Banda de'ulaka' mana dea nema mia tasi
13
Basa naa ma, au 'ita banda de'ulaka' esa dea nema mia tasi. Langgan hitu ma suran sanahulu. Ana pake solo mane' ra esa-esa' sia sura na. Sia langga na ra nenesura' ded'ea ne'emutis neu Lamatualain.a 2 Aon 'ona' meo-aku. Ein, 'ona' banda baruan ei'. Ma bafan, 'ona' singa bafa' e. Mengge-b'uta a fee bali' hak na neu banda de'ulaka' naa fo 'endo' sia kad'era parenda' ma pake basa koasa na.b 3 Sia banda de'ulaka' a langgan esa hambu bisu foa monae' esa, 'ona' nenetati dai' losa nae 'a mate, te nda mate sa. Basa atahori sia raefafo' heran rita banda de'ulaka' a manaseli', de ara tungga e. 4 Ara o fee had'at neu mengge-b'uta naa, ma rananaru e 'ona' Lamatualain, huu mengge a fee koasa neu banda de'ulaka' naa. Atahori naa ra o koa-koa' banda de'ulaka' a rae, “Eni o, manaseli'! Nda hambu esa bisa nasenggi' e sa boe!”5 Lamatualain mbo'i banda de'ulaka' a, fo 'ola' koao ma na'amuti Lamatualain. Ana hambu 'isin fo to'u parenda', losa too telu seseri' (naeni fula haa nulu rua). 6 Naa de, ana 'ola' na'atutud'a' Lamatualain naran ma ana 'ola' na'amuti basa Lamatualain atahori na ra mana leo sia sorga.c 7 Lamatualain o fee 'isin neu e, fo natati lab'an Lamatualain atahori na ra, losa nasenggi' se. Ana o hambu koasa fo parenda basa atahori mia basa leo ra, basa nusa' ra, ma basa ded'eat sia raefafo'.d 8 Huu naa, basa atahori sia raefafo' songgo banda de'ulaka' naa. Mana songgo' naa ra, naeni basa atahori, fo nara na ra nda nenesura' sia Lombo Ana' a susuran sa. Lele ulu' a atahori risa Lombo Ana' a, te Lamatualain tao nasod'a bali' E. Lele' Lamatualain nda fe'e tao raefafo' ia sa, te Ana sura' basa atahori mamahere' ra nara na ra sia susura naa 'oi, dei fo ara hambu masoi-masod'a ndoo-tetu' nda mana basa' sa.e
9 “Rena malolole!
10 Mete ma Lamatualain na'etu' nae, atahori esa musi neneto'u',
na, dei fo teb'e ana neneto'u'.
Mete ma Lamatualain na'etu' nae, atahori esa musi nenetati' noo fela tafa',
na, dei fo ana nenetati' noo fela tafa'.”
Dad'i Lamatualain atahori na ra 'afi' mi'id'ed'ea', te naa dad'i kaka'e' fo ra'atataa' tungga ma ramahere rakandoo neu E!f
Banda de'ulaka' mana kalua mia raefafo'
11 Basa naa ma, au 'ita banda de'ulaka' laen, kalua mia raefafo'. Suran rua, 'ona' bib'i-lombo sura na. Ma haran 'ona' mengge-b'uta hara na. 12 Ana dad'i mana 'ola-'ola' soa' neu banda de'ulaka' fefeun, fo fe'esa'an nenetati' losa nae 'a mate. Ana simbo koasa mia malangga netatin naa, fo neu na'asusuu' basa atahori sia raefafo' songgo malangga na. 13 Ana o tao manad'ad'i manaseli' ra, losa ana bisa na'onda' ai mia lalai nisi' basa atahori ra mata na ra boe. 14 Noo ta'o naa, banda de'ulaka' karuan peko-leleko' atahori sia raefafo' nendi' malanggan koasa na. Ana o parenda atahori tao paton esa, 'ona' malanggan mata-aon, fo ara fee had'at neu malanggan, fo lele ulu' a nenetati dai' losa nae 'a mate ena. 15 Lamatualain o mbo'i banda mana peko-leleko' naa, fo fee ani-hahae masod'a' neu paton naa. Noo ta'o naa paton naa 'ola' nala', ma parenda tati risa atahori nda mana nau songgo e sa.
16 Banda mana peko-leleko' naa o na'asusuu' basa atahori fo simbo cap sia lima 'ona na ra, do, ree na ra. Basa atahori, anak-moko, hatataa'-mamasu'i', ate do mana leo-ao', basa se musi simbo cap naa. 17 Te hoko', na, ara nda bisa raseo-rahasa' saa-saa sa boe. Sia cap naa, nenesura' banda de'ulaka' nomer kaesan naa naran noo nomer na.
18 Sia ia musi pake dud'u'at! Atahori mahine' a nahine nomer naa sosoa na. Nomer naa mana natud'u atahori esa, naeni “666”.g