Lamatualain aten na'asasama' kota Bab'el noo ina dala'
17
Basa ma esa mia ate kahitu' mana to'u bokor rou' ra, nema 'ola' noo au nae, “'Uma ia dei! Au 'ae 'utud'u nggo Lamatualain huku-d'okin neu ina dala de'uhaka' naa. Eni, naeni kota monae' fo ara rafefela deka noo oe nae' a.a 2 Ma'ahulun a mane' mia bee-b'ee rema hohongge roo kota naa atahori na ra. Atahori laen ra o rema rinu mafu, ma tungga-tungga' kota naa hohongge na.”b3 Basa naa ma, Lamatualain Dula-d'alen dai au, ma ate mia sorga a 'o'o nendi au 'isi' mamana rou' esa. Sia naa au 'ita ina' esa 'endo' sia banda de'ulaka' esa ata dulan mbila kara-kara. Banda naa langgan hitu ma suran sanahulu. Sia aon nenesura' ded'ea ne'emutis neu Lamatualain.c 4 Ina' naa pake bua mafelit dula mbilas ma mbilas-maranggeo'. Ana heti aon nendi' lilo, fatu makahad'o mafelit, ma mutiara. Ana to'u sanggi lilo' esa sofe' noo oe anggor sia lima 'ona na. Oe anggor naa, naeni hohonggen ma basa de'ulaka' noo manggenggeo' fo ana tao' ra.d 5 Sia reen nenesura' nara' esa, sosoan fe'e ma'afuni'. Susura naa liin ta'o ia:
Au ia, Bab'el!
Naeni, kota manaseli'!
Basa de'ulaka' sia raefafo',
lao' mia au.
Basa mana hohongge' sia raefafo',
na'oka sia au.
6 Basa ma au mete, te ina' naa manamafu kale-kale' ena, huu ana ninu Lamatualain atahori na ra raa na ra ena. Naeni, ana nisa Lamatualain atahori na ra, huu ara nda raloe' dui-b'engga atahori so'al Yesus sa.
Au 'ita ta'o naa, ma au titindindii mboo-mboo' a ma heran 'ala seli.
7 Te ate a natane au nae, “Ta'o bee de titindindii' 'ona' naa? 'Uma, fo au 'ufad'e ina manendit naa noo banda de'ulaka' fo ana sae' a sosoa na ra. Naeni mana na'ena langga' hitu, ma sura' sanahulu. 8 Lele ulu' a banda mbilas naa nasod'a sia raefafo', te 'ale' ia nese ena. 'Aka' na nda doo' sa te, ana nema mia ndola doid'oso' fo nda ma'iko' a sa. Lele' naa, hambu atahori masod'a' sia raefafo', nara na ra nda nenesura' sia Lombo Ana' susuran sa, fo Lamatualain sura' eni' a lele' Ana nda fe'e tao raefafo' ia sa. Dei fo atahori titindindii rita banda mbilas naa, huu ana bali' ena. Te mete ma nema ena, dei fo Lamatualain mbia e nisi' tasi ai baleran mana mbila nda naloe' sa.e
9 Atahori mahine' dei fo nahine dala' ia. Banda de'ulaka' langga' hitu naa, sosoan lete' hitu. Ina dala' a, 'endo' sia lete' naa ra ata. Ma langga' hitu naa ra sosoan, mane' hitu. 10 Mia mane kahitu' naa ra, mate lima ena. Ia naa esa 'endo' parenda. Esa nda fe'e nema sa. Te mete ma nema, na, ana to'u parenda' losa 'a. 11 Ia naa au 'ufad'e so'al banda mbilas fo fe'esa'an nasod'a, te ia naa mate ena. Fe'esa'an eni o esa mia mane kahitu' naa ra boe, te dei fo ana bali' nema to'u parenda' dad'i mane kafalun a. Neu mate'en te ana o nambalutu boe.
12 Sura' kasanahulu' naa ra sosoa na ra, naeni mane' sanahulu. Ara nda fe'e to'u parenda' sa. Dei fo ara simbo koasa fo to'u parenda' roo banda mbilas a, te ara parenda losa 'a.f g 13 Huu basa se ma'ira' fo fee koasa na ra neu banda mbilas a. 14 Dei fo mane' ra ratati lab'an Lombo Ana' a. Te dei fo Lombo Ana' a noo atahori na ra rasenggi' basa se. Atahori mana tungga Lombo Ana' naa, naeni atahori fo Ana pili ma no'e nala' ra, mana ra'atataa' tungga E. Dei fo ara rasenggi', huu Lombo Ana' naa manaseli'. 'Aka' Eni mesa' ne Mane' soa' neu basa mane' ra, ma Malangga soa' neu basa malangga ra.
15 Boe ma oe nae' mana deka noo ina dala' a, naeni atahori mia basa leo, basa nusa', ma basa ded'eat sia raefafo'. 16 Mane kasanahulu' ma banda de'ulaka' naa, dei fo ara binci ina' fo nda mana na'ena mamaet na sa. Dei fo ara rambas rala basa bua-b'a'un ma sud'i 'a saa na ra, ma lao hela e noo ma'aholan sia naa. Ara o raa ao-sisin boe. Boe ma hela ao-sisin bee, na, ara mbia hendi' ai rala neu. 17 Lamatualain tataon de mane kasanahulu' ra ma'ira', fo fee koasa na ra reu banda mbilas a, losa ana nalutu ina' a. Noo ta'o naa, Lamatualain dud'u'an basa se dei fo dad'i.
18 Dad'i, ina dala' fo ho mita' naa, naeni kota manaseli' fo mana parenda basa mane' sia raefafo'.”