M'engge-b'uta natati lab'an ina' esa noo anan
12
Basa ma, 'aib'oi' te 'ita manad'ad'i manaseli' esa sou mia lalai, fo atahori nda fe'e rita sa: hambu ina' esa aon neneb'ab'ata' noo relo a. Ana tab'u ein sia fulan, ma pake solo mane' mana na'ena nduu' sanahulu rua. 2 Ina' naa mairu' ma mana nggae', huu tein nambeta named'a nae bonggi.3 'Aib'oi' ma, 'ita manad'ad'i manaseli' laen esa fai sou mia lalai a. Hambu mengge-b'uta mbilas monae' esa. Langgan hitu ma suran sanahulu. Ana pake solo mane' hitu sia langga na ra.a 4 Ana sari namopo' nduu' bab'anggi' esa sia lalai a nendi' 'iko na. De hela 'aka' a bab'anggi' rua. Boe ma ana mbia hendi nduu' naa ra raefafo' rema. Basa de neu nambarii' mbali ina' naa, de nahati losa ana bonggi. Huu ana nae 'od'o 'ana' naa.b 5 Basa ma, ina' a bonggi nala ana tou' esa, ma Lamatualain aten esa mia sorga nema rambas nala 'ana' naa, de nendi nisi' Lamatualain fo 'Ana' naa parenda noo Lamatualain sia sorga. Huu dei fo 'Ana' naa, parenda basa nusa' sia raefafo' noo koasa manaseli'.c 6 Ma ina' naa nela nisi' mamana ma'afuni' esa fo Lamatualain sad'ia hela fee ne' a. Dei fo ara mete-se'u e sia naa losa too telu seseri' (naeni fai rifon esa natun rua nee nulu (1.260)).
Mikael natati lab'an mengge-b'uta sia sorga
7 Basa naa ma, netati monae' dad'i sia sorga. Lamatualain ate na ra roo sira malanggan Mikael ratati lab'an roo mengge-b'uta noo ana boa na ra.d 8 Mikael se rasenggi' mengge-b'uta a noo ana boa na ra. Basa ma ara 'ai mengge-b'uta noo ana boa na ra fo 'afi' sud'i leo sia sorga fai. 9 De ara 'oi hendi se mia sorga, de mbia se raefafo' rema. Mengge-b'uta naa, nitu ra malangga na. Mia fefeun ana 'aka' leleko' atahori fo ara tao sala'.e
10 Basa ma au rena hara monae' esa mia lalai 'oi,
“Lele ulu' a mengge-b'uta a nambarii' nakandoo 'a sia Lamatualain mata na.
Eni, mana nendi hara pepeko-leleko', fo fee sala' neu hita toronoo mamahere na ra.
Ana 'aka' fua sala' neu se hatu'-rerelo na.
Te ia naa ana nenenggari-hendi' mia sorga ena.
Dad'i ia naa basa' e manad'ai' ena.
Ia naa fain losa ena fo Lamatualain fee masoi-masod'a' neu atahori.
Ia naa, Lamatualain to'u parenda' noo koasa manaseli'.
Ma Ana so'u nala Kristus,
Atahori fo Ana pili nala dad'i mane' neu basa nusa' ra.f
11 Hita toronoo atahori mamahere ta ra rasenggi' mengge-b'uta fo ma'ahulun mana mbia sala' neu se,
huu Lombo Ana' raan nandali fo 'ose hendi sala na ra.
Ara o rasenggi' e boe,
huu ara rambarani rafad'e Lamatualain Ded'ea-'o'ola na.
'Ona' mae atahori ramanasa fo rae risa se o,
ara nda dinggo' sa.
12 Dad'i basa mana masod'a' sia sorga, musi ramaho'o!
Ma basa mana masod'a' sia raefafo' musi ranea,
huu calaka nae 'a tud'a dai nggi.
Nitu ra malanggan 'onda nisi' nggi.
Ana namanasa nae mate,
huu ana bub'ulu' nae, eni fai tao de'ulakan, nae 'a basa ena!”
Mengge-b'uta a sangga-sangga' ina' naa sia raefafo'
13 Lele' mengge-b'uta a bub'ulu' nae, eni nenenggari' raefafo' nema, ma ana neu sangga fo nae na'asususa' ina' mana bonggi Ana' naa. 14 Te ara fee ina' naa lid'a' rua, 'ona' mbui nggarud'a lid'an, fo ana natambele neu keke sia mamana ma'afuni' mana na'ad'oo' mia mengge-b'uta a. Sia naa, ara tao mata' neu e losa too telu seseri'.g 15 Mengge-b'uta a nita ta'o naa, ma ana nasapupura' oe 'ona' oe mandali', fo nae nandali nendi ina' naa. 16 Te raefafo' tulu-fali ina' naa noo dala', rae a natanggaa fo musi hendi oe mana mandali' mia mengge-b'uta bafan, fo 'afi' nandali losa ina' naa. 17 Boe ma mengge-b'uta a namanasa ina' naa seli. De ana dea neu natati noo ina' a ana laen na ra, naeni atahori mana rasod'a tungga Lamatualain parendan, ma rataa rae, sira Yesus atahori na ra. 18 Basa ma mengge-b'uta a neu nambarii' nangginggio sia tasi suu na.