'. 'Aib'oi' ma, 'ita ndara muti' esa dea nema. Atahori mana 'endo' sia ndara naa, naran, “Atahori mana To'u Hehelu-fufulin” ma “Atahori Ndoos”. Lele' Ana na'etu' ded'eat, Ana na'etu' noo matetu'. Mete ma neu natati, Ana neu tungga Lamatualain hihii-nanau na.f 12 Matan naronda 'ona' ai. Ana pake solo mane' hetar sia langga na. Naran nenesura' sia aon, te mesa' ne nahine nara' naa ra sosoa na.g 13 Bua-b'a'un, neneb'oro' sia raa'. Atahori roe E rae, “Lamatualain Ded'ea-'o'olan”. 14 Au o 'ita sold'ad'u ra mia sorga sae ndara muti' de tungga E boe. Basa se pake bua-b'a'u banggana'us fo muti meulau'. 15 Hambu fela tafa tande' esa kalua mia atahori naa bafa na. Ana pake fela tafa' naa, fo neu natati lab'an basa nusa' sia raefafo'. Mate'en Ana nasenggi' se. Boe ma Ana dad'i mane na ra. Ana parenda se noo deres, de ara med'a Lamatualain mana koasa seli' a nasan boe. Naa 'ona' atahori tatab'u ralutu anggor boa' fo 'e'ee rala oe na.h
16 Sia Atahori naa bua-b'a'un ma sakan, nenesura' ta'o ia:
Mane' mia basa mane' ra.
Malangga mia basa malangga ra.
Lamatua' Yesus nasenggi' banda de'ulaka' noo sold'ad'u na ra
17 Basa ma, au 'ita ate esa mia sorga nambarii' sia relo a ata. Ana nggasi neu basa mbui mana raa sisi mburu' mana matambele' seku sia lalai ata nae, “'Ima mi'ib'ub'ue sia ia leo, fo mia Lamatualain fefeta monaen! 18 Hei bisa mia basa atahori mates ra ao-sisin; naeni mane-mane', malangga-malangga sold'ad'u, ma sold'ad'u ra. Hei o bisa mia basa ndara noo sold'ad'u mana sae ndara ra sisin boe. Hei bisa mia ate do atahori mana leo-ao' do, atahori anak-moko ao-sisi na ra. 'E'ekun, 'ima mia basa naa ra, sisi na ra!”i
19 Basa naa ma, au 'ita banda de'ulaka' fo ma'ahulun mana kalua mia tasi' a. Ana neu ma'ira' noo basa mane' sia raefafo' roo basa sold'ad'u na ra. De reu ratati lab'an atahori mana 'endo' sia ndara muti' a ata, ma basa sold'ad'u na ra mia sorga. 20 Te Atahori mana 'endo' sia ndara muti' a ata, humu nala banda de'ulaka nenetati' a noo banda mana pepeko-leleko' a. Mana 'ola-'olan naa naeni ma'ahulun mana tao manad'ad'i manaseli' mata'-mata' fo 'ed'i' nala atahori mana simbo banda de'ulaka' a cap na ma songgo paton a. Te ia naa, Atahori mana 'endo' sia ndara muti' a, mbia hendi banda de'ulaka' a noo mana 'ola-'olan risi' tasi' ai baleran mana mbila' nda naloe' a sa.j 21 Basa ma Atahori mana 'endo' sia ndara muti' a, neu tati nisa sold'ad'u laen ra, nendi' fela tafa' mana kalua mia bafa na. Boe ma, mbui mana raa sisi mburu' ra rema raa rab'asa' ao-sisi na ra.