Lamatualain nasa-b'oriin nenembori' raefafo' nema
16
Basa ma, au rena hara mahere' esa kalua mia Ume Hule-o'e', parenda ate kahitu' ra nae, “Mii leo! 'O'o mendi bokor naa ra fo mbori Lamatualain nasa-b'oriin raefafo' neu.”2 Ate kaesan rena ta'o naa, ma ana mbori bokor na isin raefafo' nema. 'Aib'oi' ma, calaka dai basa atahori mana simbo rita banda de'ulaka' a cap na, ma atahori mana songgo paton a. Basa se dai bisu manamburu' nambetan seli.a
3 Ate karuan mbori bokor na isin tasi neu. 'Aib'oi' ma, tasi oe' a dad'i raa manamburu' 'ona' atahori mates raa na. De mate hendi basa mana masod'a' sia tasi' a.
4 Basa naa ma, ate katelun mbori bokor na isin nisi' loe noo oe mata' ra. Boe ma basa oe ra dad'i raa'.b 5 Boe ma au rena ate esa mia sorga mana parenda basa oe mata' ra sia raefafo'. Ana koa-kio Lamatualain 'oi,
“Oo, Lamatua'!
Lamatualain meumare'!
Lamatualain nda masala' sa!
Lamatualain sia eni' a fefeun,
ma sia losa doo ndu'u-d'oo na.
Lamatualain na'etu' ded'eat noo ndoo-tetu'.
Lamatualain na'onda' huhuku-d'od'oki' tungga ndoo na.
6 Atahori rasai'
Lamatualain atahori na ra raa na ra ena.
Atahori tao risa
Lamatualain mana 'ola-'ola na ra ena.
Naa de, Lamatualain na'asusuu' se fo ara o rinu raa' boe.
Naa de, Lamatualain bala-b'ae se noo huhuku-d'od'oki matetu'.”
7 Basa naa ma, au rena hara' esa mia mei tutunu-hohotu' a nataa nae,
“Teb'e! Lamatualain mana koasa.
Teb'e! Lamatualain manaseli'.
Lamatualain mana na'etu' ded'eat noo matetu'.
Lamatualain mana na'onda' huhuku-d'od'oki' tungga ndoo na.”
8 Basa ma, ate kahaan mbori bokor na isin nisi' relo a. 'Aib'oi' ma, relo a natob'i nala seli, losa atahori ra rou na ra 'elao. 9 Basa atahori rou mana 'elao' ra, ndondoon Lamatualain naran, huu Ana mana denu haitua calaka neu se. Mae 'ona' naa o, nda hambu atahori esa doa' sa boe, fo bali' risi' Lamatualain, ma koa-kio E.
10 Basa ma ate kaliman mbori bokor na isin neu banda de'ulaka' a kad'era parenda na. 'Aib'oi' ma, hatu kib'u-kib'u' tatana nala basa atahori mana songgo e, losa ara henggu nisi na ra, fo bisa ra'atataa' doid'oso' a.c 11 Ara o ndondoon Lamatualain sia sorga, huu bisu na ra rambeta seli. Mae 'ona' naa o, nda hambu atahori esa naloe' tao de'ulaka' sa, fo bali' nisi' Lamatualain.
12 Boe ma ate kaneen mbori bokor na isin nisi' loe monae' esa, naran Efrat. Ma loe a mad'a neu' ena. De ara tao dala' sia naa fee neu mane' ra roo sold'ad'u mana rae rema mia seri' rulu.d 13 Boe ma 'ita nitu de'ulaka' telu. Mata-ao na ra 'ona' ngged'e e. Esa dea nema mia mengge-b'uta a bafa na. Esa dea nema mia banda de'ulaka nenetati' a bafa na. Ma esa fai dea nema mia mengge-b'uta a mana 'ola-'olan, mana pepeko-leleko' a, bafa na. 14 Nitu katelu' naa ra ra'ena koasa fo tao manad'ad'i manaseli' mata'-mata'. Ara dea rema randa roo basa mane' sia raefafo', ma kokoe se fo reu ratati lab'an Lamatualain mana koasa manaseli' a. Te fai' fo ara rae reu ratati lab'an Lamatualain naa, naeni Lamatualain fain fo na'etu' nala nae nasenggi' basa musu na ra.
15-16 Mamana' fo ara mahelu' rae ra'ab'ue sia' a fo reu ratati, ded'ea Ibrani 'oi, Armagedon.
Yesus Kristus o 'ola' nae, “Misined'a malolole! 'Aib'oi' neu' ena, Au 'uma 'ona' na'o fo atahori nda bub'ulu' sa. Atahori mana be'e noo nanea noo bua-b'a'u manad'ai', ara 'onton. Huu lele' Au 'uma, ana nda hambu mae sa, huu atahori nda rita ma'aholan sa.”e
17 Basa de, ate kahitun mbori bokor na isin nisi' anin. Boe ma Lamatualain 'ola' nahere' mia kad'era parendan mia Ume Hule-o'e' a nae, “Basa ena! Basa nasa ngga nenembori' ena!”
18 Boe ma lalai a nakahahad'ok neu-nema ma ndelas ndukurulu na'atutute'. Ma rae nanggenggo manaseli', fo nda fe'e parnaa dad'i sia raefafo' ia sa.f 19 Lele' naa, Lamatualain nda lilii' kota Bab'el de'ulakan sa. Ana tao rae a nanggenggo manaseli', losa Kota manaseli' naa natafa'a neu telu. Ana tao ta'o naa, fo atahori Bab'el med'a rita nasa na. Kota-kota fea' sia raefafo' o ra'aloli boe.g 20 Lele' naa pulu-pulu ra tena reu' ena, ma lete-lete' ra o mopo basa se boe.h 21 Hambu 'ud'a es fatu monae' tud'a mia lalai de tuni nala atahori. Es fatu naa ra bera na ra, ruma losa kilo haa nulu.i Huu 'ud'a es tao doid'oso se, naa de atahori ndondoon Lamatualain.j