Lamatualain mana 'ola-'ola manaselin rua
11
Basa ma ara loo fee au hau uuku' esa narun 'ona' teteas. Ma Lamatualain parenda au nae, “Yohanis. Fela leo fo muu uku Ume Hule-o'e Huu ngga noo mei tutunu-hohotun sia kota Yerusalem. Ma reken basa atahori mana hule-o'e sia naa.a 2 'Afi' uku ume hule-o'e' a nembeleon, te mamana' naa fee hendi ena neu nusa-nusa fea' fo nda mana rahine Au sa. Dei fo ara reu tatab'u ranggenggeo kota ngga naa, losa fula haa nulu rua (naeni fai rifon esa natun rua nee nulu (1.260)).b 3 Dei fo Au denu atahori ngga rua sia naa, fo dad'i mana 'ola-'ola ngga. Dei fo ara pake bua sususa' ma rafad'e hara-lii ngga, losa fai 1.260 naa ra basa.”4 Lamatualain mana 'ola-'olan Sakaria sura' mema' mia lele ulu' a, so'al mana 'ola-'ola karua' ia ra. Ana pake gambar hau saitun huu' rua noo mamana mbed'a' lambu rua mana mambarii' mbali Lamatualain, mana na'ena hak parenda basa atahori sia raefafo'.c 5 Mete ma atahori rae tao ra'asususa' Lamatualain mana 'ola-'ola karua na ra ia ra, dei fo ai kalua mia bafa na ra fo rakad'e' basa musu na ra. Noo ta'o naa basa atahori mana rae tao ra'asususa' se, dei fo ara mate. 6 Lele' ru'a se dad'i Lamatua' mana 'ola-'olan sia raefafo', Ana fee koasa neu se fo 'ena 'ud'an. Ana o fee se koasa fo tao oe dad'i raa', ma koasa fo tao calaka mata'-mata' sia raefafo', tungga 'a hihii-nanau na ra.d
7 Mete ma fai dui-b'engga Lamatualain hehelu-fufulin nate'e ena, dei fo banda manggeo esa dea nema mia ndola' fo nda ma'iko' a sa. Ana natati lab'an ru'a se, losa nakala' ma tao nisa se.e 8-9 Noo ta'o naa, ru'a se mate sia nusa monae' fo lele ulu' a atahori risa sira Lamatuan sia hau nggangge'. Te kota naa, dad'i kota de'ulaka' 'ona' Sod'om noo Masir lele ulu' a. Dei fo atahori ra nggari hendi mana 'ola-'ola' naa ra ao-sisi na ra sia dala', losa fai telu seseri'. Basa fo atahori mia basa leo ra, basa nusa' ra, ma basa ded'eat ra, rema ranilu mamates karua' naa ra. Ara o nda fee 'isin fo ne'oi se sa boe,f 10 huu ara ramaho'o rita atahori karua' naa ra mate ena. Te ma'ahulun ru'a se 'aka' a ra'asususa' basa atahori sia raefafo' dud'u'a na ra. De ara feta-d'ote, ma esa haitua fee esa hahambu'.
11 Basa fai telu seseri', dei fo Lamatualain fee se hahae' fo rasod'a bali'. Boe ma basa atahori mana rita se foti ngge'e-ngge'e.g 12 Mana 'ola-'ola karua' naa ra rena hara mahere' esa mia lalai denu se 'oi, “Woi! Ru'a nggi hene ia 'ima leo!” Boe ma ru'a se neneso'u' lalai reu ma lelee' a bab'ata nala se. Musu na ra rita ta'o naa, ma ara mboo-mboo 'a.h 13 'Aib'oi' ma, rae a nanggenggo' seli. 'Ona' hita reken basa ume sia kota, na, mia ume sanahulu, hambu esa sea hendi' e. Ma mate atahori rifon hitu. Atahori fea' nda mana mate' ra sa, ramatau rala seli. Te dei fo ara o fee had'a-hormat neu Lamatualain boe, huu Eni mana to'u parenda' sia sorga.i
14 Noo ta'o naa, calaka karuan seli ena. Te besa-b'esa, o! Huu calaka katelun nae nema ena.
Fuu ma'oa kahitun — Lamatualain noo Yesus Kristus to'u parenda' sia raefafo'
15 Basa ma, Lamatualain ate kahitun mia sorga fuu ma'oan. 'Aib'oi' ma au rena hara' nae' rema randaa mia sorga rae,
“Ia naa manato'u parenda' sia raefafo',
'aka' a Lamatualain noo Kristus,
naeni Lamatualain Atahorin fo Ana pili nala eni' a lele ulu' a.
Dei fo Lamatualain to'u parenda' nakandoo 'ona' mane, losa doo ndu'u-d'oo na.”j
16 Malangga karua nulu haa' mana 'endo' sia kad'era-kad'era parenda' sia Lamatualain matan, ara o rena hara' naa ra boe. Boe ma ara sende' lulu-langga na ra noo mata na ra losa rae, de koa-kio Lamatualain, 17 ma sod'a rae,
“Oo, Lamatualain!
Hai Malangga ma!
Hai Lamatualain ma!
Lamatualain mana parenda basa' e.
Lamatualain mana koasa basa' e.
Lamatualain mana sia eni' a lele ulu' a.
Lamatualain mana sia lele' ia.
Hai mo'e makasi neu Lamatualain,
huu Lamatualain pake koasa monaem ena,
fo to'u parenda' sia raefafo'.
18 Te nusa-nusa' laen ra ramanasa,
huu ara nda nau tungga Lamatualain sa.
Ia naa Lamatualain o namanasa boe,
huu ara nda nau rahine E sa.
Lele' ia fain losa ena,
fo Lamatualain hukun atahori mana nda taoafi' neu E sa.
Lele' ia fain losa ena,
fo Lamatualain tao nambalutu atahori mana tao rambalutu atahori fea' ra.
Lele' ia fain losa ena,
fo Lamatualain paresa' atahori mates ra ded'ea na.
Lele' ia fain losa ena,
fo Lamatualain bala-b'ae ded'enu na ra mbusa-titi na ra.
Naeni Lamatualain mana 'ola-'ola na ra,
noo Lamatualain atahori na ra,
moko-anak, lasi'-soru'.
Lamatualain bala-b'ae basa atahori,
mana fee had'at neu nara na.”k
19 Basa naa ma, au 'ita sia sorga, Lamatualain Ume Hule-o'en lelesun nenesoi'. Boe ma au 'ita peti fo lele ulu' a ara mbed'a' Lamatualain parendan mana nenesura' sia fatu. Boe ma lani a nakahahad'ok neu-nema, ndelas ndukururulu na'atutute', raefafo' nanggenggo', ma 'ud'a es fatu mamab'era' tud'a mia lalai.l