Lamatualain aten dui kota Bab'el tutud'an
18
Basa naa ma, au 'ita Lamatualain aten esa fai 'onda mia sorga. Ana na'ena koasa ma ronda manaseli', de tao manggarelo' neu basa raefafo' a. 2 Ana nafad'e noo hara monae' nae,“Na'aloli ena! Na'aloli ena! Kota Bab'el na'aloli ena!
Tud'a ena! Tud'a ena! Kota manaseli' naa, tud'a ena!
Ana dad'i nitu ra mamana leleon ena.
Ana dad'i basa nitu-mula ra rae leleo na.
Ana dad'i basa mbui mana naa sisi mburu' ra mamana ne'eb'ue na.
Ana dad'i basa banda de'ulaka' ra lalaet na.a
3 Ana na'aloli ena, huu basa nusa' sia raefafo',
'aka' rema rinu mafu eni anggor na.
Ana tud'a ena, huu basa leo mana sia raefafo',
'aka' rema hohongge roo kota naa atahori na ra.
Mane-mane' mia basa negara,
rema hohongge sia naa.
Mana danggan mia basa kota ra,
rema raseo' losa ramasu'i.
Huu kota naa 'ona' ina' mana hii 'a hasa sud'i 'a saa mafelit ra.
Huu kota naa o 'ona' mana hohongge' hii 'a sangga basa malad'a-malad'a ra boe.”b
4 Basa ma, au rena hara' esa fai nameli mia lalai nae,
“Woi! Basa atahori ngga ra, e!
Mela dea 'ima leo!
Lao hela nusa' naa leo!
'Afi' tao tungga atahori nusa' naa de'ulaka na ra,
fo 'afi' dai huhuku-d'od'oki na ra.c
5 Huu de'ulaka na ra
naen seli ena,
Ma sala na ra
tana'-tana' losa lalai ena.
Ia naa Lamatualain nda lilii'
dala de'ulaka na ra sa.
Ia naa Lamatualain nahehere
nae huku-d'oki se ena.d
6 De hei musi bala-b'ae de'ulaka na ra,
'Ona' ara tao de'ulaka' neu atahori fea' ra boe.
'Aka' hei musi bala-b'ae de'ulaka na ra,
lao rua.
Ma'ahulun ara 'e'ed'ik atahori,
fo rinu mia sira sanggi lilo nara, manasofe' noo anggor doid'oso'.
Te ia naa sira musi rinu
anggor doid'oso' naa, lao rua.e
7 Ara tao ao na ra manaseli'.
Ma rananaru ao na ra.
Ara nau 'a rasod'a meulau-meulau'.
Ara hii 'a malad'a-malad'a'.
Huu naa, ara musi hambu sususa' naen seli.
Dad'i ara musi rasod'a doid'oso.
Huu fe'esa'an ara 'ola' koao 'ona' mana hohongge' rae,
‘Au ia, ina mane'!
Au nda dad'i ina falu sa!
Au nda nggae ei-ei sa.
Ma au o nda pake bua sususa' sa boe.’
8 Ara 'ola' ta'o naa losa Lamatualain namanasa se.
Losa Lamatualain nae hukun se.
Dei fo sia 'a fai' esa rala,
ramed'a ndoe rala seli,
ara nggae ei-ei,
ma ara o mate boe.
Losa atahori nggari hendi se ai rala reu.
Losa ai nakad'e' hendi ao-sisi na ra.
Lamatualain manato'u koasa manaseli' a, mana na'onda' huhuku-d'od'oki' ia.
Ma Lamatua' manaseli' a, mana na'etu' ded'eat ia.f
9 Mane-mane' fo ma'ahulun rema
hohongge roo kota a atahori na ra,
ma rasod'a meulau-meulau' sia naa,
dei fo rita masu' a hene mia ai naa,
dei fo ara bub'ulu' nusa' naa nenehotu' ena.
Dei de ara nggae ei-ei neu e.
10 Ma ramatau rita atahori naa ra doid'oso na ra.
Te ara mbarani rambarii' sia 'a doo-d'oo'.
Ma ara mbarani mete mia 'a naa.
Boe ma ara 'ola' rae,
‘Ad'oo! Kasian Bab'el, o!
Ad'oo! kasian kota manaseli' a, o!
Huu sia 'a jam esa rala, ho hambu huhuku-d'od'oki' ena.
Huu losa 'a, te mumbulutu ena.’g
11 Rena ta'o naa, ma atahori fo ma'ahulun mana rema mia basa mamana' fo danggan sia naa,
ara o nggae ei-ei boe.
Huu nda hambu esa,
nae hasa sud'i 'a saa na ra sa.h
12 Nda hambu esa nau neu hasa
bua heheti ao na ra mana tao' mia lilo, lilo fula',
fatu makahad'ok ma mutiara.
Nda hambu esa neu hasa
sira teme lenan, teme sutra,
do, teme meulau fea' dula mbilas, do dula mbilas-maranggeo'.
Nda hambu esa neu hasa
sud'i' saa na ra mia hau ma'ameni', nggad'i-noli nened'ula',
do hau nened'ula' ra.
Nda hambu esa neu hasa
sud'i' saa na ra mia riti, besi do fatu marmar.
13 Nda hambu esa neu hasa
hau ma'ee' do hau rou ma'ee' mata'-mata' na ra sa.
Nda hambu esa neu hasa
hau raa ma'ameni na ra, do, mina ma'ameni' mata'-mata' sa.
Nda hambu esa neu hasa
oe anggor ma mina saitun,
tarigu, do, are-gandum na ra sa.
