Lombo Ana' noo atahorin rifon natun esa haa nulu haa
14
Basa de, au boti' mata ngga, 'aib'oi' ma, au 'ita Lombo Ana' naa nambarii' sia lete ana' esa ata, naran lete Sion. Ana nambarii' na'ab'ue noo atahori rifon natun esa haa nulu haa. Sia basa se ree na ra, nenesura' Lombo Ana' a noo Aman nara na ra.a 2 Boe ma au rena hara' esa mia lalai. Liin, monae' 'ona' ree monae' ra po'a ma nakandendesi 'ona' ndelas. Te hara' naa meulaun, 'ona' atahori hetar ra'amimina' sasandu. 3 Boe ma au 'ita atahori rifon natun esa haa nulu haa naa ra rambarii' mbali Lamatualain, noo banda haa manaseli' rereo' Lamatualain kad'era parendan, noo malangga karua nulu haa' ra. Atahori naa ra sod'a sosod'a feu' esa. 'Aka' mesa' se rahine sosod'at naa, te atahori laen ra hoko'. Sira malole roo Lamatualain ena, huu Lamatualain soi-tefa se nendi' Anan raa na. 4 Masod'a na ra meumare', 'ona' monetena' nda fe'e sunggu' nita noo ina' sa. Ara tungga Lombo Ana' naa sud'i 'a bee reu, huu Lamatualain soi-tefa nala se nendi' anan raan, fo ara dad'i Eni 'ena na ra. Huu naa, ara 'ona' mbule ulu' fo atahori rendi mia osi fee neu Lamatualain noo Lombo Ana' a. 5 Ara o nda pepeko-leleko' rala' sa, huu rala na ra meu'.bLamatualain aten telu mia sorga rendi hara'
6 Basa ma au 'ita Lamatualain aten esa fai mia sorga. Ana natambele narun seli sia lalai a, fo 'ola' Lamatualain Hara-lii Malolen mana nda nama'etu' sa. Ana natambele rereo' nafad'e basa atahori sia raefafo', mia basa leo ra, basa nusa' ra, ma basa ded'eat ra. 7 Ana nameli nahere' nae,
“Hei musi fee had'at neu Lamatualain!
Hei musi so'u minanaru nara mandete-masa'an!
Huu fain losa ena,
fo Lamatualain paresa' basa atahori ra tatao na ra.
Koa-kio E!
So'u minaru naran!
Huu Ana mana tao raefafo' noo lalai a.
Ma Ana mana parenda de tasi' noo oe mata' ra dad'i.”
8 'Ola' basa ta'o naa, ma au 'ita ate esa mia sorga, mana nema tungga e. Ana nafad'e 'oi, “Nambalutu ena! Nambalutu ena! Kota Bab'el manaseli' a, nambalutu ena! Kota de'ulaka' naa, ndefa' losa rae a ena. Lele ulu' a, kota naa 'ona' ina dala', mana soa na'asusuu' atahori mia basa nusa' sia raefafo' rinu mafu ma tungga eni hohongge na. Te ia naa kota naa med'a Lamatualain nasan ena!”c
9 Basa ma, au o 'ita ate esa fai mia sorga, mana nema tungga ate nomer karuan a. Ana nameli nahere' 'oi, “Besa-b'esa, o! Basa atahori mana songgo banda de'ulaka' naa noo paton na, do simbo cap na sia ree na ra, do sia lima na ra, dei fo ara o ramed'a Lamatualain nasan boe! 10 Dei fo Lamatualain mbori nasan neu se, 'ona' Ana fee se rinu anggor oe langga' manameru'. Dei fo Ana mbia hendi se risi' ai baleran mana mbila roo-roo' nda manab'asa' a sa. Ate na ra mia sorga ra, roo Lombo Ana' o rita dala' naa boe.d 11 'E'ekun, basa atahori mana songgo banda noo paton na, ma simbo cap na, dei fo ara hambu doid'oso' ta'o naa nda mana basa' sa. Masu' mia sira mamana doid'oson namasu dea nema hatu'-rerelon nda naloe' sa.”e
12-13 Dad'i basa naa ra masud na 'oi, Lamatualain atahori na ra musi rena malolole parendan, ramahere rakandoo neu Yesus, ma 'afi' ra'ad'ed'ea'.
Basa ma au rena hara' esa mia lalai nafad'e au nae, “Yohanis! Ho musi sura' ta'o ia: ia naa, mete ma atahori ramahere neu Lamatua' Yesus losa ara mate, na, ara 'onton seli.”
Basa ma Lamatualain Dula-d'ale Meumaren nataa 'oi, “Teb'e! Dei fo ara 'onton teb'e! Huu ara doid'oso mia raefafo' ena, te ra'atataa' tungga rakandoo Lamatualain. De dei fo Ana bala-b'ae beb'engge na ra, ma nda rasod'a doid'oso sia sorga sa.”
Lamatualain huku-d'okin sia raefafo' sama 'ona' ara 'etu-'oru rendi' dombe sab'it
14 Basa ma, au boti' mata ngga. 'Aib'oi' ma, 'ita lelee muti maronda' esa noo atahori esa 'endo' sia lelee' naa ata. Atahori naa, 'ona' Atahori Matetu'. Ana pake solo nesenggit mia lilo, ma to'u dombe sab'it tande' esa.f
15 Basa de, au 'ita ate fea' esa fai mia sorga, dea nema mia Lamatualain Ume Hule-o'e na. Ana randu nahere' mbali atahori sia lele' a 'oi, “Pake dombe sab'it a fo 'etu-'oru leo! Te fai 'etu-'oru raefafo' buna-b'oa na ra, losa ena.”g 16 Boe ma Atahori mana 'endo' sia lelee' a lombe dombe sab'it na, de 'etu-'oru nad'uru raefafo' buna-b'oa na ra.
17 Boe ma ate esa fai dea nema mia Ume Hule-o'e' sia sorga. Ana o to'u dombe sab'it tande' esa, fo nae 'etu boa'.
18 Basa de ate esa fai dea nema mia mamana lalangge hau raa ma'ameni' sia Ume Hule-o'e' sia sorga. Ate ia ue-tataon, naeni nanea ai sia mamana lalangge hau raa ma'ameni' a. Ana nameli mbali ate mana to'u dombe sab'it a nae, “Pake dombe ma fo muu 'etu boa' sia raefafo' leo! Huu hau anggor boa sia naa 'aka' latu' ra ena.” 19 Boe ma, ate a lombe dombe sab'it na raefafo' nema, de seru nala anggor ngingginu na ra. De ana mbo'a anggor boa' naa ra risi' bak 'e'ee' rala neu. De ara heheta se rae ha'i oe na. Heheta anggor boa' sia bak 'e'ee' a, naeni Lamatualain nasab'ori na. 20 Bak 'e'ee' naa sia kota dea'. Lele ara heheta anggor boa' naa ra, ma raa' nandali naen seli. Raa' nandali 'ona' loe esa, nanarun kilo natun telu, ma roroman meter esa seseri'.h i