Lamatualain aten hitu mia sorga rendi calaka monae' hitu raefafo rema
15
Basa naa ma, au 'ita saa manaseli' esa sia lalai, losa au heran. Hambu ate hitu mia sorga, esa-esa' to'u koasa fo haitua calaka monae' raefafo' nema. Calaka kahitu' ia ra, naeni calaka ma'ab'ui' ra. Mete ma basa se dad'i ena, naa sosoan 'oi, Lamatualain ralan ma'asufu ena, de nda namanasa atahori sa ena.2 Basa ma au 'ita tasi' a mbila 'ona' kaca nenesambor noo ai. Au o 'ita atahori rambarii' sia tasi suun boe. Sira, atahori nda mana tungga banda de'ulaka' a sa, nda songgo paton na sa, ma nda simbo cap na sa. Basa se to'u lii-lii' ra 'ona' sasandu, fo ara simbo mia Lamatualain. 3 De ara sod'a sosod'at esa mia ba'i Musa, naeni Lamatualain atahori ded'enu ma'ahulu na. Atahori ia ra o sod'a sosod'at esa fo koa-kio Yesus. Lele ulu' a atahori risa E, 'ona' atahori risa bib'i lombo ana' sia Lamatualain Ume Hule-o'en fo tao ma'asufu rala na. Ara sod'a 'oi,a
“Hai koa-kio Lamatualain!
Hai so'u minanaru naran!
Huu Lamatualain Koasan, manaseli'.
Ma Lamatualain manaselin, seli teb'e.
Lamatualain to'u parenda' neu basa nusa' sia raefafo'.
Lamatualain dad'i mane' neu basa leo ra sia raefafo'.
Lamatualain tataon, manaseli'!
Lamatualain ue-tataon, malolen seli!
Lamatualain dalan, ndoo-tetu'!
Lamatualain masod'an, matetu'!b
4 Basa atahori so'u rananaru Lamatualain naran,
basa atahori koa-kio Lamatualain malole na.
Huu 'aka' Lamatualain mesa' ne meumare'.
'Aka' mesa' ne nda masala' sa.
Dei fo basa nusa ra rema be'utee neu Lamatualain.
Dei fo basa leo ra rema ro'e makasi neu Lamatualain.
Huu basa atahori rita Lamatualain ue-tatao malolen.
Ma basa atahori bub'ulu' Lamatualain rala ndoos na ena.”c
5 Lele' atahori ra sod'a basa, ma au 'ita Kama Meumare Manaseli' sia Lamatualain Ume Hule-o'en sia sorga, noo teme pepelen mana makambembele loa'.d 6 Boe ma au 'ita ate kahitu' mia sorga mana rendi calaka kahitu' ra. Ara kalua mia Lamatualain Ume Hule-o'e na. Ara pake bua maronda muti meu', noo bad'u selendang mia lilo isi'.
7 Au o 'ita esa mia banda kahaa manaseli' mana sia Lamatualain kad'era parendan bob'oan, banggi bokor lilo' hitu fee neu ate kahitu' ra. Bokor kahitu' naa ra, esa-esa' nene'isi' noo huku-d'oki' mia Lamatualain. Ana mana nasod'a nakandoo losa doo ndu'u-d'oo na. Ana sangga nae mbori nasa-b'oriin raefafo' nema. 8 Nda doo' sa ma, Ume Hule-o'e' a sofe noo masu' mana natud'u Lamatualain mandente-masa'an noo koasan sia naa. Nda hambu atahori esa maso' nisi' naa sa boe. Ate kahitu' naa ra musi mbori rab'asa' calaka kahitu' naa ra raefafo' rema, dei fo atahori fe'e bisa maso' rala reu na.e