Nda hambu esa neu hasa
sapi, lombo, do, ndara na ra sa.
Nda hambu esa neu hasa
kareta,
do, ate na ra sa.i
14 Dei fo atahori mana danggan naa ra fale rala na ra rae,
‘Ad'oo! Bab'el, e!
Ad'oo, kota manaseli', o!
Ho sud'i 'a saa meulau ma ra, fo atahori ma ra hii rala seli' ra,
nese ena.
Mopo basa se ena, de ara hata-taa',
losa tud'a-loloe rala seli.’
15 Fe'esa'an, atahori mana danggan naa ra ramasu'i huu kota naa 'ona' ina dala'.
Ia naa ara fale rala na ra nda basa-b'asa sa.
Ramatau rala seli,
rita kota naa atahori na ra doid'oso na ra.
Ara nggengge'er,
rita huhuku-d'od'oki' naa.
Te ara rambarani mete mia 'a doo-d'oo'.
Ara rambarani rambarii' mia 'a naa.
16 Boe ma ara 'ola' rae,
‘Ad'oo! Kasian Bab'el, e!
Ad'oo! Kasian kota manaseli', o!j
Ma'ahulun atahori ma ra pake bua meulau' dula mbilas, do mbilas-maranggeo',
mia teme mafelit seli.
Ma'ahulun atahori ma ra heti ao na ra rendi' lilo, mutiara,
ma fatu makahahad'o mafelit seli.
17 Te sia jam esa rala,
sud'i 'a saa ma ra mopo ena.
Nda doo' sa,
su'i ma ra mopo basa se!’
Ma'ahulun mana mauli 'ofa' roo mataroos na ra o
sae 'ofa' reu-rema sia kota naa boe.
Te ia naa ara rambarani nafu sia 'a doo-d'oo'.
Ma ia naa rambarani lalanit mia 'a naa.k
18 Ara ranilu masu' mana dea nema mia ai naa.
Boe ma bub'ulu' rae, kad'e hendi basa e.
De ara fale rala na ra rae,
‘Ad'oo kasian! Nda 'afi' hambu kota fea' sa ena
manaseli' 'ona' kota Bab'el.
Ad'oo kasian! Nda hambu kota fea' sa ena,
meulaun 'ona' e.’l
19 Ara ao afu de mbori neu langga na ra,
huu rala na ra susa.
Ara nggae ei-ei,
huu rala na ra rambalulutu.
Boe ma ara 'ola' rae,
‘Ad'oo! Kasian Bab'el, e!
Ad'oo! Kasian kota manaseli' a, o!
Hai sae 'ofa' mii-'ima mendi sud'i 'a saa fee nggo,
losa hai o mimisu'i boe.
Hai misaa mendi sud'i 'a saa ma ra ena,
losa hai o misod'a meulau-meulau' boe.
Te sia 'a jam esa rala,
basa naa ra, mopo se neu' ena.
Losa' a te,
basa naa ra, lutu-'eto' nala se.’m
20 Basa ma, hara' naa 'ola' fai nae,
‘Wei, hei mana masod'a sia sorga!
Rala ma ra nda parluu mera sa ena.
Wei, Lamatualain atahori na ra!
Rala ma ra nda parluu susa-sona sa ena.
Wei, Lamatualain ded'enu na ra!
Rala ma ra ramaho'o leo.
Wei, Lamatualain mana 'ola-'ola na ra!
Rala ma ra ma'ahee leo.
Ma'ahulun, Bab'el na'asususa' nggi.
Ma'hulun, kota naa ue-hemba nggi.
Te ia naa, Lamatualain bala-b'ae doid'oso ma ra ena.
Te ia naa, Ana bala-b'ae kota naa de'ulakan ena.’”n
21 Basa ma, au 'ita ate esa mia sorga ma'ad'eren seli. Ana nema 'o'o nala fatu esa, monaen 'ona' atahori. De ana mbia fatu a nisi' tasi rala neu. Boe ma nafad'e nae,
“Dei fo ara ralutu Bab'el a 'ona' naa boe.
Dei fo ara ramopo' kota manaseli' naa 'ona' naa boe.o
22 Nda hambu atahori,
mana na'amina' lii-lii' sia nusa' naa sa ena.
Nda hambu atahori
rena sasandu, gitar, suling,
ma ma'oa liin sia kota naa sa ena.
Nda hambu tukan,
tao ues sia ue-taon sa ena.
Nda hambu atahori,
mol are sia kota naa sa ena.p
23 Nda hambu atahori,
ded'e lambu sia kota naa sa ena.
Nda hambu atahori,
feta-d'ote kakab'i' sia naa sa ena.
ma'ahulun, kota naa mana maseo-mahasa' sud'i 'a saa ra,
ramasu'i rala seli,
Ma'ahulun, Bab'el atahori mana danggan na ra,
rasod'a hambu-d'ai rala seli.
Te ara pake nenori ma'ahatu',
fo ralaka atahori sia raefafo'.
Ara pake mod'o suanggi',
fo peko-leleko' atahori sia raefafo'.q
24 Bab'el simbo huku-d'oki' a beran seli,
huu ana 'aka' nisa Lamatualain mana 'ola-'ola na ra.
Nusa manaseli' a lutu-'eto' ena,
huu ana 'aka' ue-hemba namate' Lamatualain atahori na ra.
Hambu Lamatualain atahori na ra ruma, nenetao nisa' sia mamana-mamana fea' ra.
Te Bab'el mana lemba-d'oi basa sala' naa ra.
Nusa manaseli' naa musi lemba-d'oi nala.”r